Os Estados Unidos alcanzaron este mércores as cifras de 3.046.351 casos confirmados de COVID-19 e de 132.095 falecidos, de acordo co reconto independente da Universidade Johns Hopkins.

Este balance, ás 20:00 hora local (00:00 GMT do xoves), supón 55.000 contaxios máis que o martes e 733 novas mortes.

A cifra de novos  contaxios segue por encima dos 50.000 arrastrada polos brotes en estados do sur e do oeste como Florida, Texas, California, Arizona e Xeorxia.

México marca con 6.995 casos un novo récord diario de contaxios

México rexistrou este mércores 6.995 novos contaxios de covid-19 para alcanzar un novo récord de casos diarios, cos que xa acumula 275.003 infectados desde o inicio da pandemia, informaron as súas autoridades sanitarias.

Os 6.995 casos confirmados nas últimas 24 horas son a maior cifra para un día desde os 6.914  contagios do pasado 4 de xullo.

De acordo cos datos do informe diario da COVID-19, os casos novos deste xoves supoñen un incremento do 2,7 % respecto aos 268.008 casos do martes.

Nas últimas 24 horas, as autoridades sanitarias de México reportaron 782 mortes pola covid-19, coas que o país chega a 32.796. Iso supón un incremento do 2,4 % sobre as 32.014 contabilizadas ata a véspera.

O Brasil supera os 1,7 millóns de casos e roza as 68.000 mortes

O Brasil excedeu este mércores os 1,7 millóns de casos de COVID-19 tras rexistrar 44.571 contaxios nas últimas 24 horas, mentres que o número de mortos chegou aos 67.964, informou o Goberno do presidente Jair Bolsonaro, quen a véspera deu positivo.

O Brasil, o segundo país máis afectado do mundo polo novo coronavirus, por detrás dos Estados Unidos, sumou 1.223 mortos desde o mércores, mentres que outros 4.105 decesos están baixo investigación, de acordo co balance diario do Ministerio de Saúde.

No departamento destacan que os datos dos últimos días reflicten unha subida na curva de casos confirmados e unha estabilización na curva de mortes polo novo coronavirus.

Desde que se rexistrou o primeiro caso no Brasil, a finais de febreiro, máis dun millón de persoas recuperáronse da enfermidade.

Colombia suma outros 4.144 casos e acumula 128.638 contaxios

Colombia sumou este mércores 4.144 novos casos de COVID-19 e chegou a 128.638 contaxios, mentres que 168 persoas faleceron e xa son 4.527 os decesos pola pandemia que causa estragos en Bogotá e nos departamentos da costa atlántica, informou o Ministerio de Saúde.

Ante o crecemento da pandemia o presidente colombiano, Iván Duque, anunciou o martes a prolongación ata o 1 de agosto da corentena contra o coronavirus, que terminaba o 15 deste mes, e mantivo as 43 excepcións para reactivar a economía.

A Arxentina rexistra 3.604 novos casos e as mortes chegan a 1.694

A Arxentina rexistrou este mércores 3.604 novos casos do coronavirus SARS-CoV-2, o maior dato diario de contaxios dado a coñecer ata o de agora no país, que elevan a 87.030 o número total de casos.

O informe diario vespertino que difunde o Ministerio de Saúde arxentino precisou ademais que nas últimas horas se confirmaron 40 novas mortes por covid-19, e con iso a cifra total de falecementos elevouse a 1.694.

Os decesos reportados corresponden a 23 homes e 17 mulleres con idades que van dos 25 aos 97 anos, residentes da capital do país e das provincias de Bos Aires.

A pandemia disparará pobreza e desigualdade en Latinoamérica, avisa a ONU

A pandemia do coronavirus vai disparar a pobreza e as desigualdades en América Latina e o Caribe, segundo advertiu este xoves a ONU, que reclamou aos Gobernos da rexión e á comunidade internacional un apoio decidido ás persoas máis vulnerables.

Nun informe, o secretario xeral da organización, António Guterres, lembrou que Latinoamérica se converteu nun dos epicentros da COVID-19, con varios países que teñen algunhas das maiores taxas de contaxio per cápita en todo o mundo.

A crise do coronavirus chegou ademais á rexión nun momento especialmente complicado, pois esta xa viña de anos de dificultades económicas, cun crecemento moi débil e lastrada, entre outras cousas, por un grave problema de desigualdade.

A ONU espera que o Produto Interior Bruto de Latinoamérica e o Caribe se contraia este ano un 9,1 %, no que será a “maior recesión económica en 100 anos”.

Desde o punto de vista social, iso vaise a traducir nun claro aumento da pobreza, segundo subliñou a secretaria executiva da CEPAL, Alicia Bárcena, nun encontro virtual con xornalistas. Prevese que 45 millóns de persoas caian este ano na pobreza, para un total de 230 millóns na rexión.

Mentres, ata 28 millóns de persoas máis quedarán en situación de extrema pobreza, e con iso o total chegará aos 96 millóns. Estes son cidadáns que non poderán sequera cubrir as súas necesidades alimentarias básicas, segundo Bárcena.

A pobreza, destacou ademais, ten “rostro de muller” e afecta de forma desproporcionada aos pobos indíxenas e afrodescendentes. Tamén disparará a vulnerabilidade de migrantes e refuxiados, avisa a ONU.