Ten máis de cen anos, pero está máis viva ca nunca. Falamos da feira de Curtis, un referente do mercado rural de proximidade, cunha longa lista de espera para vender nalgún dos seus postos.

Trato directo, de confianza, e produto local de primeira calidade. Esa é a receita que todos os días 9 e 23 do mes xunta en Curtis milleiros de persoas.

Desde un terneiro a un prato de filloas, sen esquecer o pan, o mel, o chourizo ou as plantas. Aquí fanse boas vendas, sobre todo se a feira cae na fin de semana. Por iso hai 70 comerciantes agardando por un posto.

E para pechar os tratos nada mellor que un polbo á feira nesta feira, unha das máis antigas e concorridas que quedan no país.