Unha das vivendas rexistradas no marco desta operación foi unha situada no concello de Oia. Un chalé alugado nunha aldea illada, onde o gran movemento que se xeraba non pasaba desapercibido para os veciños, ao igual que o gran despregamento policial do martes, cando á primeira hora da mañá axentes da Garda Civil e da Policía Nacional rodeaban o inmoble. 

A vivenda, unha base loxística da organización, agochaba ademais un completo laboratorio, con todo o necesario para manipular cocaína. E non só iso. Os axentes tamén atoparon as ferramentas necesarias para extraer cocaína impregnada en obxectos. E os químicos necesarios para devolvela ao seu estado en po para logo ser mesturada con outras substancias de corte e gañar en cantidade. Unha vez preparada, os detidos eran os encargados da súa distribución e venda, chegando por igual a Lugo, Ourense ou Ferrol.