Sanidade confirma 491 mortos e máis de 11.000 contaxios en España
• España xa é o cuarto país con máis contaxios en todo o mudo
España xa é o cuarto país do mundo con máis persoas contaxiadas polo coronavirus, con máis de 11.000 contaxiados e case 2.000 casos novos en 24 horas. A cifra de mortos rexistrada é de 491 persoas.
Fernando Simón informou de que o dato é "algo menor ao destes días pasados, pero hai que avalialo con coidado".
Do total de casos, 1.028 foron dados de alta e 563 están na UCI.
Estes son os últimos datos oficiais facilitados polo Ministerior de Sanidade que confirma 491 mortos e máis de 11.000 contaxios en España#Coidémonos #EstamosXuntosNisto
— G24 (@G24Noticias) March 17, 2020
https://t.co/SxbUpSWeV5 pic.twitter.com/tWJiqQJkQf
Os datos facilitados polo Ministerio de Sanidade cifran en 292 os casos rexistrados en Galicia, onde faleceron tres persoas. Aquí, nove dos contaxiados están na UCI.
A distribución por comunidades autónomas non cambiou "substancialmente", aínda que Madrid segue sendo a máis afectada, con 4.871 casos.
Con todo, xa non representa máis do 50 % de todos os casos detectados, senón o 43 %, xa que as demais comunidades "van aumentando a transmisión progresivamente", dixo Simón.
Cataluña é a segunda comunidade con máis casos (1.394) e xunto con Madrid representan o 56 % do total. Séguena o País Vasco (765), Andalucía (683), Castela-A Mancha (567), Castela e León (541), A Rioxa (355) e Navarra (333).
En Madrid, a distribución dos casos polos niveis de gravidade son "un pouco diferentes ao resto", xa que un 76 % están hospitalizados, un 7 % están en UCI e a letalidade alcanzou o 7%, aínda que a porcentaxe de curados é maior (19 %).
Iso débese, segundo Simón, a que durante o primeiro período da epidemia os andazos asociáronse a grupos de alto risco, polo que os ingresos en UCI e de falecementos "esperábase que fosen máis altos, como así foi".
Dos 11.178 casos confirmados, actualmente hai activos se se restan as altas e os falecementos, un total de 9.659 casos.
Progresivamente estase observando que o incremento diario retárdase un pouquiño aínda que hai que tomar este dato "con moitísimo coidado porque houbo pequenas modificacións na definicion de caso que podían explicalo", segundo Simón.