CRTVG

Buscar

A autopsia non desvela a causa pola que morreu un ciclista este domingo en Narón

Publicado o 03/02/2020 20:45

As pescudas en relación coa morte dun ciclista no lugar da Mata, parroquia de Castro, en Narón, descartan que houbese algún outro vehículo implicado no suceso. O home apareceu tirado neste punto onda unha bicicleta que tiña a roda dianteira fóra da forquita. Era veciño do concello de Neda, concretamente do lugar de Munchiqueira, tiña sesenta e seis anos e rexentara ata hai un ano un negocio de hostalería na zona.

Un matrimonio que pasaba nun coche viu un casco de ciclista no asfalto e decatouse de que home estaba no chan. Polo visto nas pegadas sobre a parede e polo que din no lugar, o máis probable é que o ciclista estivese baixando en dirección a Meirás e, ao chegar á curva, fose dereito contra o lateral da casa.

Os primeiros resultados da autopsia non permitiron acalarar a causa do seu falecemento, que puido ser por causas naturais ou polo forte traumatismo na cabeza. Agora, será a Unidade Central de Análises Científicas en Madrid a que terá que elaborar un informe definitivo para clarificar esta morte.

Os seus restos mortais serán soterrados este martes no cemiterio parrroquial de San Pedro de Anca, en Neda.

 

Envía o teu comentario!
Para poder comentar esta entrada debes estar rexistrado.
Introduce o teu usuario e contrasinal aquí