CRTVG

Buscar

CRTVG Viva

Revolución no 'Land Rober' ao xuntar hoxe dous grandes pintamonas: os actores Luis Zahera e Antonio Garrido

26/03/2020

Desenvolveranse respectivas entregas cos mariscadores e do ‘Quen vés sendo?’ e o equipo do espazo coarase na casa dun famoso, en directo, para que o presentador e a audiencia resolvan a súa identidade, entre outras propostas divertidas

Revolución no 'Land Rober' ao xuntar hoxe dous grandes pintamonas: os actores Luis Zahera e Antonio Garrido

Santiago, 26.03.2020.-  O programa de humor da noite dos xoves na TVG, liderado por Roberto Vilar, volve levar comedia ao domicilio da xente co ‘Land Rober Comedia a Domicilio’ (22.10 h). Esta noite, xuntará dous pintamonas dos pés á cabeza: os actores Luis Zahera e Antonio Garrido. Un galego e un andaluz, case galego, que van facer das súas nunha noite de risas aseguradas!
 
Por se fose pouco volven as historias de mariscadores! Josito toma ao pé da letra o da corentena e non vai saír do seu dormitorio nin para falar cos seus pais, Paco e Maruxa.
 
Ademais do humor, non faltarán as sorpresas. Hoxe, o equipo do ‘Land Rober’ coarase na casa dun famoso, en directo, para axexarlle todo ata descubrir a súa identidade. Será quen a audiencia de adiviñar de quen se trata?
 
E para que a xente non se aburra nas súas casas, unha nova entrega do 'Quen vés sendo?'... Cal será a incrible historia da señora?

ler máis

Os espectadores de 'Come a comarca' coñecerán esta noite a riqueza gastronómica de Deza

25/03/2020

O equipo de cociñeiros do programa enfrontaranse aos mellores profesionais da zona preparando empanada de liscos, minihamburguesas de cocido e rosquillas

Os espectadores de 'Come a comarca' coñecerán esta noite a riqueza gastronómica de Deza

Santiago, 25.03.2020.-  Televisión de Galicia ofrece este mércores a segunda entrega do programa 'Come a comarca' (22.30 h), en que cinco cociñeiros afeccionados viaxan a cada unha das comarcas galegas para coñecer os seus pratos típicos e enfrontarse aos mellores cociñeiros profesionais de cada zona preparando os pratos en que son especialistas.

O equipo de cociñeiros de 'Come a comarca' visita hoxe a comarca de Deza para coñecer os segredos da súa gastronomía e aprender a facer o seu menú máis tradicional, composto por empanada de liscos, mini-hamburguesas de cocido e rosquillas.

Alejandro Iglesias, xefe do restaurante Cabanas, será o encargado de guiar os concursantes pola gastronomía do Deza. Para aprender a preparar estes pratos, os cociñeiros afeccionados irán a Embutidos La Lalinense, en Lalín, a aprender a facer un cocido reinventado en hamburguesa. En Prado, Lalín, visitarán o Muíño de Cuíña e aprenderán a facer as mellores empanadas do mundo con Carme Pillado e Lola Sangiao, dúas senlleiras gañadoras da Empanada de Bandeira. Por último, visitarán os veciños de Abades, en Silleda, para que lles ensinen a amasar e darlle forma á sobremesa máis característica da comarca, a rosquilla.

Unha vez desvelados os segredos das tres receitas, os cinco cociñeiros afeccionados do programa enfrontaranse nun concurso popular, na Praza da Igrexa de Lalín, aos mellores cociñeiros da comarca facendo eses pratos: Alberto González e Esperanza Taboada, do Bodegón Currás (Lalín); as irmás Cristina e Cecilia Sanmartín, de Casa San Martín (O Corpiño, Lalín), e José Marcelino Varela, da Confitería Tábora (Silleda). A súa habilidade nos fogóns e un xurado popular composto por 15 veciños da comarca será quen decida o equipo gañador.
 

ler máis

O cociñeiro Adrián Felípez visita hoxe o 'Larpeiros Social Club', onde preparará unhas perdices á cazadora

24/03/2020

O menú desta semana completarase cunha minestra de verduras e unha torta de plátano con chocolate e caramelo (22.30 h)

O cociñeiro Adrián Felípez visita hoxe o 'Larpeiros Social Club', onde preparará unhas perdices á cazadora

Santiago, 24.03.2020.-    Na xuntanza deste martes no ‘Larpeiros Social Club’ non van faltar receitas, amigos, música e moita festa. Todos ansían hoxe a chegada de Adrián, que anunciou desde ben cedo que tiña pensado ‘cazar’ algo para facer a comida. Con esta promesa no aire, os que agardan no club fan os seus propios plans.

Benigno será o encargado de facer un primeiro prato de moito requinte, unha desas receitas sinxelas e cheas de encanto que o fixeron famoso: unha clásica minestra de verduras, rica e saudable.

O cociñeiro convidado, Adrián Felípez, sorprenderá os comensais cunhas perdices á cazadora, con verduras, aromáticos e moita sabedoría. E, de sobremesa, Merchi pensará nunha torta que faga as delicias dos máis pintados: unha torta de plátano con chocolate e crema de caramelo.


ler máis

A web da CRTVG achégalles aos estudantes o bloque educativo da G2 en emisión simultánea

23/03/2020

A Corporación favorece así a accesibilidade a estes espazos educativos desde calquera soporte, entre as 11:00 e as 13:00 horas

A CRTVG, en colaboración coa Consellería de Educación, Universidade e Formación Profesional, puxo en marcha esta  iniciativa, na G2 desde o luns, para facilitar un complemento educativo aos contidos que os alumnos reciben dos centros de ensino 

A web da CRTVG achégalles aos estudantes o bloque educativo da G2 en emisión simultánea

Santiago, 23.03.2020.-    A web da CRTVG súmase, desde este martes, á emisión do bloque educativo que está ofrecendo a segunda canle da Galega como apoio aos estudantes galegos, mentres os centros escolares permanecen pechados atendendo as restricións para loitar contra o coronavirus. En emisión simultánea coa G2, de luns a venres e entre as 11:00 e as 13:00 horas, os usuarios da páxina web poderán seguir estes contidos desde calquera soporte.

ler máis

A TVG estrea esta noite a premiada comedia 'Eroski Paraíso', filme sobre o cambio de España nos últimos 35 anos

23/03/2020

A trama está baseada en historias reais que aconteceron na sala de festas Paraíso, en Muros, agora convertida nun supermercado

 

A TVG estrea esta noite a premiada comedia 'Eroski Paraíso', filme sobre o cambio de España nos últimos 35 anos

Santiago, 23.03.2020.-  Televisión de Galicia estrea esta noite, en ‘prime time’, a longametraxe galega ‘Eroski Paraíso’ (22.30 h), comedia documental dirixida por Jorge Coira e Xesús Ron, coa que Miguel de Lira e Patricia de Lorenzo acaban de gañar respectivos Premios Mestre Mateo áo mellor actor e actriz protagonista. Esta metáfora, en clave de humor, sobre a gran transformación social de España nos últimos 35 anos, é unha produción de Chévere e Ojo Vivo.

‘Eroski Paraíso’ naceu coma unha obra de teatro creada pola compañía Chévere, Premio Nacional de Teatro 2014, que, despois dunha xira de varios anos por España e éxito de público, converteuse en longametraxe. A peza, que conta nos papeis principais con Patricia de Lorenzo, Miguel de Lira e Cris Iglesias, está baseada en historias reais que aconteceron no Paraíso, unha famosa sala de festas de Muros, que pechou en 1990 e que actualmente é o supermercado Eroski.

A película narra a historia de Álex, unha nova cineasta, que decide facer un documental sobre a historia dos seus pais, agora divorciados. Antonio e Eva coñecéronse na sala de festas Paraíso, en 1989, casaron e tiveron unha filla.

ler máis

A saúde mental de Eva Mayo e unha perigosa rede de prostitución, eixes da segunda temporada de 'O sabor das margaridas', que hoxe estrea a TVG

22/03/2020

Despois de cumprir condena por suplantar a identidade da tenente Rosa Vargas, a protagonista intentará refacer a súa vida ata que recibe a noticia do secuestro de Rebeca e se pon a investigar

A saúde mental de Eva Mayo e unha perigosa rede de prostitución, eixes da segunda temporada de 'O sabor das margaridas', que hoxe estrea a TVG

Santiago, 22.03.2020.- Este domingo chega á Televisión de Galicia a agardada segunda temporada de ‘O Sabor das Margaridas’ (22.30 h), a serie que triunfa en medio mundo e que foi a primeira ficción en galego incluída no catálogo de Netflix, chegando a 180 países subtitulada en 30 linguas.

Na primeira temporada, entre as pistas falsas e verdadeiras, dúas incógnitas tiveron en vilo os espectadores: quen secuestrou a Marta Labrada e onde está? A isto engadíuselle un xiro final imprevisible: a verdadeira identidade de Rosa Vargas, a protagonista, interpretada pola actriz María Mera. Esta segunda temporada afondará na psicoloxía de Eva Mayo, un personaxe cunha mente complexa e enferma que pode agochar moitos segredos.

Nesta nova quenda de capítulos, a audiencia verá como, tras resolver o caso da morte de súa irmá e destapar unha trama de prostitución na pequena vila de Murias, a ex garda civil Eva Mayo acaba en prisión polo secuestro e suplantación de identidade da tenente Rosa Vargas. Desgraciadamente, unha das probas máis importantes da investigación, o vídeo gravado por Marta Labrada nunha das festas, onde se involucra xente moi poderosa na morte de varias prostitutas, desaparece misteriosamente, quedando impunes os verdadeiros responsables da morte de súa irmá, Margarida, e de Pamela.

Eva cumprirá condena obsesionada coas imaxes desa macabra festa, convencida de que os responsables intentan desfacerse de todos os que viron a gravación. A obcecación leva a Eva ao límite da súa saúde mental, desenvolvendo un trastorno psiquiátrico que terá que controlar con abundante medicación.

Despois de cumprir condena, Eva Mayo sae do cárcere e intenta, con moitas dificultades, superar os seus problemas mentais e refacer a súa vida. Ata que un día recibe a chamada de Mauro para contarlle que secuestraron a Rebeca e que a súa vida corre perigo. Mauro pídelle a Eva que vaia ver a Il’ya Antonovich Kharpov, un personaxe enigmático que a axudará a encontrala, xa que a policía podería estar implicada no asunto.

Eva comezará a investigar e achegarase aos membros dunha perigosa rede de prostitución, para buscar pistas sobre o paradoiro de Rebeca, cando ocorre algo inesperado: as persoas coas que está contactando morren de forma violenta e teñen todas un mesmo sinal: unha margarida na boca. Alguén a está a seguir? Por que unha margarida? É unha pista para ela? Quere alguén incriminar a Eva nestes asasinatos?

A policía nacional, liderada polo inspector Raúl Salgado, a quen dará vida Santi Prego, tratará de atopar o culpable duns asasinatos sen conexión aparente, excepto un elemento común: a margarida.

ler máis

A CRTVG emitirá de luns a venres, pola G2, un bloque educativo para apoiar os estudantes galegos

21/03/2020

En colaboración coa Consellería de Educación, Universidade e Formación Profesional, a  iniciativa busca facilitar un complemento educativo aos contidos que os alumnos reciben dos centros de ensino  

 

A CRTVG emitirá de luns a venres, pola G2, un bloque educativo para apoiar os estudantes galegos

Santiago de Compostela, 21.03.2020.- A Televisión de Galicia vai emitir, desde o luns e pola súa segunda canle, a G2, un bloque de programación educativa. De luns a venres, entre as 11.00 e as 13.00 horas, este bloque emitirase mentres os centros escolares permanecen pechados atendendo as restricións para loitar contra coronavirus. Esta medida foi aprobada este sábado polo Centro de Coordinación Operativa establecido en Galicia para tratar a emerxencia.

ler máis

As cantantes galegas Lucía Pérez e Patricia Moon actúan esta noite en 'Bamboleo'

21/03/2020

Ao longo de toda a noite, o programa presentado por Xosé Manuel Piñeiro estará amenizado pola orquestra La Ola ADN

As cantantes galegas Lucía Pérez e Patricia Moon actúan esta noite en 'Bamboleo'

Santiago, 21.03.2020.- Coa chegada do sábado á noite, a TVG tenlles preparada aos espectadores unha nova velada de entretemento, a cargo de Xosé Manuel Piñeiro, o mestre de cerimonias dun ‘Bamboleo’ (22.00 h) que ofrece un bo anaco de lecer coas variadas seccións do programa e con actuacións adaptadas a todos os gustos musicais.
    
A primeira actuación que fará as delicias da audiencia é a da cantante galega Lucía Pérez, que celebra 15 anos no mundo da música cun novo disco. Tras o éxito de ‘Quitapenas’, chega o seu sétimo álbum, titulado ‘Quince soles’, gravado integramente en galego e que contou coas colaboracións de Chenoa, Rosa Cedrón, Tonhito de Poi, Sito Sedes e o seu irmán, o cantautor Vizcaíno, co que tamén actuará esta noite.

Cambiando de rexistro, esta noite actuará en ‘Bamboleo’ a cantante, compositora, violinista e pianista viguesa Patricia Moon, que, a cabalo entre o soul, a música clásica, o blues, o grunge e o rock, presenta un son duro con letras cheas de tinguiduras persoais. O programa da TVG tamén contará coa presenza da orquestra La Ola ADN.

No que respecta ás seccións de ‘Bamboleo’, en ‘Agora ou Nunca’, dous participantes, Andrea Iannone e José Ferradás, amosarán os seus dotes artísticos. A primeira, interpretando ‘Quando a chuva passar’, de Ivete Sangalo, e, o segundo, o clásico ‘Granada’.

Ademais, desenvolveranse ‘A ITV do amor’, co obxectivo de acertar cal é a verdadeira parella dunha persoa e, ‘Dirtidansi’, onde nesta edición Marcos e Nuria bailarán rumba, bolero e jive. Finalmente, ‘A Jrileira’ enfrontará ao karaoke dous concursantes, Noemí e Telmo, que cantarán ‘El anillo’, de Jennifer López.

ler máis

A película 'Sempre Xonxa', accesible na web da CRTVG con motivo do 25 aniversario da morte de Chano Piñeiro

20/03/2020

A partir deste sábado, poderase ver un dos títulos míticos da historia do cine galego, a primeira longametraxe rodada íntegramente en Galicia e na nosa lingua

A película 'Sempre Xonxa', accesible na web da CRTVG con motivo do 25 aniversario da morte de Chano Piñeiro

Santiago, 20.03.2020.-    Con motivo do 25 aniversario da morte de Chano Piñeiro, pioneiro do cine galego e símbolo para as seguintes xeracións de cineastas, a partir de mañá, a web da CRTVG terá accesible a súa película ‘Sempre Xonxa’, a primeira longametraxe rodada integramente en Galicia e totalmente en galego e convertida co paso do tempo nunha icona do noso audiovisual

Humor e realismo máxico mestúranse nun dos títulos míticos da historia recente do cine galego, a terceira das tres históricas longametraxes -incluídas ‘Urxa’ e ‘Continental’- estreadas no marco de Cinegalicia, en novembro de 1989.

Con Uxía Blanco como protagonista, ‘Sempre Xonxa’ conta a historia dunha muller, Xonxa, e dous homes, Pancho e Birutas, e as relacións entre os tres, nunha remota aldea galega, desde a súa infancia, en 1947, ata a súa madurez, en 1986. O filme de Chano Piñeiro é tamén a historia da emigración en dúas das súas vertentes (éxito e miseria), da complexidade das relacións humanas, das lendas e da realidade e dunha aldea que morre perdida nos montes de Galicia.

ler máis

A CRTVG suxire cada día aos galegos unha serie distinta, desde o seu catálogo enserie.gal

20/03/2020

Cada tarde, a Corporación convida á audiencia a ver un título diferente, dentro do proxecto 'Corentena en galego'

En enserie.gal atópanse as producións máis coñecidas da TVG como 'Pratos combinados', 'A vida por diante', 'Mareas vivas', ou máis recentes como 'A estiba', que xa está dispoñible enteira na web, entre moitas outras

A CRTVG suxire cada día aos galegos unha serie distinta, desde o seu catálogo enserie.gal

Santiago, 20.03.2020.- A Corporación Radio e Televisión de Galicia comezou esta semana a convidar os galegos a pasar a 'Corentena en galego', nun proxecto nas redes sociais co que se vai propoñer cada día unha serie en galego das que a TVG ten a disposición do público no seu catálogo de series enserie.gal.

ler máis