Santiago, 07.09.2023.-    A serie ‘Motel Valkirias’ de Televisión de Galicia segue a recoller recoñecementos internacionais desta volta por partida dobre. A coprodución de CRTVG e RTP, mais CTV e SPi, foi dobremente nominada esta semana.

A produción galega é finalista como 'mellor serie de ficción de fala non inglesa' nos premios Content Innovation Awards de TBImagazine asociados ao festival MIPCOM de Cannes, a maior feira de contido audiovisual de Europa e onde se darán a coñecer os vencedores deste ano.

Á súa vez, a serie da Galega tamén acaba de recibir a súa candidatura como 'mellor serie dramática de ficción' nos Produ Awards, que se resolverán dentro do MIP Cancún, a principal cita audiovisual do mercado latino que se celebra no continente americano.

Estas nominacións súmanse á recibida por ‘Motel Valkirias’ aos XXVII Globos de Ouro portugueses, na categoría de mellor proxecto de ficción. Ademais, a serie logrou xa un galardón internacional neste 2023, o Premio CIRCOM, da asociación das televisións rexionais europeas, no apartado de entretemento e ficción.

Por outra parte, a serie infantil ‘Os Argonautas e a Moeda de Ouro’, unha produción da galega Portocabo, apoiada por TVG, é candidata a obter o galardón na categoría de ‘Best Live Action Kids Drama’ tamén nos Content Innovation Awards do MIPCOM.  ‘Os Argonautas e a Moeda de Ouro’  estrearase na Televisión de Galicia esta temporada.