CRTVG

Buscar

CRTVG Viva

Fútbol e baloncesto son protagonistas do 'Galicia en goles' esta fin de semana na Radio Galega

17/01/2020

Atenderase aos partidos dos clubs galegos de fútbol en 2ª, 2ª B e Terceira División, e ofreceranse os encontros do COB, Breogán e Marín na LEB Ouro de baloncesto  

Fútbol e baloncesto son protagonistas do 'Galicia en goles' esta fin de semana na Radio Galega

Santiago, 17.01.2020.- O sábado, desde as tres, Xoán Galán conduce as retransmisións do Lugo-Albacete, na Segunda División, do Fabril-Choco, de Terceira, e dos tres partidos na LEB Ouro de baloncesto: COB Ourense-Almansa, Breogán-Castelló e Marín-Valladolid. Ademais, o Liceo-Saint Omar, da Euroliga de hóckey a patíns, completa a oferta do día.

O domingo, ás doce, a edición matinal estará centrada no Andorra-Obradoiro, da Liga ACB de baloncesto. No fútbol destacan catro encontros: Melilla-Celta B, Inter-Coruxo, Silva-Somozas e Polvorín-Arousa. Desde as tres, a atención estará posta no Deportivo-Cádiz, de Segunda, e logo no Athlétic de Bilbao-Celta, de Primeira. Na Segunda B hai derbi entre o Rácing de Ferrol-Pontevedra, mentres na Terceira xogaranse sete partidos. O Deportivo-Betis, da Primeira feminina, será outro dos directos do programa.

Ao remate do xogo, adestradores e xornalistas debaterán primeiro no Faladoiro de 'Galicia en goles', ata as once da noite, e na última hora día en 'Ao contraataque’. As dúas emisións poden seguirse por streaming no Mira RG, a través da web da Radio Galega e da aplicación para o móbil.

O sábado, os amantes do deporte teñen outras opcións para estar ao tanto do que pasa no deporte galego. Á unha da tarde reúne no 'Convivir deportivo' á familia do Río Sar de Trazo, un club especializado na disciplina de tiro. Ás once da noite, Rodrigo Pérez informa da última hora do motor no 'Gas a fondo'. E ás once e media, Toni López continúa dando voz aos galegos que aspiran a competir nos Xogos de Toquio.

ler máis

O programa 'A miña familia pola túa' da TVG tivo a súa posta de longo en Compostela

16/01/2020

O acto contou coa presenza do equipo do programa e das familias participantes, así como de presentadores e facianas coñecidas da Galega

En cada entrega desta divertida proposta, as nais de dúas familias opostas intercámbianse de fogar durante unha semana de convivencia

 

O programa 'A miña familia pola túa' da TVG tivo a súa posta de longo en Compostela

Santiago, 16.01.2020.-  O Auditorio Centro Obra Social Abanca de Santiago de Compostela acolleu hoxe a presentación do novo programa da Televisión de Galicia para a noite dos mércores, 'A miña familia pola túa'. O equipo desta nova proposta de entretemento da Galega e numerosos rostros coñecidos da TVG déronse cita esta tarde nun evento ao que tamén asistiron os membros das 16 familias participantes. Tras esta posta de longo, xa non queda nada para que os espectadores da Galega poidan ver a primeira entrega a próxima semana.

ler máis

Juande Mellado, director xeral de Canal Sur, novo presidente de FORTA

16/01/2020
Juande Mellado, director xeral de Canal Sur, novo presidente de FORTA

Santiago, 16.01.2020.- A Federación de Organismos de Radio e Televisión Autonómicos (FORTA) nomeou este xoves novo presidente da organización o director xeral de Radio e Televisión de Andalucía (Canal SUR - RTVA), Juande Mellado, que sucede no cargo a Núria Llorach (CCMA), que estivo á fronte de FORTA os últimos seis meses.

Juande Mellado (Madrid, 1970) é licenciado en Ciencias da Información pola Universidade de Navarra e traballou entre 1990 e 1996 en 'Diario 16' de Málaga. Foi tamén correspondente de 'Cambio 16' en Andalucía oriental e enviado especial á guerra de Ruanda no ano 1994. Profesor de xornalismo especializado en EADE Málaga (1997-1999), ocupou o cargo de redactor xefe e subdirector do xornal 'La Opinión de Málaga' desde 1999 a 2008, e foi director de Comunicación da Consellería de Turismo da Junta de Andalucía entre 2008 a 2010. En febreiro dese ano asumiu a dirección de 'La Opinión de Málaga', onde impulsou a súa transformación dixital. Tamén foi socio fundador da consultora Comunicación&Turismo, onde xestionou a comunicación da Universidade de Málaga e o porto de Málaga.

En maio de 2018, incorporouse como coordinador de Comunicación e Estratexia de Marca de Turismo e Planificación Costa del Sol e, no 2019, foi director xeral de Comunicación Social da Junta de Andalucía ata a súa elección como director xeral de Canal Sur, en xullo dese ano.

ler máis

O espazo de misterio ‘Milenio’ fala hoxe de aparicións e dun ovni estrelado en Galicia

16/01/2020

Conta cos testemuños de persoas que viron un ser querido falecido que regresaba para despedirse e cun expediente militar sobre un ovni avistado en Ferrol

O espazo de misterio ‘Milenio’ fala hoxe de aparicións e dun ovni estrelado en Galicia

Santiago, 16.01.2020.- O programa 'Milenio' (00.45 h), dedicado aos amantes do insólito, os misterios e os fenómenos paranormais, regresa esta noite á Televisión de Galicia con dúas novas reportaxes relacionadas con casos estraños acontecidos en Galicia, cos testemuños dos seus protagonistas e de expertos.

ler máis

O humorista Secun de la Rosa e a presentadora Loly Gómez nin imaxinan o que os agarda no 'Land Rober Tunai Show'

16/01/2020

O cómico meterase na pel de Kiko Rivera para descubrir que lle pasou ao fillo da Pantoja en Padrón

O humorista Secun de la Rosa e a presentadora Loly Gómez nin imaxinan o que os agarda no 'Land Rober Tunai Show'

Santiago, 16.01.2020.-  Este xoves as risas están aseguradas coa visita do humorista Secun de la Rosa! O ‘Land Rober Tunai Show’ (22.15 h), con Roberto Vilar á fronte, volverá facer das súas, xa que o cómico vai meterse na pel de Kiko Rivera para botar luz sobre o que lle pasou en Padrón ao fillo da Pantoja.

ler máis

Televisión de Galicia presenta este xoves en Santiago o novo programa 'A miña familia pola túa'

16/01/2020

Familias de toda Galicia participan neste formato, en que cada semana dúas nais intercambian as súas vidas entre si

O acto contará coa asistencia dos propios protagonistas, as familias participantes, e caras coñecidas da Galega

Televisión de Galicia presenta este xoves en Santiago o novo programa 'A miña familia pola túa'

Santiago, 16.01.2020.-  A TVG presenta hoxe en Compostela o programa, ‘A miña familia pola túa’, unha divertida proposta en que dúas nais, de familias opostas, intercámbianse de fogar durante unha semana de convivencia. Imaxinas que dun día para outro che cambien a túa nai e teñas que obedecer a outra persoa? Neste espazo, as familias elixidas viven unha aventura que non as deixara indiferentes. Haberá risas, pero tamén tensión; haberá emoción, pero tamén algún que outro desgusto. E é que cando alguén de fóra entra nunha familia como membro novo, pode pasar de todo.

Este éxito mundial, adaptado a máis de 20 países e producido por Dlo/Magnolia e La Región para a TVG, estrearase no ‘prime time’ da Galega a próxima semana. Ao acto, en que se poderá ver unha selección dos mellores momentos das familias participantes, asistirán os propios protagonistas, o equipo do programa e caras coñecidas da Galega.

Durante a semana de intercambio, cada novo membro deberá adaptarse ao estilo de vida e á rutina diaria da súa nova familia. Unha vez completada a experiencia, ambas familias reúnense e enfrontan as experiencias aprendidas.

ler máis

Visita da tripulación do patrulleiro Cabo Fradera, da Comandancia Naval do Miño, á CRTVG

15/01/2020

Ademais de percorrer as instalacións da Radio Galega e a Televisión de Galicia, este grupo da Armada Española puido ver como se fai en directo o programa ‘A Revista’

Visita da tripulación do patrulleiro Cabo Fradera, da Comandancia Naval do Miño, á CRTVG

Santiago, 15.01.2020.-  Membros da Comandancia Naval do Miño, entre eles a tripulación do patrulleiro Cabo Fradera, visitaron este mércores a sede da CRTVG, acompañados polo comandante do patrulleiro, Roberto Casal del Río, e o capitán de corveta, comandante naval do Miño e presidente da Delegación Española da CPIRM, Juan Díaz Rodríguez.

Ademais dunha visita pola Radio Galega e as instalacións da Televisión de Galicia, onde foron guiados polo director de Proxección Social da Corporación, Xaime Arias, este grupo da Armada Española coñeceu un dos estudios da canle pública. Alí puideron ver como se fai en directo o programa ‘A Revista’ e coñecer de primeira man como se traballa neste magazine de televisión, presentado por Loly Gómez.

O patrulleiro Cabo Fradera é un dos buques de acción marítima con base en Tui (Pontevedra) e patrulla nas augas do río Miño con labores de vixilancia e rescate.

ler máis

A web da CRTVG emite este mércores, en directo, o Rácing de Ferrol-San Sebastián de los Reyes

15/01/2020

O partido poderase ver en crtvg.gal, a partir das 20:00 horas

Ambos conxuntos levan dúas xornadas consecutivas sen ver a vitoria

A web da CRTVG emite este mércores, en directo, o Rácing de Ferrol-San Sebastián de los Reyes

Santiago, 15.01.2020.-  Este mércores, a web da CRTVG emite o encontro en que o Rácing de Ferrol recibe o San Sebastián de los Reyes na Malata, partido correspondente á xornada 20 da Segunda División B de fútbol. 

ler máis

Da man de 'Pasaporte galego. Un dos nosos', os espectadores da TVG achegaranse esta noite á vida de Luís Tosar, un dos actores máis prezados

15/01/2020

Entrevistado por Isabel Blanco, a súa compañeira no elenco da serie ‘Mareas Vivas’, falará dos seus inicios, da relación coa súa familia, da evolución da súa carreira e de como fixo para manter os vínculos coas súas raíces

Da man de 'Pasaporte galego. Un dos nosos', os espectadores da TVG achegaranse esta noite á vida de Luís Tosar, un dos actores máis prezados

Santiago, 15.01.2020.-  Televisión de Galicia ofrece este mércores unha edición especial do espazo ‘Pasaporte Galego’, que, da man de Isabel Blanco, amosa historias de galegos na diáspora descoñecidos para o gran público. Nesta ocasión, o programa será unha fiestra aberta a personaxes queridos e admirados en Galicia, ben porque medraron na TVG, ben porque as súas carreiras foron seguidas por todos, como se se tratase dun máis da familia, polo que acabaron converténdose en ‘Un dos nosos’.

Neste programa especial, titulado ‘Pasaporte Galego. Un dos nosos’ (22.30 h), o protagonista será Luís Tosar, un dos actores máis prezados e un dos expoñentes máis representativos da galeguidade dentro e fóra de Galicia. Cando fixo 20 anos de ‘Mareas Vivas’, a súa compañeira no elenco desta serie histórica da TVG proporalles aos espectadores achegarse á súa vida de hoxe para saber por onde levou a súa carreira e como mantivo os vínculos coas súas raíces e para coñecer como manifesta a súa galeguidade en todo canto fai. A proximidade que ofrece a amizade de vello entre os dous actores permitirá coñecelo dun xeito moi diferente ao dunha entrevista convencional.

Neste percorrido nunca realizado en televisión, amosarase como foron os inicios de Luís Tosar en Lugo, como era a vida en Xustás cos seus pais e como foi medrando de xeito autodidacta ata ser hoxe un dos actores máis respectados e queridos en España. A audiencia tamén verá como é Tosar como pai, como concilia a súa vida artística coas súas obrigas familiares, como leva na distancia a súa relacións cos seus pais e como fai para compatibilizar rodaxes, estreas e promocións.

ler máis

A serie da TVG 'O sabor das margaridas', galardoada co Premio da Cultura Galega

14/01/2020

Este recoñecemento, na categoría audiovisual, entregouse no transcurso dunha gala celebrada en Vigo

A serie da TVG 'O sabor das margaridas', galardoada co Premio da Cultura Galega

Santiago, 14.01.2020.-  A serie da TVG 'O sabor das margaridas', a primeira ficción integramente en galego incluída no catálogo de Netflix, acaba de recibir o Premio da Cultura Galega no apartado audiovisual no transcurso dunha gala celebrada no Teatro Afundación de Vigo. Estes galardóns, concedidos pola Xunta de Galicia, recoñecen a excelencia creativa, a capacidade de intercambio, a experimentación e a proxección da construción cultural de Galicia nos diferentes ámbitos. Por parte da CRTVG, o evento contou coa presenza de Rosa Vilas, adxunta á Dirección Xeral.

ler máis