Santiago, 08.06.2014.-   Esta noite comeza na Televisión de Galicia unha nova temporada de “Vaia Troula” (22.30 horas), unha guía imprescindible para os espectadores que queiran coñecer e seguir de preto as festas e romarías galegas de todo tipo e condición. 

Santiago, 07.06.2014.- As noites do sábado na Televisión de Galicia acollen a partir semana unha nova temporada de “Bamboleo” (22.05 h.), o grande espectáculo que presenta Xosé Manuel Piñeiro. As mellores orquestras do país e artistas ben coñecidos polos espectadores actuarán no estudio de gravación do programa.

Santiago, 06.06.2014.- Música, diversión, humor, maxia, folclore, tradición... Estes serán un venres máis algúns dos ingredientes do programa “Luar” (22.05 horas), que esta noite recibirá a visita de Luar na Lubre, a banda folk máis internacional de Galicia, que desde hai preto de 30 anos levan recorrendo o planeta achegando a música e a cultura galegas a través da súa proposta. Ademais de deleitar os espectadores coa súa música, falarán do seu novo espectáculo, “Torre de Breoghán”, que gravarán dentro dun par de semanas xunto coa Orquestra Sinfónica de Galicia.

Santiago, 05.06.2014.- Esta noite en “A Casa da Conexa” (22.50 horas) o mundo da moda chega a Ardebullo e ás vidas das súas protagonistas, Mucha e Nucha. Con moito humor, as irmás máis famosas da Televisión de Galicia achegaranlles aos espectadores as últimas tendencias da moda acabadas de chegar das pasarelas a Ardebullo, non sen antes de desvelar algúns segredos de beleza e moda dalgúns dos seus veciños. Ademais, hoxe elixirán a Miss Ardebullo e o grupo Heredeiros da Crus presentará o seu novo traballo discográfico nesta particular vila. 

Santiago, 04.06.2014.- A segunda canle da Galega, a tvG2, e a web da CRTVG  (www.crtvg.es/deportes) ofrecerán, en directo, a serie de semifinais da Liga Endesa polo título ACB, que disputarán o Real Madrid e o Unicaja. A eliminatoria, que se xoga ao mellor de cinco partidos, dará comezo este venres, ás 20.15 horas.

Santiago, 03.06.2014.- O programa da TVG “Boa Nova” (23.20 horas), que afonda nas vivencias e nas emocións de futuros nais e pais no último mes de embarazo e que acompaña a familia nos preparativos para o acontecemento, terá hoxe como protagonistas a Ana e Antonio. Xuntos agardan a Gonzalo, un bebé moi desexado que chega nunha etapa madura das súas vidas.

Santiago, 02.06.2014.- Que en Galicia somos de bo comer non é nada novo, que non precisamos moito para organizar unha festa arredor da mesa, tampouco. Baixo esta premisa, a partir deste luns, os espectadores da Televisión de Galicia poderán ver, ás 22.50 h., “Sopa de Festa”, un programa producido por Ficción Producciones para a TVG, que nace co obxectivo de ser unha guía imprescindible para seguir o verán gastronómico galego. 

Santiago, 31.05.2014.- A Televisión de Galicia ofrecerá esta noite unha nova edición do programa “Entre familias anda o xogo” (22.05 horas), presentado por Roberto Vilar, un concurso familiar, aderezado cunha importante dose de espectáculo, música e humor, en que cada semana participan tres parellas unidas por un vínculo familiar para conseguir un premio que desexan con forza ou que ten unha carga emocional moi significativa. 

Santiago, 30.05.2014.- Xosé Ramón Gayoso e Lucía Regueiro chegan un venres máis fieis á súa cita cos espectadores da Televisión de Galicia cun completo repertorio de propostas de entretemento, musicais e de humor, que converterán esta noite nun tempo de lecer inesquecible. 

Santiago, 29.05.2014.- Como ser famosa, os preparativos dunha voda en Ardebullo e a visita dun personaxe ben coñecido a esta peculiar vila serán algunhas das tramas que poderán ver esta noite os espectadores da Televisión de Galicia nunha nova edición de “A Casa da Conexa” (22.50 horas).