CRTVG

Buscar

A Garda Civil investiga dúas persoas de Negreira por maltrato animal

Publicado o 19/06/2019 16:16

Axentes da Garda Civil de Noia investigan dous veciños de Negreira pola tenza de cinco cans en moi malas condicións hixiénico-sanitarias, falta de atención e manutención, así como por deixar morrer tres cachorros.

Foi un particular o que informou a Garda Civil de que nunha cadra había dúas crías de can mortas e outro máis agonizando e de que un can de raza labrador estaba noutro espazo moi reducido para o tamaño do animal.

Os axentes constataron que os cans estaban nuns pequenos cubículos cheos de excrementos, sen limpeza nin ventilación e non dispoñían de auga. A pouca comida que tiñan ao seu alcance estaba en estado de putrefacción.

Ante a gravidade dos feitos, e xunto coa Policía Local de Negreira e persoal do Concello, traladaron os cans a unha clínica veterinaria, onde elaboraron un informe en que se manifestaba as lamentables condicións en que estaban os animais.

Os cans tiñan como destino a súa venda e unha das persoas sospeitosas xa fora investigada por maltrato animal tras poñer á venda nun portal de Internet un can enfermo, por falsidade documental ao empregar fotografías de criadeiros autorizados e estafa por pola venda de cans mestizos indicando que eran de raza.

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí