A Audiencia Provincial de Madrid confirmou a decisión dun xulgado madrileño de arquivar o caso coñecido como Delcygate, en que se investigaba a estancia da vicepresidenta de Venezuela, Delcy Rodríguez, no aeroporto Adolfo Suárez Madrid-Baraxas o 20 de xaneiro de 2020.

Así o acorda a Audiencia nun auto en que desestima a solicitude de Vox de seguir investigando o caso tras o sobresemento provisional das actuacións ordenado polo Xulgado de Instrución número 31 de Madrid o pasado 9 de novembro, ao entender que "non se dá a conduta prevaricadora nin doutro carácter delituoso" nos feitos pescudados.

O xulgado arquivou a causa ao considerar que aínda que Delcy Rodríguez tiña prohibida pola Unión Europea a entrada no espazo Schengen, a zona de tránsito internacional dun aeroporto español non é territorio nacional.