CRTVG

Buscar

CRTVG Viva

O documental 'Santoalla', un retrato do crime que lle custou a vida ao holandés Martin Verfondern, pode verse na web da CRTVG

07/12/2022

Os medios públicos galegos inclúen na súa oferta ‘Á Carta’ unha produción que recolle as gravacións realizadas pola vítima sobre a súa vida cotiá e os problemas xurdidos cos únicos veciños da aldea onde vivía xunto á súa parella

O documental 'Santoalla', un retrato do crime que lle custou a vida ao holandés Martin Verfondern, pode verse na web da CRTVG

Santiago, 07.12.2022.-    O documental ‘Santoalla’, que amosa todos os detalles arredor do coñecido como o crime do holandés de Petín, está dispoñible na sección ‘Á Carta’ da web da CRTVG. Esta produción recolle os acontecementos que viviu Martin Verfondern nunha pequena aldea ourensá antes de desaparecer misteriosamente en xaneiro de 2010. A parella formada por Martin e a súa muller, Margo Pool, fuxira do bulicio de Ámsterdam a finais dos 90 e, cativada pola paisaxe e tranquilidade destas terras, instalarase na comarca de Valdeorras.

A boa relación entre a parella holandesa e a única familia que habitaba a aldea muda cando entran en disputa sobre os dereitos do monte comunal, un terreo dunhas 400 hectáreas que rodea o lugar. Tras anos de enfrontamentos, Martin comeza a utilizar unha cámara para rexistrar todo o que acontece, tanto escenas da súa vida cotiá coma os problemas que xorden cos veciños. Un día desaparece e todas as alarmas se prenden.

Amais das entrevistas realizadas tras a súa desaparición, o documental inclúe vídeos da TVG, así como as gravacións desenvolvidas por Martin coa súa cámara. Todo este material permite observar a evolución da relación que o matrimonio formado por Martin Verfondern e Margo Pool mantiña coa outra familia que vivía na aldea. Describe como a harmonía que houbo nun principio foi enrarecéndose co paso dos anos. Así, o documental narra o conflito entre as dúas únicas familias: a nativa e a estranxeira, que atopou un paraíso na natureza para establecerse e crear a súa granxa ecolóxica.

‘Santoalla’ está dirixido polos estadounidenses Daniel Mehrer e Andrew Becker, e conta na produción coa valdeorresa Cristina de la Torre. Os directores chegaron á aldea en 2012, antes de dar co paradoiro de Verfondern. Gravaron entrevistas, entre elas a Margo e membros da familia veciña. En 2014, cando se atopa o corpo carbonizado de Martin a uns 20 quilómetros da aldea, regresa o equipo a Santoalla para seguir gravando.

Na rodaxe do documental, os acontecementos que se suceden tras a morte de Verfondern son os que tamén marcan o ritmo. O achado do seu todoterreo nun monte da Veiga e as detencións que aconteceron van levando o documental cara a un thriller rural.

ler máis

O programa 'Corremundos' comparte esta noite o traballo dos queixeiros galegos e holandeses

07/12/2022

Tamén saberá como é o día a día nos viveiros de flores de Róterdam e Goián

O programa 'Corremundos' comparte esta noite o traballo dos queixeiros galegos e holandeses

Santiago, 07.12.2022.-   No programa ‘Corremundos’ (23.10 h) desta semana, que viaxa aos Países Baixos, os espectadores da Televisión de Galicia aprenderán a facer queixo gouda, famoso en todo o planeta. E farano sen procesos industriais, porque visitarán unha granxa onde se elabora de forma tradicional dende hai 100 anos. Por suposto, o programa tamén acompañará un queixeiro galego na súa xornada de traballo. Ata 5.000 litros de leite caben na súa cuba, case nada.

ler máis

Celta-Boavista, o mércores, e Lugo-Spórting, o xoves, retransmisións deportivas destacadas durante a ponte na Radio Galega

05/12/2022

O programa 'Galicia en Goles' tamén estará estes días nos encontros de Primeira RFEF Rácing de Ferrol-Linares, Córdoba-Pontevedra e Talavera-Celta B e nos partidos de Terceira RFEF Arteixo-Estradense, Choco-Arousa, U. D. Ourense-Fabril e Somozas-Paiosaco

Celta-Boavista, o mércores, e Lugo-Spórting, o xoves, retransmisións deportivas destacadas durante a ponte na Radio Galega

Santiago, 05.12.2022.-    A Radio Galega ten preparada unha ampla programación deportiva para estes días festivos. O martes, desde as 15.00 h, Xoán Galán conduce a primeira edición especial de ‘Galicia en Goles’ para contar primeiro o España-Marrocos dos oitavos de final do Mundial de Qatar e despois, o Badaxoz-Deportivo da Coruña, da Primeira RFEF.

O mércores, o deporte continúa desde as 18.00 h co Celta-Boavista en Balaídos, onde o equipo vigués inicia unha serie de amigables para preparar o regreso á competición o próximo xoves 22 en Gernika, na Copa do Rei. Ata as 23.00 h o programa tamén estará nos encontros da Primeira RFEF: Rácing de Ferrol-Linares, Córdoba-Pontevedra e Talavera-Celta B.

Xa o xoves, a partir das 15.00 h, a Radio Galega iniciará seis horas de fútbol co Lugo-Spórting de Xixón desde o Anxo Carro, correspondente á Segunda División. O fútbol da Terceira RFEF tamén terá protagonismo ata as 21.00 h con catro enfrontamentos: Arteixo-Estradense, Choco-Arousa, U. D. Ourense-Fabril e Somozas-Paiosaco.

ler máis

O mellor novembro da última década para o prime time da TVG

02/12/2022

A audiencia da Galega na franxa de máis consumo televisivo alcanza os mellores datos desde 2012, cun 12,3%

Os informativos da TVG acadan a cota máis alta na franxa do mediodía, cun 19,5% de luns a venres

Os servizos informativos da TVG chegaron neste mes a 1.594.000 galegos

Crecen todas as franxas horarias: as mañás medran un 2,2% e as tardes, un 1,3%

O mellor novembro da última década para o prime time da TVG

Santiago, 02.12.2022.-    Os datos de Kantar Media do mes de novembro refrendan os coñecidos onte tamén polo outro medidor de audiencias de referencia en España, o Estudo Xeral de Medios (EXM).

Así, os datos de consumo de televisión ofrecidos por Kantar Media reflicten que a TVG viviu o seu mellor mes de novembro desde 2011, cun 11,7% de cota de pantalla. Se falamos de forma específica da franxa do prime time -a de máis consumo do día-, a TVG rexistrou o seu mellor dato desde 2012 cun 12,3% de audiencia, é dicir, o mellor dato da década nun mes de novembro. Con este, son catro meses seguidos de traxectoria ascendente, que confirman a positiva acollida por parte da cidadanía á proposta da canle para este outono, en que coincide ademais a emisión do Mundial de Fútbol noutras canles e plataformas.

A franxa informativa do mediodía, co ‘Galicia Noticias’ e ‘Telexornal Mediodía’, logra un 19,5% de luns a venres, e lidera con máis dun punto por riba do seguinte competidor, A3. Os informativos da Galega chegan a unha audiencia total de máis dun millón e medio de galegos, o 61% da poboación maior de 4 anos.

Éxito do prime time e o day time

Pese á competencia, a TVG mantén a súa estratexia de información en directo e entretemento tamén en directo ao longo de toda a grella, e todo feito en Galicia. Así, os venres, por exemplo, a TVG supera as 15 horas de directo e o xoves móvese en algarismos semellantes.

Os produtos elaborados polo sector audiovisual galego (programas, series, cinema…) están competindo con solvencia e facendo medrar as súas franxas de audiencia. No mes de novembro o prime time da TVG medrou en catro dos sete días da semana: martes, mércores, xoves e domingos, nun mes en que destaca o liderado na noite dos sábados con ‘Bamboleo’. ‘Land Rober’, ‘Atrápame se podes’, ‘Malicia Noticias’ ou ‘Luar’ seguen a ser apostas seguras para a audiencia galega.

O day time da Galega tamén medra. As mañás, con toda a programación en directo, arrancando co ‘Bos Días’  e seguindo con ‘A Revista’, ‘A Bóla Extra’ e a nova incorporación do espazo ‘Atmosféricos’, medraron neste mes con respecto ao anterior un 2,2%, de luns a domingo. E as tardes, entre as 15.30 e as 20.30 horas, cos programas de actualidade e entremento tamén en directo ‘Quen Anda Aí?’ e ‘Hora Galega’, sumaron un 1,3% máis de espectadores.

No eido da FORTA, segundo os datos dados a coñecer por Kantar Media, a TVG segue a ser un dos principais motores do grupos, superando a media en 3,1 puntos de cota.

ler máis

A directiva do Celtic Media Festival visita a CRTVG

02/12/2022

No marco da súa viaxe a Galicia para participar nas xornadas ‘I+P, Ideas para Producir’ do Clúster do Audiovisual Galego, achegáronse a San Marcos para coñecer o sistema dixital de produción dos medios públicos

A directiva do Celtic Media Festival visita a CRTVG

Santiago, 02.12.2022.-    O presidente do Celtic Media Festival e director xeral da canle TG4, a televisión pública de Irlanda, Alan Esslemont, acompañado por Catriona Logan, directora do Celtic Media Festival, e Naomi Henry-Wright, xerente da mesma entidade, visitaron este xoves o centro de San Marcos da CRTVG, onde coñeceron as instalacións, redaccións, platós e a nova área de Documentación e Arquivo.

No seu percorrido, no que se interesaron moi especialmente polo recente proceso de dixitalización e a estratexia de futuro da canle, estiveron acompañados por Fernando R. Ojea, director de Contidos da CRTVG; Xaime Arias, director de Proxección Social, e Montse Besada, xefa de Contidos da Corporación.

A CRTVG é membro da alianza de televisións de países celtas representadas no Celtic Media Festival, que promove a cultura e linguas dos países celtas nos ámbitos do cinema, a televisión, a radio e os novos medios de comunicación.

A Coruña acolle esta semana unha xornada de pitching organizada polo Clúster Audiovisual Galego, a décimo sexta edición do evento ‘I+P, Ideas para Producir’, ao que acoden máis dun cento de profesionais do sector de España e Europa. Entre eles, responsables de contidos de televisións e plataformas, distribuidores e produtores, así como de eventos do sector como o Celtic Media Festival, un referente no audiovisual europeo. A CRTVG, mediante esta asociación, exerce como ponte entre o sector audiovisual galego e produtores doutras partes de Europa para abrir camiño e fomentar o desenvolvemento de estratexias e proxectos audiovisuais internacionais.

ler máis

A TVG é a canle autonómica máis vista de 2022 e líder en Galicia

01/12/2022

Na franxa informativa do mediodía a Televisión de Galicia duplica en audiencia o seguinte competidor e a Galega gaña tamén a batalla do prime time

Segundo os datos do EXM, o grupo de emisoras da Radio Galega suma 168.000 oíntes diarios neste ano, consolidándose como a primeira canle pública de Galicia

A TVG é a canle autonómica máis vista de 2022 e líder en Galicia

Santiago, 01.12.2022.-    Os datos da terceira e última onda do Estudo Xeral de Medios (EXM) deste ano permiten completar o panorama dun 2022 de grandes resultados para a Corporación RTVG.

A Televisión de Galicia consolídase como a canle máis vista de 2022 na nosa comunidade cun 20,9% de cota de pantalla, superando en case cinco puntos o seguinte competidor, a canle privada A3 (16,1%).

Fóra das nosas fronteiras, esta onda do EXM, que pecha o balance do ano natural (de febreiro a novembro), deixa tamén a TVG como a canle autonómica máis vista de 2022, superando en case 4 puntos a seguinte canle (TV3, 17,1%).  

Neste 2022 a TVG pecha a semana con catro dos sete días con algarismos por riba do 20% de audiencia: 22,3% os luns; 21,5% os martes; 22,7% os xoves e 21,5% os venres, o que reflicte unha extraordinaria fidelidade da cidadanía ao conxunto da grella de programación, todos os días e a todas horas. De feito, por franxas, a TVG lidera as mañás cun 15,8%. Na franxa do mediodía a TVG segue a ser o gran dominador. Os informativos ‘Galicia Noticias’, con Eduardo Herrero, e o ‘Telexornal Mediodía’, con Marta Darriba, seguen a liderar con solvencia os seus tramos e case duplican a segunda opción, cun 33,3% para a TVG e 16,8% para A3. No prime time, a franxa de máis consumo e a máis competida do día, Televisión de Galicia segue a ser a canle máis vista polos galegos cun 18,2% de media, superando en tres puntos o seguinte competidor.

Os datos de prime time reflicten o agrado da cidadanía polo traballo realizado polo sector audiovisual galego, xa que a TVG compite nesa franxa con programas, series ou cine elaborado en Galicia. Así, o 96% do que emite a primeira canle da TVG está feito en Galicia e por galegos, algarismos que non acada ningunha outra canle a nivel estatal en referencia á produción no seu territorio.

168.000 oíntes diarios para a Radio Galega no 2022

A Radio Galega segue a ser a emisora pública máis escoitada de Galicia neste 2022, e métese de novo no podio das radio xeralistas galegas. O grupo de emisoras da Radio Galega acadou os 168.000 oíntes diarios neste ano 2022.

Esta última onda do EXM deixa o liderado en tramos horarios da aposta informativa das mañás no ‘Galicia por Diante’ de Silvia Pereira e Kiko Novoa; no programa decano da radio deportiva galega, o ‘Galicia en Goles’ de Xoán Galán, nas fins de semana, xunto co ‘Galicia por Diante Fin de Semana’, aos mandos de Victoria Rodríguez. Precisamente as audiencias dos domingos nesta terceira onda do EXM son as mellores dos útimos cinco anos. E, por suposto, o liderado indiscutible das madrugadas co ‘Pensando en ti’ de Marcial Mouzo.

Ademais, o novo formato e horario de ‘A Tarde’, de 15.00 a 19.00 h, trouxo consigo unha suba tamén de audiencia nesa faixa. E ‘Ao Contraataque’ consolídase na noite con 26.000 oíntes.

Estes datos do ano 2022 refrendan a confianza da sociedade galega nos seus medios públicos de comunicación en dúas das principais forma de achegamento á cidadanía como son a radio e a televisión.

ler máis

A Radio Galega estrea a terceira temporada do podcast 'Superando a ficción'

29/11/2022

A xornalista Cristina García relata cada semana un acontecemento real digno de ser o argumento dunha película

As seis novas entregas, con historias máis incribles ca nunca, están dispoñibles en RadioGalegaPodcast.gal e tamén nas plataformas Spotify e iTunes

A Radio Galega estrea a terceira temporada do podcast 'Superando a ficción'

Santiago, 29.11.2022.-    Esta semana regresa á Radio Galega ‘Superando a ficción’, con novas historias reais, que engancharán os oíntes grazas ao ritmo, á intriga, á acción e ao suspense que lles proporciona a xornalista Cristina García. O primeiro podcast nativo dixital da emisora pública, dispoñible en RadioGalegaPodcast.gal, achegará cada semana unha historia veraz digna de ser o argumento dunha película.

Tras o éxito de acollida das dúas temporadas anteriores, Cristina García, coordinadora de Programas da RG e presentadora habitual dos espazos ‘Galicia por Diante’ e ‘A Bóla Extra’, trae agora historias máis incribles ca nunca, seis novos relatos que superan calquera das ficcións máis inimaxinables. Como é habitual neste podcast, todas elas se presentarán baixo o título dunha longametraxe.

Así, nesta terceira temporada, haberá historias sobre xente que simulou estar tola para entrar nun sanatorio mental e sobre mulleres que competiron ferozmente para dominar a industria cosmética. Os oíntes de ‘Superando a ficción’ tamén coñecerán unha muller que puido ser emperatriz de Persia, pero que foi repudiada polo seu home por non ter fillos, e doutra tan pobre que non tiña máis ca cartos. Noutros capítulos, Cristina García falará dunha familia idílica que enganou a todo o mundo e de grandes oportunidades que chegan cando menos se agardan.

‘Superando a ficción’, un podcast feito por e para o medio dixital, está dispoñible en RadioGalegaPodcast.gal e tamén nas plataformas Spotify e iTunes. Este proxecto, nado en outubro de 2021, continúa sumando contidos, con novos podcasts nativos dixitais á marxe dos patróns horarios da radio e coa vontade de alcanzar diferentes públicos niño. Así, ao pioneiro ‘Superando a ficción’ foron uníndose novos proxectos, máis de 40 podcasts que conforman a oferta actual de RadioGalegaPodcast.gal.

Cristina García, gañadora do II Premio Sesé Mateo

A nova temporada de ‘Superando a ficción’ estréase poucos días despois de que a creadora deste podcast fora galardoada co II Premio Sesé Mateo de Xornalismo Ético no Tratamento e Comunicación da Violencia de Xénero, que concede o Concello de Redondela e Joshua Alonso Mateo. Cristina García foi premiada polo capítulo ‘Mentres dormes’, que afonda nas violacións por submisión química. A través da historia persoal da directora británica Michaela Coel, a peza premiada de ‘Superando a ficción’ explica os antecedentes deste tipo de violencia.

ler máis

O programa 'Nacer de novo' da TVG fai 35 anos visitando Israel

28/11/2022

Dirixido e presentado por Jaime Fernández Garrido, é o programa das igrexas evanxélicas en Galicia e un dos espazos institucionais nas canles públicas máis antigos de Europa, con máis de 1.800 semanas en antena

O programa 'Nacer de novo' da TVG fai 35 anos visitando Israel

Santiago, 28.11.2022.-     O espazo ‘Nacer de novo’ da Televisión de Galicia fai 35 anos en antena e, con tal motivo, durante as vindeiras semanas emitirá unha serie de programas gravados en Israel, visitando distintos enclaves da Terra Santa. O programa percorrerá lugares como Xerusalén, Belén, Cesarea de Filipos, o río Xordán, Xericó, Meggido, o monte da Felicidade, Cesarea Marítima, Cafernaum, a Fortaleza de Masada e o mar de Galilea, entre outros.

Dirixido e presentado por Jaime Fernández Garrido, ‘Nacer de novo’ é o programa das igrexas evanxélicas en Galicia da canle pública galega e, ademais, un dos espazos institucionais nas canles públicas máis antigos de Europa, con máis de 1.800 semanas en antena.

En España, ‘Nacer de novo’ foi pioneiro nos medios de comunicación autonómicos coa súa estrea en 1987. Máis tarde chegarían espazos similares a outras canles como TV3, EiTB e Canal Sur, entre outros.

‘Nacer de novo’ destaca tamén polo contacto cos televidentes. Así, ao longo destes 35 anos, case 40.000 persoas escribiron ao programa ou chamaron para recibir O Novo Testamento.

ler máis

A película 'Os demos de barro', participada pola TVG, gaña o Premio á Mellor Banda Sonora Orixinal no Festival Caminhos do Cinema Português

25/11/2022

As melodías premiadas, dos galegos Carlos Guerreiro e Manuel Riveiro, abrirán os actos previos á vindeira gala dos Premios Goya, en que o filme conta con 12 candidaturas

A película 'Os demos de barro', participada pola TVG, gaña o Premio á Mellor Banda Sonora Orixinal no Festival Caminhos do Cinema Português

Santiago, 25.11.2022.-    A coprodución hispano-franco-portuguesa ‘Os demos de barro’, que conta coa participación da Televisión de Galicia, gañou o Premio á Mellor Banda Sonora Orixinal no Festival Caminhos do Cinema Português, polo traballo dos galegos Carlos Guerreiro e Manuel Riveiro. As súas melodías abrirán os actos previos á gala dos Goya 2023 o vindeiro 27 de xaneiro. Polo de agora, o filme conta con 12 candidaturas a estes premios e, como parte da celebración, a Academia interpretará as obras dos compositores gañadores e candidatos aos galardóns.

Esta película de animación, inspirada visualmente na cerámica tradicional portuguesa, conta a historia de Rosa e o seu regreso ás súas raíces e á vida natural do campo e da súa aldea natal. ‘Os demos de barro’ realizouse durante os últimos catro anos entre as cidades de Lisboa, A Coruña, Bilbao e Bordeos.

A produción combina o stop motion coa animación en 2D e conta coas voces de intérpretes galegos como Isabel Naveira, Monti Castiñeiras, Ledicia Sola ou Celso Bugallo. ‘Os demos de barro’ é unha coprodución de Sardinha em Lata (Portugal), Caretos Films A.I.E. (Galicia), Basque Films (País Vasco) e Midralgar (Francia), que conta coa participación da TVG e o apoio de Eurimages, República Portuguesa, ICAA-Ministerio de Cultura, PIC Portugal, Visita Portugal, Ibermedia, Région Sud, Nouvelle Aquitaine e a Xunta de Galicia.

ler máis

À Punt acolle unha xornada sobre Documentación audiovisual de canles de FORTA

25/11/2022

Na reunión de traballo participan as responsables dos servizos de Arquivo de 10 canles autonómicas, entre elas CRTVG

 

À Punt acolle unha xornada sobre Documentación audiovisual de canles de FORTA

Santiago, 25.11.2022.-    A radiotelevisión valenciana À Punt acolle este venres unha xornada de traballo que reúne 10 responsables de Documentación e Arquivo de canles autonómicas de FORTA e que ten como obxectivo poñer en valor o servizo de Arquivo nos medios medios audiovisuais.

ler máis