EFE

A Axencia Europea de Medicamentos (EMA) aprobou este venres a extensión do uso da vacina de  Pfizer BioNTech á poboación adolescente de entre 12 e 15 anos. Deste xeito, convértese no primeiro preparado contra a covid-19 con apoio científico na Unión Europea para menores de 16.

Pfizer e BioNTech probaron en fase III a súa fórmula contra o coronavirus en 2.260 adolescentes e aseguraron que a súa efectividade foi do 100 % e cunha "sólida resposta inmunolóxica". No ensaio, agregan, a vacina "tolerouse ben en termos xerais".

Marco Cavaleri, xefe de Estratexia de Vacinas, confirmou esta “indicación pediátrica” acordada hoxe nunha reunión extraordinaria do comité de fármacos de uso humano (CHMP), que concluíu que a vacina é “segura” e eficaz en nenos desa franxa de idade.

A vacina, que xa está aprobada na UE desde decembro para maiores de 16 anos, terá a mesma aplicación en nenos de 12 a 15 anos que o que se lle está dando na actualidade aos adultos: administrarase en dúas inxeccións nos músculos da parte superior do brazo, con “tres semanas” de diferenza entre a primeira e a segunda dose.

Doutra banda, a EMA asegurou que mantén a súa recomendación de inxectar unha segunda dose da vacina de AstraZeneca a quen recibiu unha primeira sen mostrar efectos adversos de coagulación sanguínea porque non hai evidencias de que a segunda inxección aumente o risco de desenvolver trombocitopenia con respecto á primeira dose.

O regulador europeo subliñou que hai evidencias ofrecidas por algúns estudos, que aínda deben ser analizados pola EMA, sobre a efectividade do uso dunha segunda dose dunha vacina de ARNm, cuxo resultado mostra que “non hai preocupación desde unha perspectiva de seguridade” e que este é “un enfoque realmente eficaz” desde o punto de vista inmunolóxico.