No Grove viven máis de 10.000 persoas que non poden saír do concello sen causa xustificada. Coa hostalería pechada quédalles pasear sós ou cos conviventes a carón do mar. A incidencia da covid disparouse moi por riba do risco extremo. A explosión de contaxios foi anterior á Semana Santa e a chegada de visitantes. E está vinculada, explica o alcalde, a gromos por reunións familiares e de amigos en espazos privados.

 "Solicito moita responsabilidade aos veciños e veciñas porque esa confianza no ámbito familiar é o que está producindo os diferentes gromos e que nos está levando a este peche colectivo que afecta toda a vila do Grove", dixo o alcalde do Grove, José Antonio Cacabelos.

Outros concellos das Rías Baixas miran con temor o que pasou na Pobra e no Grove. É o caso da Illa de Aousa que xa entrou este xoves en nivel alto de restricións. Tamén aquí a hostalería e os seus provedores levan economicamente a peor parte. Contaban coa repunta turística e non da covid.

 "Traballouse ben. Metemos catro empregadas máis e esta fin de semana iámolas volver meter, pero ao quedar só coa terraza...", explica resignada Carmen Outeda, dun coñecido restaurante da Illa de Arousa.

E é ainda moi cedo para saber se o aumento da mobilidade da semana pasada ten ou non consecuencias na pandemia.

 "Hai que esperar ata o martes para se ese efecto dos festivos de Semana Santa se ve reflectido dalgúns xeito. Imos ser prudentes e agardar ao martes", asegurou o conselleiro de Sanidade, Julio García Comesaña nunha entrevista na Radio Galega

De momento os principais indicadores da covid manteñen a Galicia nunha boa situación epidemiolóxica.