CRTVG

Buscar

CRTVG Viva

'Latexos da Cidade' comezará a xornada na lonxa da Coruña e remataraa na estación do tren de Ourense

10/07/2019

Tamén estará en Vigo cunha traballadora de Correos e acompañará en Santiago un grupo de guías turísticos (22.00 h.)

'Latexos da Cidade' comezará a xornada na lonxa da Coruña e remataraa na estación do tren de Ourense

Santiago, 10.07.2019.-   Unha semana máis, ‘Latexos da Cidade’ continuará medindo o pulso das cidades galegas. Neste programa, a xornada comezará na Coruña, onde poxadores e praceiros madrugan para vender e mercar o peixe e marisco que logo chegará aos nosos pratos. Xa de mañá, poñemos rumbo a Vigo, onde Luz, traballadora de Correos, percorrerá a cidade intentando entregar todos os paquetes posibles.
    
Despois de comer é hora de visitar Santiago e da man de alguén que a coñece moi ben: un grupo de guías turísticos que están a facer unha visita guiada gratuíta, con fins solidarios. ‘Latexos da Cidade’ rematará o día en Ourense, onde a estación do tren é lugar de paso para viaxeiros que veñen e van.

ler máis

A CRTVG e o Círculo Financiero de Galicia asinan un convenio de colaboración para actuacións conxuntas

09/07/2019

A primeira acción destacada de colaboración será a organización do evento Galicia Global os días 24, 25 e 26 de outubro de 2019

O Círculo Financiero de Galicia aglutina os tres grandes círculos empresariais de Galicia: a Asociación Círculo Empresarios de Galicia, de Vigo, o Club Financiero Atlántico da Coruña, e o Club Financiero de Santiago

A CRTVG e o Círculo Financiero de Galicia asinan un convenio de colaboración para actuacións conxuntas

Santiago, 09.07.2019.-  A Corporación de Radio Televisión de Galicia e o Círculo Financiero de Galicia asinaron hoxe un convenio para levar a cabo accións conxuntas de colaboración. O acordo foi rubricado na sede da CRTVG polo director xeral da Corporación, Alfonso Sánchez Izquierdo e por Roberto Pereira Costa, presidente do Círculo, en presenza da empresaria Rosa Blanca Rodríguez e os empresarios Ramón Sabín e José María Fernández.

ler máis

'Land Rober Tunai Show', recoñecido como mellor programa de entretemento nos Premios Cantábrico Excelente

09/07/2019

Este programa de humor da TVG presentado por Roberto Vilar recibiu o galardón na Coruña

'Land Rober Tunai Show', recoñecido como mellor programa de entretemento nos Premios Cantábrico Excelente

Santiago, 10.07.2019.- O programa da TVG 'Land Rober Tunai Show' recibiu o galardón da categoría de Entretemento na V Edición Premios Cantábrico Excelente, que recoñecen o labor de profesionais, empresas e institucións das rexións do norte de España: Galicia, Cantabria, Asturias, País Vasco e Navarra.

ler máis

'A Noite de Miguel de Lira' repasará a traxectoria deste actor na TVG e descubrirá as anécdotas máis divertidas de 'Mareas Vivas'

09/07/2019

Os espectadores lembrarán os seus inicios na canle autonómica e as súas principais colaboracións, tanto en solitario coma co grupo Chévere

'A Noite de Miguel de Lira' repasará a traxectoria deste actor na TVG e descubrirá as anécdotas máis divertidas de 'Mareas Vivas'

Santiago, 09.07.2019.-  A TVG dedica esta semana o biopic televisivo ‘A Noite de...’ (22.25 h.) ao actor Miguel de Lira. Aínda que moita xente pensa que se apelida así, os espectadores descubrirán en Miguel Domingo García Martínez un auténtico embaixador do lugar onde naceu, ata o punto de utilizalo como nome artístico.

O programa fará un repaso da súa traxectoria na Televisión de Galicia, marcada, sobre todo, pola súa participación na serie ‘Mareas Vivas’, emitida por primeira vez hai xa 20 anos e que supuxo un antes e un despois para o audiovisual galego. O seu personaxe secundario, Evaristo Currás, acabou converténdose en protagonista e nun dos favoritos do público. Miguel de Lira explicará como preparou o personaxe e de onde xurdiron as súas expresións máis populares, ademais de desvelar as anécdotas máis divertidas da rodaxe da serie.

Pero as súas primeiras aparicións na canle autonómica galega remóntanse a moitos anos atrás, a finais dos anos 80, cando con Chévere, o seu grupo de teatro, realizaba sketchs en programas como ‘Unha de romanos’ e ‘Velaí’. Ademais, Chévere presentou en varios espazos da TVG, antes das súa estrea nas táboas, distintas escenas de ‘Río Bravo’, unha das súas obras máis emblemáticas.

Ademais dos seus inicios e da súa eclosión en ‘Mareas Vivas’, recuperaranse as súas principais colaboracións coa Galega, desde as aparicións nos programas ‘Land Rober’ e ‘Tourilandia’ ata a participación en películas como ‘A Esmorga’ e ‘Crebinsky’, pasando polo seu papel protagonista na miniserie ‘Códice’, sobre o mediático roubo do Códice Calixtino.

Tamén haberá tempo para recuperar do arquivo da TVG un dos vídeos máis estraños e surrealistas: a entrevista nunha sauna e en albornoz que Jimmy Jiménez Arnau lle fixo no ano 1989 para o programa ‘Arestora’.

ler máis

RG Música ofrece a través de Facebook Live o concerto presentación do primeiro disco de Pablo Sanmamed Trío

09/07/2019

Este novo recital poderase seguir no Facebook da Radio Galega este mércores, ás 22.00 horas

RG Música ofrece a través de Facebook Live o concerto presentación do primeiro disco de Pablo Sanmamed Trío

Santiago, 09.07.2019.- O programa ‘Notas de Jazz’ de Radio Galega Música ofrece este mércores un novo concerto, vía Facebook Live, ás 22.00 horas. Nesta ocasión, correspóndese coa agardada presentación do disco de estrea de Pablo Sanmamed Trío, que leva por título 16/04.

O grupo, liderado polo contrabaixista Sanmamed, con Iago Mouriño ao piano e Bruno Couceiro na batería, agasallou os asistentes no Teatro Principal de Santiago de Compostela con composicións orixinais nas que se intúen distintas sonoridades de raíz. que van desde os valses franceses (‘Setembro’), música pensada para cuarteto de corda (‘L.H.’), ás horas romanesas (‘Dúas Mulheres’) ou á música feita con cuarteto de corda (‘Dujmey tinqu’). Neste disco de excepción da nova escena do jazz galego cómpre salientar que a maioría dos temas son do propio Pablo.

Con estas emisións, Radio Galega Música pretende establecer novas relacións coa audiencia aproveitando as posibilidades que permiten as ferramentas dixitais para achegar os sons galegos e os distintos xéneros musicais ao público máis novo. O concerto estará dispoñible nos audios da web da Radio Galega e na sección #cultura365 da páxina da CRTVG.

ler máis

O programa 'Casamos!' volve hoxe á TVG coa historia de amor de Esther e Samuel

08/07/2019

Tras cinco anos de relación e unha pedida de man ben orixinal, dan un paso máis na súa relación cunha voda íntima e chea de detalles

O programa 'Casamos!' volve hoxe á TVG coa historia de amor de Esther e Samuel

Santiago, 08.07.2019.-    As historias de amor máis románticas volven á Televisión de Galicia cunha nova temporada de “Casamos!” (22.00 h.), o programa que ofrece un retrato coral sobre o universo das vodas en Galicia.

Esther e Samuel, os protagonistas desta noite, estaban preto e lonxe á vez. Os dous traballaban na mesma empresa gasolineira, iso si, un en Raxó e o outro na Pobra do Caramiñal. O destino quixo que se xuntaran para ir a unha reunión en Madrid, á que en principio non estaban convocados.

Axiña conectaron e comezaron a quedar, pero a distancia pesaba moito na súa relación e causaba estragos. Tamara, a filla de Samuel, foi a que primeiro se mudou xunto a Esther, e Samuel non tardou en facer as maletas e unirse á familia.

ler máis

Brasil-Perú, a gran final da Copa América de fútbol, xógase este domingo á noite, en directo, na TVG

07/07/2019

Poderase ver a partir das 22.00 horas pola canle pública, en exclusiva, en aberto para Galicia 

Brasil-Perú, a gran final da Copa América de fútbol, xógase este domingo á noite, en directo, na TVG

Santiago, 07.07.2019.- Televisión de Galicia ofrece este domingo, en exclusiva, en aberto para Galicia, a gran final da Copa América de fútbol que, contra todo prognóstico, enfrontará a selección anfitrioa Brasil contra Perú, tras derrotar en semifinais a actual campioa Chile.

O partido, que se xogará no mítico estadio Maracaná do Río de Xaneiro, poderase seguir en directo pola TVG, a partir das 21.50 horas, e contará como comentaristas con Gustavo Varela, Luis Timiraos e Álex Couto.

A Galega é a única canle en España que está ofrecendo os partidos da 46 edición da Copa América 2019 en aberto. Desde o comezo, está transmitindo os dez partidos máis destacados do principal torneo futbolístico entre as seleccións dos países de América do Sur, o máis antigo do mundo.

ler máis

A cantante María Villalón e o grupo Atacados, convidados no 'Bamboleo' deste sábado

06/07/2019

O espazo presentado por Lucía Regueiro (22.45 h.) tamén ofrecerá as actuacións da artista galega Mari Costa e de Los Satélites, unha das orquestras con máis historia de Galicia

A cantante María Villalón e o grupo Atacados, convidados no 'Bamboleo' deste sábado

Santiago, 06.07.2019.-  'Bamboleo’, o programa de entretemento da TVG dos sábados á noite, recibirá hoxe a visita da cantante, compositora e escritora María Villalón, cuxa música bebe de xéneros coma o fado e a copla. A intérprete malagueña comezou a cantar aos tres anos e aos 18 chegoulle a súa grande oportunidade tras gañar o concurso ‘Factor X’ en 2007 e, máis recentemente, tamén resultou gañadora do programa ‘Tu Cara me Suena’.

Tamén estarán este sábado en ‘Bamboleo’ Atacados, banda de pop rock formada en Madrid en 2006. O seu estilo musical fusiona ritmos pop rock, punk californiano e guitarras potentes. Tras alcanzar case un millón de visitas co sinxelo ‘Hasta que salga el sol’, presentan o seu novo sinxelo, ‘Nadie como tú’, un tema cargado de enerxía e diversión.

O espazo presentado por Lucía Regueiro contará ademais coas actuacións da cantante galega María Costa, que interpretará ‘Para ver sorrisos has ter que soñar’, e de Los Satélites, unha das orquestras con máis historia e tradición de Galicia.

No escenario tamén estarán Diana Durán, interpretando ‘Lía’, de Ana Belén, e Ismael Rodríguez, co tema ‘Y nos dieron las diez’, de Joaquín Sabina, competindo ambos os dous na sección ‘Agora ou Nunca’.

Coma sempre, ‘Bamboleo’ contará coas seccións ‘ITV do amor’, onde un concursante terá que adiviñar cal é a verdadeira parella dunha persoa a partir de certas probas; ‘A Jrileira’, onde Tamara e Natalia se enfrontarán ao karaoke cantando ‘Ahora te puedes marchar, de Super Junior, e ‘Dirtidansi’, en que Marcelo e Belén bailarán rumba.

ler máis

As Azúcar Moreno e a emblemática orquestra El Combo Dominicano poranlle ritmo a esta noite de venres no 'Luar'

05/07/2019

O espazo da TVG (22.00 h.), que comeza hoxe as semifinais de ‘Recantos’ e ‘Vai de Baile’, ofrecerá tamén as actuacións do Coro Galego Santa Comba de Veigue, da A.F. Colexiata do Sar e das Pandeireteiras Agrocovo de Esteiro, entre outros

As Azúcar Moreno e a emblemática orquestra El Combo Dominicano poranlle ritmo a esta noite de venres no 'Luar'

Santiago, 05.07.2019.-   Os ritmos e a ledicia que achegan as Azúcar Moreno en cada unha das súas actuacións serán un dos pratos fortes da velada musical que propón hoxe o programa ‘Luar’. O dúo de irmás, formado por Encarna e Toñi Salazar, interpretará algúns dos seus éxitos máis recentes.

Outra das actuacións estelares da noite será a da emblemática orquestra El Combo Dominicano, todo un fenómeno de masas, especialmente entre a mocidade galega, que en cada actuación arrastra unha lexión de seguidores. Expertos en sons caribeños e ritmos frenéticos, chegaron a Galicia desde as Illas Canarias no 2005 e non pararon de medrar ata converterse nun auténtico fenómeno social.

O espazo da TVG tamén contará coa presenza dos cantantes Fran Amil e Gonzalo Brea, do Coro Galego Santa Comba de Veigue, da A.F. Colexiata do Sar, das Pandeireteiras Agrocovo de Esteiro e da agrupación tradicional burgalesa Tierra Noble.

Pero, sen dúbida, un dos momentos cumio da noite será o comezo das semifinais nos concursos do programa. O primeiro finalista do ‘Vai de Baile’ sairá hoxe do duelo entre Ventos da Graña e Garatuxas da Fiada, mentres que en ‘Recantos’ enfrontaranse por unha praza na final A China, representante da comarca da Arousa, e Iria González, procedente de Ourense sur.

ler máis

O concerto de Carlos Barruso, emitido no Facebook da Radio Galega, alcanza os 6.400 seguidores

05/07/2019

O programa 'Notas de jazz', de Radio Galega Música, ofrecerá o próximo mércores a presentación do disco de Pablo Sanmamed Trío en Compostela

O concerto de Carlos Barruso, emitido no Facebook da Radio Galega, alcanza os 6.400 seguidores

Santiago, 05.07.2019.-  Crece a audiencia dos usuarios do Facebook da Radio Galega en cada emisión dun novo concerto en salas por parte do programa 'Notas de jazz', de Radio Galega Música. Nesta ocasión, foi o saxofonista galego Carlos Barruso o músico que acadou o maior apoio ao alcanzar un seguimento de 6.400 persoas e obter máis de 2.000 interaccións. Barruso ofreceu o seu espectáculo 'Fin de vida', unha variada proposta de jazz, blues e funky, desde o Filloa Jazz da Coruña.

O seguinte recital, que o programa que dirixe Xabier Facal emitirá por Facebook Live, será o próximo mércores 10 de xullo, ás 22.00 horas, con Pablo Sanmamed Trío. A emisora pública ofrecerá o concerto co que o contrabaixista galego presentou o seu disco de estrea '16/04', no Teatro Principal de Santiago de Compostela. Radio Galega Música quere, deste xeito, establecer novas relacións coa audiencia aproveitando as posibilidades que permiten as ferramentas dixitais para achegar os sons galegos e os distintos xéneros musicais ao público máis novo.

ler máis