CRTVG

Buscar

CRTVG Viva

A TVG e G2 pechan o mellor mes de outubro desde 2013

01/11/2022

A audiencia da Galega sobe case un punto respecto do mes pasado, situándose no 10,7 %. Os informativos da TVG acadan a cota máis alta e chegan a máis de un millón e medio de galegos maiores de 4 anos.

 

 

A TVG e G2 pechan o mellor mes de outubro desde 2013

Santiago, 01.11.2022.-       A audiencia da TVG segue a medrar neste final de ano acadando marcas históricas. Este mes de outubro foi o mellor desde o 2013 cun 10,7 % de cota de pantalla no conxunto do día. O informe mensual do medidor independente Kantar Media sinala a traxectoria ascendente da audiencia da canle galega por terceiro mes consecutivo e que supera a do mes de setembro en case un punto.

ler máis

A Televisión de Galicia producirá 27 proxectos nativos dixitais

31/10/2022

É a maior convocatoria ata a data desta clase de contidos. Danza, maxia, humor, concienciación medio ambiental ou a loita contra o idadismo son algúns dos enfoques destes proxectos



A Televisión de Galicia producirá 27 proxectos nativos dixitais

Santiago, 28.10.2022.-      A CRTVG vai producir 27 proxectos no marco da convocatoria de selección de produtos dixitais en lingua galega, resolta pola Comisión Directiva de Avaliación de Proxectos da Corporación.

Entre os seleccionados hai contidos de ficción, humor, divulgación, educación, cultura ou infotainment. Doce deles responden ao formato longo e para cuxa produción contarán con 20.000 euros cada un. Outros 19 foron seleccionados como microespazos e están dotados con 3.000 euros por proxecto. Todos eles teñen en común que están creados especificamente desde e para a contorna dixital, xa que os 27 proxectos serán emitidos a través das canles dixitais, páxina web e redes sociais dos medios públicos galegos.

Esta convocatoria, á que se presentaron 106 traballos, enmárcase na estratexia de dixitalización, innovación e posicionamento dos medios públicos na contorna dixital e a súa relación co sector audiovisual. Este proxecto ten o obxectivo de promover a creatividade neste eido e procurar xeitos de produción de contidos multiplataforma e transmedia en lingua galega, que permitan novas formas de interacción coa audiencia, e dean cabida nos medios públicos a expresións artísticas netamente dixitais.

Na categoría de pezas de vídeo cunha duración máxima total de 50 minutos, aprobáronse os seguintes 12 proxectos:

ler máis

O novo programa da TVG 'Galicia de 20 a 20' seguirá cada sábado as pegadas de Ruth Matilda Anderson para conectar o pasado co presente

28/10/2022

Nos anos 20 do século pasado, a fotógrafa americana percorreu toda Galicia e capturou preto de 7.000 imaxes fundamentais para entender quen somos

Na primeira etapa desta viaxe, a actriz Sonia Méndez e a fotógrafa Leticia T. Blanco buscarán a súa pegada no itinerario entre Vigo e Ponteareas

 

O novo programa da TVG 'Galicia de 20 a 20' seguirá cada sábado as pegadas de Ruth Matilda Anderson para conectar o pasado co presente

Santiago, 28.10.2022.-     Co novo programa ‘Galicia de 20 a 20’, a TVG seguirá a partir deste sábado, ás 19.15 h, os pasos de Ruth Matilda Anderson, a fotógrafa americana que nos anos 20 do século pasado percorreu toda Galicia e capturou preto de 7.000 imaxes fundamentais para entender quen somos. Cen anos despois, a actriz e directora Sonia Méndez, xunto coa fotógrafa Leticia T. Blanco, viaxarán pola Galicia dos nosos anos 20 para mirarse no espello da cámara de Ruth Matilda.

Trátase dun itinerario de dez etapas por toda a xeografía galega en que irán actualizando as imaxes da fotógrafa americana. Así, polo programa pasarán descendentes de persoas retratadas por Ruth, artesáns que continúan con oficios tradicionais, pero tamén xente moza que lle dá unha nova vida a estes traballos centenarios. Haberá tamén historias de fotógrafas e fotógrafos de aquí e algunha que outra pequena exposición con fotos de Ruth nalgunhas das vilas galegas. En definitiva, será unha viaxe para conectar o  pasado co noso presente.

Ruth Matilda chegou ao porto de Vigo en 1924 e a viaxe de ‘Galicia de 20 a 20’ comezará nesta mesma cidade. Ela retratou unha muller que levaba un cesto na cabeza con 22 pitos e o programa actualizará a súa foto con Flora Porto, agricultora de Ponteareas que continúa levando o seu produto a Vigo. Aproveitando a estancia na cidade olívica, os espectadores coñecerán a Mary Quintero, unha pioneira da fotografía que pode contar como era o oficio a mediados de século.

Como o que máis lle interesaba a Anderson eran os traxes tradicionais, o espazo da TVG achegarase ao obradoiro de costura de Saiáns, onde Patricia González ensinará como actualizar estas prendas para que teñan cabida no mundo de hoxe. Ademais, cruzarán a ría para seguir a pista dunha carpintaría de ribeira en Domaio (Moaña) e rematará o programa en Ponteareas, onde Ruth Matilda fotografou unha escola e onde se comprobará como mudou o ensino nestes cen anos.

ler máis

A CRTVG comeza a busca da canción que lle porá este ano a banda sonora ao Nadal galego

27/10/2022

As persoas interesadas en participar na oitava edición do concurso ‘Este Nadal canta con nós’ teñen de prazo desde o 28 de outubro ao 5 de decembro

Os temas, que deben ser inéditos e escritos en galego, enviaranse ao enderezo canciondonadal2022@crtvg.es

A CRTVG comeza a busca da canción que lle porá este ano a banda sonora ao Nadal galego

Santiago, 27.10.2022.-    A CRTVG abre desde este venres 28 de outubro a convocatoria para poñerlle unha nova melodía ao Nadal galego. O prazo para a presentación de cancións estará aberto ata o próximo 5 de decembro. A oitava edición do certame ‘Este Nadal canta con nós’ ponse en marcha coa idea de atopar a mellor banda sonora para acompañar os galegos e galegas este Nadal e, para iso, as cancións deben de ser inéditas e orixinais, ademais de estaren escritas en lingua galega.

Cada grupo ou solista participante presentará un só tema, cunha duración non superior aos 3 minutos, e poderá enviar un vídeo musical do mesmo. Os participantes enviarán as súas cancións, de temática libre, en formato mp3 e, en caso de presentar vídeo musical, en mp4, ao enderezo canciondonadal2022@crtvg.es.

O premio conta cunha dotación económica de 1.000 euros e, para decidir o gañador, o xurado valorará a orixinalidade, a calidade técnica e o acompañamento dun vídeo musical. Ademais do premio, a canción gañadora terá difusión na televisión e na radio públicas, así como nas redes sociais da Corporación.  

O xurado estará composto por cinco persoas designadas pola dirección da Corporación Radio e Televisión de Galicia e o 12 de decembro farase público o tema vencedor e unha lista puntuada ata o quinto posto na web www.crtvg.gal, onde tamén se poden consultar as bases do concurso.

Esta é a oitava edición deste concurso musical, que anteriormente gañaron os nenos do CEIP San Clemente de Caldas de Reis, coa súa proposta ‘Cando é Nadal’; Iván Vale, co tema ‘O meu Nadal perfecto’; Plan Siberia, con ‘Xunto a ti’; Susana Martínez, con ‘O sinal’; o CEIP Covas de Meaño, con ‘Saúde e cante o merlo’; Kiko Bea, coa canción ‘Un Nadal distinto’, e o grupo xuvenil King Kids, que se fixo coa última edición do certame grazas ao tema ‘Un bo Nadal’.

ler máis

'O home e o can', película participada pola TVG, triunfa no Festival de Cine de Madrid, con seis galardóns

24/10/2022

Fíxose co Premio da Crítica e os de mellor interpretación masculina e feminina, a Manuel Manquiña e Paula Chaves, mellor montaxe, mellor guión e mellor dirección de cásting

Era a primeira vez que se proxectaba fóra de Galicia, tras a súa estrea no OUFF, na versión orixinal en galego

Rodado integramente na provincia de Ourense, o filme de Ángel de la Cruz fala do abandono do rural e da soidade na vellez

'O home e o can', película participada pola TVG, triunfa no Festival de Cine de Madrid, con seis galardóns

Santiago, 24.10.2022.-    A película ‘O home e o can’, producida por Ézaro Films e Caladiño Filmes, coa participación da CRTVG e o apoio da Deputación de Ourense, conseguiu esta fin de semana un total de seis galardóns no marco da 31ª edición do Festival de Cine de Madrid.

O filme dirixido por Ángel de la Cruz conseguiu o Premio da Crítica, concedido por un xurado formado por Mariela Cubells, da Cadena Ser; Moisés Rodríguez, de RTVE, e Gregorio Belinchón, de ‘El País’. Ademais, foron galardoados os seus protagonistas, Manuel Manquiña e Paula Chaves, cos premios á mellor interpretación masculina e feminina, respectivamente. Tamén recibía o premio á mellor montaxe Alejandra Sotelo e recollía os de mellor guión e dirección de cásting o propio Ángel de la Cruz.

Tratábase da primeira vez que a película saía de Galicia na súa versión orixinal en galego e fíxoo por todo o alto. A súa estrea tivo lugar o pasado 23 de setembro na XXVIII edición do Festival Internacional de Cine de Ourense, onde obtivo o Premio do Público.
    
‘O home e o can’ foi rodada integramente en branco e negro, con exteriores localizados na provincia de Ourense, é unha homenaxe ao neorrealismo italiano e fala da soidade, intentando dar visibilidade e resposta a varios dos problemas da Galicia actual: o envellecemento da poboación, o abandono do rural e a soidade non elixida na vellez.

Conta a historia de Manuel, un home coas súas capacidades intelectuais afectadas que non saíu nunca da aldea, onde vive completamente só tras a morte da última veciña. A única compaña que ten é a do seu inseparable can, ata que un accidente deste obrígao a adentrarse na cidade na busca dun veterinario. No medio deste caos, o protagonista atopará a Paula, quen foxe dun fogar desestruturado na busca de liberdade. Estes dous personaxes, aparentemente antagónicos, converteranse, sen agardalo, en dous amigos unidos pola soidade.

ler máis

A G2 emite as curtametraxes participantes no certame 'Nós tamén creamos!'

17/10/2022

Desde o 18 de outubro ata o 23 de novembro ofreceranse, de luns a venres arredor das 07.15 h, os proxectos que competiron na edición de 2022 do certame

As pezas, elaboradas coa técnica stop-motion por profesorado e alumnado de Infantil e 1º a 4º de Primaria de colexios galegos, poden verse tamén na sección infantil da páxina web da CRTVG

A G2 emite as curtametraxes participantes no certame 'Nós tamén creamos!'

Santiago, 17.10.2022.-    A segunda canle da Galega comeza este martes a emisión das 25 curtametraxes participantes na X edición do certame ‘Nós tamén creamos!’. As pezas, elaboradas coa técnica stop-motion por profesorado e alumnado de Infantil e 1º a 4º de Primaria de colexios galegos, poden verse tamén na sección infantil da páxina web da CRTVG.

Desde o 18 de outubro ata o 23 de novembro ofreceranse, de luns a venres arredor das 07.15 h, os proxectos que competiron na edición de 2022 do certame, incluídos os gañadores, que foron ‘Sopa verde’, presentado por alumnos de Educación Infantil do CEIP Albeiros de Lugo, a curtametraxe coa que este martes comezan as emisións; ‘O camiño’, vídeo realizado por alumnado de 1º e 2º de Primaria do CEE Miño de Ourense, e ‘Un conto cheo de lobos’, peza creada por alumnos de 3º e 4º de Primaria do CEIP Manuel Villar Paramá da Estrada .

O programa de dinamización lingüística ‘Nós tamén creamos!’, da Secretaría Xeral de Política Lingüística e da Dirección Xeral de Ordenación e Innovación Educativa, conta coa colaboración da CRTVG para fomentar unha imaxe positiva da lingua galega, favorecer o seu uso en formatos audiovisuais e dar a coñecer as opcións de lecer en galego que lles ofrece aos rapaces e rapazas a web dos medios públicos galegos.

ler máis

Xosé Ramón Gayoso, Premio da Cultura Galega 2022 no seu apartado audiovisual

04/10/2022

O xurado recoñeceu a súa traxectoria de 30 anos ao fronte de ‘Luar’, no prime time dos venres na TVG, nun programa que une música, baile, cultura popular e moito humor e que contribúe a visibilizar o novo talento musical e o sector da música popular galega

Xosé Ramón Gayoso, Premio da Cultura Galega 2022 no seu apartado audiovisual

Santiago, 04.10.2022.-    Os Premios da Cultura Galega 2022, feitos públicos este martes, recoñeceron a traxectoria profesional de Xosé Ramón Gayoso, presentador do espazo ‘Luar’ da TVG e unha das caras máis coñecidas e queridas da canle pública galega.

O xurado, presidido polo conselleiro de Cultura, Román Rodríguez, reuniuse esta mañá na Cidade da Cultura para distinguir os galardoados este ano nas modalidades de Letras, para a escritora Marica Campo; Artes Visuais, para a catedrática de Historia da Arte Contemporánea María Victoria Carballo-Calero; Artes Escénicas, para a actriz lucense Melania Cruz; Música, para os Cursos Universitarios Internacionais ‘Música en Compostela’; no eido audiovisual, para X. R. Gayoso; Lingua, para o catedrático e investigador Manuel González; Patrimonio Cultural, para a asociación cultural Xacarandaina; e Proxección Exterior, para o programa ConCiencia, da USC e o Consorcio de Santiago.

Xosé Ramón Gayoso (A Coruña,1956) presenta desde hai 30 anos -feitos este mes de setembro pasado- o espazo ‘Luar’ da TVG, o programa máis lonxevo da Galega e a cita agardada de cada venres no prime time desta canle. Case tres décadas despois daquel primeiro ‘Luar’, o programa é tamén o espazo musical máis antigo da televisión en España. ‘Luar’, do que Gayoso tamén é codirector, une música, baile, cultura popular e humor, así como unha gran complicidade cos espectadores. E no 2017, foi distinguido coa Medalla Castelao.

Cos Premios da Cultura Galega, o Goberno autonómico distingue, un ano máis, a excelencia creativa, a capacidade de intercambio, a experimentación e a proxección do panorama cultural da nosa comunidade, así como o compromiso de proxectos, traxectorias e iniciativas que enriquecen a realidade e identidade cultural de Galicia.

Do xurado desta edición tamén formaron parte o director xeral de Cultura, Anxo M. Lorenzo; a secretaria xeral de Igualdade, Susana López Abella; a comisaria do Xacobeo 2021-2022, Cecilia Pereira; o reitor da Universidade de Santiago, Antonio López; a presidenta do Consello da Cultura Galega, Rosario Álvarez; o presidente da Real Academia Galega de Belas Artes, Manuel Quintana Martelo, así como profesionais da cultura de Galicia de recoñecido prestixio como Zaza Ceballos, produtora audiovisual e galardoada nos Premios da Cultura Galega 2021; Elena Pardo, directora da Escola de Arte e Superior de Deseño Pablo Picasso, e Xosé Eduardo López-Pereira, presidente da Fundación Otero Pedrayo.

ler máis

Entregados os XXVIII Premios Publicidade en Galego, en cuxo xurado participa a CRTVG

04/10/2022

Os galardóns desta edición foron para a Asociación PuntoGal, R Cable e Telecable Telecomunicacións, o Consello Regulador Denominación de Orixe Ribeiro, Aqualia, o CIFP Leixa e unha mención de honra para a empresa Sistemas de Seguridade A1

Entregados os XXVIII Premios Publicidade en Galego, en cuxo xurado participa a CRTVG

Santiago, 04.10.2022.-    O Parlamento de Galicia acolleu a entrega da XXVIII edición dos Premios Publicidade en Galego, convocados conxuntamente pola Xunta de Galicia, o Parlamento de Galicia e o Foro Enrique Peinador, e apoiados pola CRTVG. O obxectivo  deste certame é promover o uso da lingua galega no ámbito publicitario, en cumprimento do Plan xeral de normalización lingüística.

No acto interviron o secretario xeral de Política Lingüística, Valentín García, o presidente do Parlamento de Galicia, Miguel Ángel Santalices e José González, presidente do Foro Enrique Peinador. A CRTVG, que forma parte do xurado destes premios, estivo representada polo seu director de Innovación e Negocio, José Pereira, e a coordinadora de Publicidade, María Lozano.

Na categoría de radio, o premio foi para a Asociación PuntoGal polo seu proxecto ‘Abre na rede’, da axencia Quattro idcp, no que se asocia a lingua galega ás redes sociais e, en televisión, para R Cable e Telecable Telecomunicacións por ‘Vai escampar’, tamén da axencia Quattro IDCP.

Na categoría de internet, premiouse o Consello Regulador Denominación de Orixe Ribeiro (C.R.D.O Ribeiro) polo anuncio ‘Treixadura-Modo Ribeiro’ da axencia Nasas. En prensa escrita, Aqualia, con ‘A auga en Vigo é de alta calidade’ da axencia Ecovigo Publicidade; e na categoría de centro educativo, o Centro Integrado de Formación Profesional CIFP Leixa de Ferrol por ‘Cambio climático’, elaborado por dous alumnos e unha profesora deste centro.

Así mesmo, o xurado outorgoulle por unanimidade unha mención de honra á empresa Sistemas de Seguridade A1, polo seu uso continuado na comunicación e difusión publicitarias.

ler máis

#DígochoEu pon en marcha o concurso 'Unha canción para Esther'

04/10/2022

O espazo busca temas que poida interpretar a presentadora do espazo, Esther Estévez, e que deben ser inéditos e escritos en lingua galega. O prazo de presentación de solicitudes remata o 28 de outubro

#DígochoEu pon en marcha o concurso 'Unha canción para Esther'

Santiago, 04.10.2022.-   O espazo de promoción da lingua da CRTVG #DígochoEu pon en marcha esta semana o concurso ‘Unha canción para Esther’. Búscanse temas que poida interpretar a presentadora do programa, a xornalista Esther Estévez, ben na súa totalidade ou acompañada do autor, intérprete ou grupo.

As cancións teñen que ser inéditas, totalmente orixinais e escritas en lingua galega. A temática é libre, pero os temas non deben superar os tres minutos de duración e poden ir acompañados dun vídeo musical ou dunha idea para realizalo. Toda a información e as bases do concurso poden consultarse aquí.

O prazo de presentación de propostas remata o 28 de outubro. Despois, levarase a cabo o proceso de selección dos cinco gañadores do concurso, aínda que existirá unha listaxe puntuada ata o décimo posto. O xurado estará composto polo equipo do #DígochoEu e terá en conta á hora de elixir os gañadores a orixinalidade das cancións, a súa calidade técnica e o acompañamento dun vídeo musical. En maio de 2023, outro xurado, desta volta alleo ao equipo do programa, elixirá a canción gañadora e cales quedan nas seguintes posicións. Todos eles recibirán os seus premios (500 euros para o primeiro clasificado, 400 € para o segundo, 300 € para o terceiro, 200 € para o cuarto e 100 € para o quinto) nunha gala especial que se celebrará tamén en maio.

#DígochoEu segue crecendo

O #DígochoEu da CRTVG, que chegou a semana pasada aos 1.000 capítulos, segue a crecer con novas propostas, como este concurso, que se suma aos II Premios #DígochoEu, un certame escolar de vídeos cuxo prazo de presentación de propostas remata tamén o 28 de outubro e que está aberto á participación dos ciclos de educación Primaria e Secundaria de todos os centros escolares de Galicia, así como a calquera de fóra de Galicia que imparta lingua galega.

ler máis

A TVG pecha o seu mellor mes de setembro desde 2013

03/10/2022

A audiencia chega ao 9,9 % no conxunto do día e dispárase ata o 11,2 % no prime time

Nos informativos, lidera a suba o ‘Telexornal Mediodía’ entre semana e na fin de semana

A TVG pecha o seu mellor mes de setembro desde 2013

Santiago, 03.10.2022.-    Un 11,2 % de share no prime time e un 9,9 % no conxunto do día son a resposta da audiencia á proposta de programación de outono da Galega, estreada en setembro, mes que TVG pechou cun incremento de audiencia respecto a agosto e tamén ao mesmo período do ano pasado. Segundo os datos do medidor independente Kantar Media, este foi o mellor mes de setembro para a Galega desde 2013.

Tamén a G2 consolida a cota de pantalla acadada en agosto, 1 %, a máis alta desde 2015. Con respecto a setembro de 2021, a canle pública galega incrementou en 8 décimas a súa cota e no que levamos de 2022 a media é do 10,1 %.

Entre as canles que integran a FORTA, Televisión de Galicia segue no podio en setembro e segue sendo, ademais, un dos motores deste grupo de canles autonómicas, ao superalo en 1,9 puntos de share no prime time e 1,2 no conxunto do día.

Ademais do aumento de audiencia na proposta de entretemento, hai que salientar a subida dos informativos ‘Telexornal Mediodía’ e e ‘Telexornal Mediodía Fin de Semana’.

De luns a venres a TVG acaba o día en dous díxitos: luns (10,6 %), martes (10,1 %), mércores (10,3 %), xoves (10,4 %) e venres (11,1 %). Na franxa do prime time, destaca a suba en luns, xoves e venres. Nesta faixa de máxima competitividade do día, a TVG sitúase por diante de canles públicas e tamén canles privadas como Telecinco.

ler máis