O aumento imparable dos contaxios continúa na Mariña lucense. En Burela, a incidencia acumulada dispárase ata acadar xa os 1.600 casos por cada 100.000 habitantes.

"Estase complicando bastante porque desta vez é explosiva, cada día que pasa increméntase unha barbaridade", sinala o alcalde de Burela Alfredo Llano.

A vila acolle un cribado entre mozos de 18 a 30 anos para tentar detectar asintomáticos.

"Como están aumentando os contaxios, veño por prevención". "Eu son educadora infantil e vin oportuno vir".

Fan un chamamento á participación porque aos cribados da fin de semana nos concellos veciños só acudiu o 45 % dos convocados.

"Eu non estou de acordo. Se nos citan, temos que vir todos porque se non non facemos nada".

Nos cribados de Foz, Viveiro e Ribadeo detectáronse máis de 40 positivos, por iso moitos acoden ás probas, que achegan máis tranquilidade.

"Aquí hai moita xente que vive cos avós e moita xente ten medo por iso".

A PCR tamén lles serve aos non vacinados para acceder á hostalería, dado que cinco concellos da comarca están en nivel alto.

"Para entrar nos locais hai que ter unha PCR negativa ou o certificado de vacinación e eu non teño nada entón tamén por iso". "A min cólleme a franxa que non teño vacina e para entrar dentro necesito unha PCR negativa".

O concello que máis positivos suma é o de Viveiro, con 230 casos activos, sobrepasando o que era o seu maior número de contaxios da pandemia.