Kiko Novoa entrevista no Galicia por diante a Ana San Martín e Sergio Zearreta, protagonistas do musical Galicia caníbal que recrea a historia da movida viguesa dos anos oitenta.

Pola testemuña dos protagonistas e con entrevistas a expertos, conversas cos veciños e consultas nos arquivos históricos, vemos cales son as razóns e como se viven rivalidades históricas. No primeiro programa Corme e Laxe son os protagonistas.

Fenómeno editorial con máis dunha década ás súas costas, despois de douscentos títulos publicados e case un millón de exemplares distribuídos, esta familia de monicreques creada por Pepe Carreiro salta dos libros á TV da man da canle autonómica galega.

O deporte galego triunfou nos Xogos Olímpicos de Londres. Á capital británica viaxaron once deportistas galegos de elite e cinco deles volveron con medalla: David Cal, Xavier Gómez Noya, Tamara Echegoyen, Sofía Toro e Begoña Fernández.

Programa estival de entretemento, con reportaxes divertidas e refrescantes, enquisas na rúa, ou clases de baile ao aire libre, seguimento dos turistas que estan de vacacións en Galicia, e un "croma" a disposición de quen queira falar.

Documental, en dúas entregas, sobre Valentín Paz Andrade. Representantes do mundo cultural analizan a personalidade do intelectual galeguista, a quen a Real Academia Galega lle dedica o Día das Letras en 2012. 

Unha ventá aberta ao mundo das artes e das letras. As palabras e o pensamento serven de unión con distintos territorios artísticos. Nun tono intimista o presentador entrevista a persoeiros da vida artística, literaria e intelectual.

O mundo das relacións infantís desde a perspectiva duns animais de xardín. Serie dirixida a nenos e nenas de entre 2 e 4 anos de idade, baseada nas historias dunha serie de álbums escritos por Armando Quintero e ilustrados por André Letria.

Programa de música, onde os protagonistas son os grupos e as salas pertencentes á Rede Galega de Música ao Vivo. Semana a semana, o espectador descubrirá en cada recuncho de Galicia os proxectos e grupos musicais galegos que están emerxendo.

A historia afectiva e social de dúas poboacións galegas con moito que contar. A través dun percorrido polos seus habitantes, costumes e peculiaridades, vemos lugares especiais, o seu modo de vida, as súas iniciativas orixinais e tamén as historias máis persoais.

A parella humorística Mucha e Nucha, as Cantareiras de Ardebullo, vive e comparte con todos os galegos estas festas do Nadal. Namentres están traballando na limpeza das instalacións da TVG terán que encargarse de todas as emisións durante toda unha noite.

Programa de humor  que conta con sketchs, tanto no estudio coma en exteriores, convidados famosos que amosarán a súa vertente máis artística, actuacións en directo de grupos musicais e da propia banda do espazo, parodias, comedias de situación...

Historias moi próximas á realidade galega, con boa dose de entretemento, combinado co humor. O espazo discorre por toda Galicia na busca das vacas máis falangueiras, que son capaces de dicir o que ás veces os humanos non se atreven.

O palpitante e conmovedor mundo da emigración, desde a óptica dos emigrantes galegos que puideron volver á casa despois de toda unha vida fóra. Tamén é o retrato da peripecia vital de todos aqueles que viaxan polo mundo con Galicia como meta.

Viaxe sentimental, fetichista e divertida para coñecer as historias de mitos musicais galegos como Pucho Boedo, Juan Pardo, Julio Iglesias, Ana Kiro, Andrés Dobarro e Luz Casal, a través dos testemuños dos que compartiron a vida con eles.

Un grupo fixo de cinco persoas moi coñecidas pola audiencia, percorrerá toda Galicia na busca de experiencias únicas. É un desafío onde se compartan emocións, sorpresas, solidariedade e moita diversión.

Obra producida e emitida co gallo do centenario do nacemento do poeta celanovés Celso Emilio Ferreiro, este traballo inclúe conversas cos seus fillos, os seus biógrafos, amigos e escritores. E os seus poemas aparecen musicados nos máis diversos estilos.

Concurso diario no que compiten cinco concursantes: O mellor e o equipo de catro. O programa ten catro fases eliminatorias e unha pregunta final para adiviñar a cantidade de cartos que leva o gañador, que terá a posibilidade de concursar a semana seguinte.

Programa especial coa retrasmisión en directo da ofrenda ao Apóstolo que se realiza cada ano o 30 de decembro na Catedral de Santiago de Compostela.

As festas de Galicia son as protagonistas da man das reporteiras Sara López, Paula Señarís e Alicia Lombán. Os espectadores teñen a oportunidade de coñecer de preto e ser tamén protagonistas das celebracións e festas espalladas por todo o país.