Son as cifras de sinistralidade máis baixas desde que hai rexistros. 870 persoas faleceron nas estradas españolas en 2020, un 21 por cento menos que o ano anterior. A redución foi practicamente idéntica no número de feridos graves. A razón fundamental atopámola na forte caida dos desprazamentos, un 25 % menos.

"É, sobre todo, consecuencia da crise sanitaria e das restricións á mobilidade", explicou Fernando Grande-Marlaska, ministro do Interior.

A pandemia mellorou os malos datos cos que comezara o ano, xa que entre xaneiro e o 14 de marzo, antes da declaración do estado de alarma, os falecidos aumentaran un 8 %. A pesar da redución histórica da sinistralidade, hai un indice que sí repunta: o número de vítimas que non levaba posto o cinto de seguridade.

"Son o 26 % do total de falecidos os que non empregaban o cinto de seguridade, 4 puntos por riba do que sucedía en 2019", dixo Grande-Marlaska

2020 despediuse cun balance de 59 días sen ningún falecido nas estradas. O 2021 traerá novidades na circulación: a partir de maio, limitarase a 30 quilómetros por hora a velocidade en vías urbanas dun único carril.