EFE

A Axencia Europea de Medicamentos  EMA) deu este luns o seu visto e prace a unha dose de reforzo na poboación adulta xeral coa vacina da covid−19 de Moderna entre seis e oito meses despois da segunda inxección.

O regulador europeo revisou datos presentados pola farmacéutica estadounidense que mostran que unha terceira dose deste preparado, seis a oito meses despois da segunda, "provocou un aumento nos niveis de anticorpos en adultos" en quen diminuíra co paso do tempo. En concreto, a axencia comunitaria afirmou que "se pode considerar" esa terceira inxección de Moderna, que é a metade da utilizada para a vacinación primaria de dúas doses.

Os efectos secundarios coa dose de reforzo son similares aos provocados pola segunda, mentres que “o risco de enfermidades cardíacas inflamatorias” e outros efectos adversos “están a controlarse coidadosamente”, asegura a EMA.

A EMA fai pública esta opinión para que os organismos de saúde pública poidan emitir recomendacións oficiais sobre o uso dunha dose de reforzo con Moderna, o que terá en conta varios factores, como a situación epidemiolóxica local.

Esta é a segunda vez este mes que a EMA apoia a seguridade e a eficacia dunha dose de reforzo coas vacinas de ARNm, debido a que a principios de outubro deu o seu visto e prace a unha terceira dose con Pfizer polo menos seis meses despois da segunda en adultos maiores de 18 anos.

A dose de reforzo na poboación xeral é diferente á dose adicional para as persoas cun sistema inmunolóxico moi debilitado. Neste segundo caso, a EMA xa recomendou administrar unha dose adicional tanto con Pfizer como con Moderna polo menos 28 días despois da segunda inxección.