CRTVG

Buscar

CRTVG Viva

Este luns chega á TVG a temporada máis espectacular de 'Desmontando Galicia', que amosará a nosa terra como nunca antes se vira

13/09/2021

O programa (23.10 h) percorrerá hoxe o río Miño, que baña Galicia de norte a sur e que ao longo dos séculos foi testemuña da vida e da historia da comunidade galega

Este luns chega á TVG a temporada máis espectacular de 'Desmontando Galicia', que amosará a nosa terra como nunca antes se vira

Santiago, 13.09.2021.-  Esta noite chega á TVG a temporada máis espectacular de ‘Desmontando Galicia’, que se atreverá a amosar a nosa terra como nunca antes de vira. Nesta nova andaina, non vai quedar monumento, infraestrutura nin paisaxe sen desmontar, xa que o programa vaille dar a volta a todo, armar e desarmar canto se lle poña por diante.

Presentado por Isabel Blanco e Diana Nogueira e a inconfundible voz de Quique Morales no papel do Sabichón, o seu formato permite facer un percorrido histórico e cultural polo patrimonio galego, pero non dun xeito calquera, senón mergullándose nel grazas á tecnoloxía 3D.

A través das reconstrucións e integracións dixitais, ‘Desmontando Galicia’ bota unha ollada ao pasado, desde o presente e coa axuda de expertos, para poder coñecer a nosa historia.

Na primeira entrega desta nova temporada, o espazo da TVG vai desmontar o río Miño, que baña Galicia de norte a sur e que ao longo dos séculos foi testemuña da vida e da historia da comunidade galega. Nutriu de pesca, de auga e de enerxía, pero tamén de multitude de lendas, viaxeiros e proxectos que os espectadores descubrirán hoxe percorrendo o seu leito desde o seu nacemento ata a súa desembocadura.

ler máis

Moito humor e moitas novidades no regreso do 'Malicia Noticias', con novas fichaxes e novas seccións

12/09/2021

O presentador Fran Cañotas e a escritora e actriz Elba Pedrosa incorpóranse ao equipo de ‘maliciosos’ que de domingo a mércores analizan a actualidade dun xeito diferente

Moito humor e moitas novidades no regreso do 'Malicia Noticias', con novas fichaxes e novas seccións

Santiago, 12.09.2021.-   ‘Malicia Noticias’, o programa máis pillabán da Televisión de Galicia, regresa con moito humor e moitas novidades. Desta volta, muda o seu horario, que será de domingo a mércores ás 22.30 h, en pleno prime time. O noticiario volve para contar toda a actualidade dun xeito diferente, dándolle voz ás nosas xentes, ao que pasa na rúa e ao máis comentado nas redes sociais.

ler máis

O gaditano Abraham Mateo fará bailar esta noite a audiencia de 'Bamboleo' cos éxitos do seu último disco

11/09/2021

Noite de festa e espectáculo (22.35 h), tamén coas actuacións musicais de Antonio Luz e a orquestra M-3

O gaditano Abraham Mateo fará bailar esta noite a audiencia de 'Bamboleo' cos éxitos do seu último disco

Santiago, 11.09.2021.-    ‘Bamboleo’ chega hoxe cun espectáculo cheode música e baile. Xosé Manuel Piñeiro recibirá a visita dun convidado que leva media vida triunfando por todo o mundo: Abraham Mateo. Aquel neno que se fixera famoso cantando os temas dos seus artistas favoritos en programas de televisión e que chegou ao cume da fama con ‘Señorita’, interpretará esta noite éxitos do seu último disco ‘Sigo a lo mío’. Abraham Mateo cantará temas como ‘Loco enamorado’, que suma centos de millóns de reproducións nas plataformas musicais, ‘Aunque estés con él’ ou ‘A media luz’.

O talentoso Abraham compartirá vivencias e participará nos xogos que lle proporán Tamara Pérez e Claudio Pan. O showman Isi, pola súa parte, volverá facer que o público escache de risa coas súas historias incribles, pero verídicas. Esta noite tamén estará en ‘Bamboleo’ Antonio Luz. O artista de Sarreaus presentará o tema titulado ‘Non me toques o xe’, unha reivindicación do uso do galego que incluirá no seu próximo disco.

As vistosas actuacións da orquestra M-3 amenizarán esta noite de troula e, no que ao baile profesional se refire, o protagonismo será para a compañía de baile Elahood, formada polas coruñesas Sabela Domínguez e Julia Laport, que farán dúas exhibicións de danza. Andrea Solís e Toni Meijide serán os participantes do ‘Agora ou Nunca’. Cantarán dous temazos: ‘Rise up’, de Andra Day, e ‘La Mañana’, de Al Bano.

En ‘A Jrileira’ competirán dous mozos: Samu, polo Bertamiráns Fútbol Club do Concello de Ames, e Juan, polo Sanxenxo Balonmán. Primeiro cantarán ‘Por la boca vive el pez’, de Fito e Fitipaldis, e despois deberán adiviñar intérpretes de cancións. E na sección sexy do ‘Bamboleo’, ‘A ITV do amor’, un participante de público xogará contra Jorge, Paula, Raquel e Tamara. Os catro farán todo o posible para confundilo e que non dea adiviñado quen é realmente a parella de Jorge.

ler máis

A TVG estrea unha temporada sen límites de directo para contar Galicia minuto a minuto

10/09/2021

A Galega será unha das canles con máis horas de emisión en directo, con 13 horas de luns a xoves e case 16 os venres. Información, entretemento e proximidade

Máis informativos, os espazos ‘Bos Días’ e ‘Galicia Noticias’ esténdense á fin de semana e ‘A Revista’ terá dúas edicións, cunha hora de ‘A Bóla Extra’ polo medio

A TVG estrea unha temporada sen límites de directo para contar Galicia minuto a minuto

Santiago, 10.09.2021.-    O vindeiro luns bota a andar unha temporada especial para a TVG, a temporada que ofrecerá unha televisión practicamente sen límites de directo para poder ofrecer todo o que pase e no instante en que pase. Así, a Televisión de Galicia atreverase a ser unha das canles con máis horas en directo, case 13 de luns a xoves e roldando as 16 horas os xoves e venres. Desde o informativo ‘Bos Días’ ata o ‘Luar’, que cumpre a súa 30ª temporada en antena, apenas haberá pausa, e a grella da TVG convértese nunha das máis dinámicas e con maior capacidade de resposta inmediata de todo o panorama español. Unha das constantes será unha forte aposta polo directo como gran factor de proximidade, de participación do público e de servizo á cidadanía. Os contidos combinarán programas de entretemento e compaña con información, divulgación e servizo público.

ler máis

Radio Galega Música comeza temporada co regreso dos seus programas temáticos de autor

10/09/2021

Volven veteranos como ‘Tres Peixes Voando’ e ‘Lume na Palleira’, ademais de ‘Raizame’, ‘O Lobo Urbano’, ‘Cara B’, ‘Ondas Indies’, ‘Notas de Jazz’ e ‘Concerto Popular’

Estes espazos consolidan un formato musical que busca acompañar os seus oíntes con ritmo e sen estridencias, cunha radiofórmula enfocada ás preferencias do público galego

Radio Galega Música comeza temporada co regreso dos seus programas temáticos de autor

Santiago de Compostela, 10.09.2021.- Radio Galega Música estrea este luns unha nova temporada, recuperando os seus programas temáticos de autor nos seus espazos habituais, a modo de escaparate para as distintas tendencias e estilos, sempre con óptica e ollada galega. Estes espazos consolidan un formato musical que busca acompañar os seus oíntes con ritmo e sen estridencias, cunha radiofórmula enfocada ás preferencias do público galego, que ofrece unha coidada selección das cancións favoritas da historia da música galega e dos éxitos máis actuais.

ler máis

Comeza esta noite na TVG a 30ª temporada de 'Luar', coa presenza de Ázucar Moreno e Leilía, que actuaron no primeiro programa

10/09/2021

Este aniversario será un dos eixes da nova etapa, en que se botará a vista atrás para lembrar as primeiras emisións e se convidará a destacados humoristas a facer monólogos sobre estas tres décadas de vida (21.55 h)

Comeza esta noite na TVG a 30ª temporada de 'Luar', coa presenza de Ázucar Moreno e Leilía, que actuaron no primeiro programa

Santiago, 10.09.2021.-   O 30 de setembro de 1992, 1.200 persoas asistían ao primeiro programa de ‘Luar’ na discoteca Dona Dana de Touro. Case tres décadas despois, o espazo da TVG comeza hoxe a súa 30ª temporada, un auténtico récord de lonxevidade na televisión actual. Este aniversario será un dos eixes da nova etapa do programa, en que se botará a vista atrás para lembrar as primeiras emisións e se convidará tamén a destacados humoristas a facer monólogos sobre estes 30 anos de vida. O tiro de saída darao esta noite Víctor Fábregas.

1.273 programas despois, ‘Luar’ establecerá paralelismos con aquela primeira edición, en que o programa contou coa presenza no escenario de Ázucar Moreno e Leilía. As irmás Salazar e o grupo de pandeireteiras, unha das primeiras formacións galegas que se lanzaron a percorrer as aldeas recompilando cancións tradicionais, estarán outra vez en ‘Luar’ para presentar os seus novos traballos musicais e para lembrar aquela noite.

O espazo da TVG tamén ofrecerá a actuación do músico pontevedrés Marcelo Dobode, que interpretará temas do seu primeiro traballo discográfico en solitario, titulado ‘Turoqua’. Nel rompe as fronteiras visibles da tradición, que recobre cun verniz de modernidade e fusión ata acadar unhas melodías que foxen de calquera tipo de etiqueta.

Completan o cartel musical desta noite a orquestra Los Satélites, unha das de máis tradición e historia de Galicia, a Asociación Folclórica Queixumes dos Pinos e a rondalla feminina ferrolá Só Elas.

Ademais, esta noite dará comezo unha nova edición, a duodécima xa, do concurso musical ‘Recantos’. Os espectadores coñecerán os novos ‘recanteiros’ da temporada 21-22 e asistirán á primeira actuación de Carminha, procedente de Vigo, e de Luci Pérez, representante da comarca Lugo Sur.

Será unha noite nostálxica, pero tamén con moitas sorpresas, como a cara da nova presentadora que acompañará a Xosé Ramón Gayoso e que coñecerán esta noite tanto os espectadores como o público, que, despois de dúas temporadas atípicas por mor da pandemia, regresa ao estudio de gravación, con todas as medidas de seguridade e sempre baixo os criterios marcados polas autoridades sanitarias.

ler máis

A serie da TVG ‘Auga Seca’ e a película ‘A illa das mentiras’, participada pola Corporación, gañadoras no Celtic Media Festival

09/09/2021

As ficcións galegas impuxéronse nas categorías de mellor serie e mellor película respectivamente nunha gala celebrada esta noite

A serie da TVG ‘Auga Seca’ e a película ‘A illa das mentiras’, participada pola Corporación, gañadoras no Celtic Media Festival

Santiago, 09.09.2021.-   A ficción galega recibiu este xoves un novo recoñecemento internacional. A serie da Televisión de Galicia ‘Auga Seca’ e a película ‘A illa das mentiras’, participada pola Corporación, resultaron premiadas nos Premios Celtic Media 2021, nas categorías de mellor serie e mellor película, respectivamente.

ler máis

A CRTVG participa no panel sobre canles públicas e estratexia dixital do Festival Carballo Interplay

09/09/2021

O director de Innovación e Negocio da Corporación, José Pereira, participa no encontro, no que exporá o papel da CRTVG como motor de innovación no eido tecnolóxico galego

Ademais, as xornalistas Alba Mancebo e Esther Estévez moderaron este xoves o primeiro encontro transversal de creación galega online no marco deste festival de contidos dixitais e webseries 

A CRTVG participa no panel sobre canles públicas e estratexia dixital do Festival Carballo Interplay

Santiago de Compostela, 09.09.2021.- O director da área de Innovación e Negocio da CRTVG, José Pereira, participará este venres no panel “Contidos dixitais e innovación. Onde poñen o foco as canles públicas?” (11.30h) do festival de contidos dixitais e webseries, Carballo Interplay. José Pereira exporá a estratexia de dixitalización dos medios públicos e as novas plataformas da Corporación, como a futura OTT, así como o papel da CRTVG como motor de innovación no eido tecnolóxico, despois de completar a dixitalización dos seus sistemas de produción. 

ler máis

Emoción ata o último momento en 'A Liga dos Cantantes Extraordinarios', que esta noite celebra a súa gran final

09/09/2021

Despois de dez xornadas intensas, Alejandra Pais, Ruth Núñez, Alba Navarro, Rocío Varela, Noly, Antonio Barros, Danni Lamas e Iria Quintáns loitarán por converterse na voz capaz de conquistar o público de todas as xeracións (22.30 h)

Emoción ata o último momento en 'A Liga dos Cantantes Extraordinarios', que esta noite celebra a súa gran final

Santiago, 09.09.2021.-    Logo de dez xornadas intensas cargadas de emocións, o programa ‘A Liga dos Cantantes Extraordinarios’ ten xa oito finalistas cun único obxetivo: converterse na voz capaz de conquistar o corazón de netos, casadeiros, pais e avós.

Alejandra Pais e Ruth Núñez encabezan esta gran final como líderes dos sofás. Únense a elas Alba Navarro, Rocío Varela, Noly, Antonio Barros, Danni Lamas e Iria Quintáns, gañadora da semifinal da semana pasada. Todos eles cantarán esta noite nun extraordinario espectáculo, dirixido por Paco Lodeiro, que amosará o gran talento dos concursantes.

Ademais, o espazo da Televisión de Galicia contará coa presenza como convidada especial de Noelia Solleiro, gañadora do concurso da canción do verán da CRTVG co tema ‘Vive Galicia’. Será un programa cheo de emocións ata o último momento, que suporá o broche de ouro a unha temporada espectacular de ‘A Liga dos Cantantes Extraordinarios’.

ler máis

A TVG lidera a información e o entretemento da televisión en Galicia

08/09/2021

O ‘Galicia Noticias’ foi onte o programa máis visto, non só de toda a televisión, senón tamén de calquera outro medio ou soporte, cunha cota de pantalla do 25,2% e unha audiencia media de 143.000 espectadores

O concurso ‘Atrápame se podes’ foi a emisión máis seguida no prime time, cun 15,4% de share e 139.000 televidentes de media

A TVG lidera a información e o entretemento da televisión en Galicia

Santiago, 08.09.2021.-    A TVG acadou na xornada de onte o liderado informativo e o de entretemento en Galicia. O programa ‘Galicia Noticias’ foi o contido máis visto, non só de toda a televisión, senón tamén de calquera outro medio ou soporte. Este informativo tivo unha cota de pantalla do 25,2% e contou cunha media de 143.000 espectadores. A longo da súa emisión, o programa conseguiu chegar a 182.000 espectadores.

Outro espazo da TVG, o concurso ‘Atrápame se podes’, foi o programa de entretemento de maior audiencia en Galicia e a emisión máis vista do prime time ou faixa de maior consumo televisivo. Rexistrou unha audiencia media de 139.000 espectadores, unha cota de pantalla do 15,4% e foi quen de chegar a 215.000 televidentes.

Outros programas que salientan nas audiencias do 7 de setembro son o ‘Telexornal Mediodía’, cun 20,8% de share e unha media de 137.000 espectadores, con picos de 249.000, e o programa ‘Casamos!’, que anotou unha cota de pantalla do 13,7% e unha audiencia media de 110.000 espectadores, pero que ao longo da súa emisión conseguiu chegar a 256.000 persoas.

Na xornada de onte, a Televisión de Galicia acadou unha cota media no conxunto do día do 11,1%, mentres que na franxa do prime time a cota ascendeu a un 12,9%.

ler máis