A Axencia Europea do Medicamento (EMA) confirmou este martes que os seus expertos se reunirán o próximo 11 de marzo para tratar de chegar a unha conclusión sobre a seguridade, eficacia e calidade da vacina da covid-19 desenvolvida por Janssen, a filial belga da farmacéutica estadounidense Johnson & Johnson.

O comité de medicamentos humanos ( CHMP) ten convocada a próxima semana unha reunión extraordinaria na que prevé terminar a súa revisión continua deste antídoto antes de dar luz verde á Comisión Europea para que poida emitir unha licenza de uso condicional desta vacina, que, de considerarse segura e eficaz, sería a cuarta en obter autorización na Unión Europea (UE).

Farase “sempre que os datos sobre a calidade, seguridade e eficacia da vacina sexan o suficientemente sólidos e completos, e que calquera información adicional necesaria para completar a avaliación se envíe con celeridade”, asegurou a EMA nunha breve mensaxe.

A farmacéutica Janssen solicitou o 16 de febreiro á EMA que estude a posibilidade de que a súa vacina obteña unha licenza de uso condicional despois de que este regulador europeo dera xa luz verde ás de Pfizer/ BioNTech (21 de decembro), Moderna (6 de xaneiro) e AstraZeneca (29 de xaneiro), que xa se usan nas campañas de vacinación da UE.

Estas farmacéuticas, como ocorrerá con Janssen se consegue pasar o escrutinio da EMA, comprometéronse a seguir analizando durante os próximos anos os datos dos ensaios clínicos que levaron a cabo e a vixiar as campañas de vacinación nos diferentes países europeos para detectar calquera efecto secundario novo.

O pasado 1 de decembro, o CHMP comezou o que se coñece como unha "revisión continua" do fármaco de Janssen, unha ferramenta que permite analizar os datos de laboratorio e os clínicos a medida que vaian estando dispoñibles: os ingredientes, o proceso de produción, os ensaios en animais e a información preliminar dos ensaios en persoas.

Durante esa fase, a EMA tamén avaliou os datos da calidade e os de estudos de laboratorio para determinar como funciona a vacina á hora de desencadear a produción de anticorpos e células inmunes que atacan o virus, así como os datos de seguridade clínica sobre o vector viral do fármaco.

Nestes momentos, o CHMP tamén está a avaliar en tempo real as vacinas da covid-19 do laboratorio alemán CureVac e estadounidense Novavax, aínda que ningunha das dúas solicitou aínda unha licenza de uso condicional e non hai data para que poidan presentar a solicitude.