EFE

As tormentas caídas ao paso da depresión illada en niveis altos (DINA) sobre España desde este mércores seguen deixando zonas alagadas, danos en vivendas, industrias e zonas agrarias, e cortes en servizos de electricidade e transporte, con perdas millonarias que xa se empezan a avaliar.

Este xoves, catorce comunidades autónomas atópanse en aviso laranxa —Aragón e as Illas Baleares— ou amarelo —Andalucía, Asturias, Cantabria, Castela e León, Castela-A Mancha, Cataluña, Galicia, Comunidade de Madrid, Navarra, País Vasco, A Rioxa e Comunidade Valenciana—, por choivas e tormentas que está a deixar a gota fría ao seu paso por España desde o mércores.

Castela-A Mancha é unha das comunidades máis afectadas, e especialmente a provincia de Toledo, onde a Garda Civil rescatou 37 persoas, entre elas dous cidadáns franceses que quedaron atrapados na localidade de Cobisa e unha persoa con discapacidade en Torrecilla de la Jara. Na localidade de Guadamur, as choivas torrenciais arrastraron coches e inmobiliario ao seu paso. As tormentas deron un respiro en Cuenca, onde se mobilizaron máquinas quitaneves para retirar o limo das estradas na zona de Barajas de Melo.

As choivas torrenciais que caeron nas últimas horas na Comunidade Valenciana obrigaron a levar a cabo durante a noite numerosos rescates de vehículos atrapados na auga e achiques, e ademais, no caso de cidades como Valencia, causou danos nunhas fallas que estaban en plena plantà. E é que a tormenta, que descargou con forza sobre a área metropolitana de Valencia e na capital e que ademais estivo acompañada de fortes ventos, produciuse en plena plantà das fallas.

Entre as 11 da mañá de onte e as 7 horas de hoxe, o teléfono único de emerxencias 112 recibiu 945 chamadas na Comunidade Valenciana e xestionou 671 incidentes relacionados co episodio de choivas, a maior parte por vehículos atrapados e garaxes alagados. Os bombeiros do consorcio provincial de Valenciana efectuaron durante a noite numerosos rescates de vehículos atrapados na auga e achiques.

O servizo de trens está suspendido entre Vinaròs (Castelló) e Tarragona, aínda que se restableceu a circulación en todas as estradas valencianas e o fluído eléctrico en toda a rede tras os cortes de onte á noite, e a rede de Metrovalencia funciona xa con normalidade. Mentres, en Murcia, as rúas de Lorca atópanse asolagadas e o Concello pediu aos cidadáns que eviten utilizar o coche mentres duran as tormentas.

En Cataluña, onde onte caeron en tres horas 252 litros por metro cadrado sobre Alcanar —máis da metade das precipitacións dun ano, que son 490 l/m²— o Govern considera declarar zona catastrófica os municipios afectados, segundo anunciou esta mañá o presidente da Generalitat Pere Aragonès tras unha reunión cos alcaldes.

Dúas turistas alemás morreron afogadas en Manacor, en Mallorca, cando nadaban no medio dunha forte ondada. 

Na Comunidade de Madrid viviuse unha noite máis tranquila tras as tormentas da anterior, que deixaron inundacións en vivendas e liñas do Metro.