CRTVG

Buscar

CRTVG Viva

Deportes

Destacadas competicións de remo e motocrós, en directo, esta fin de semana nos medios públicos galegos

05/08/2022

As transmisións arrancan coa competición internacional Coupee de la Jeunesse, en Castrelo de Miño, e coa celebración das Bandeiras de Hondarribia e Getaria de traiñeiras
 
Regresa tamén o Mundial de Motocrós este domingo á G2 e á G24.gal, coa disputa do MXGP de Suecia
 

Destacadas competicións de remo e motocrós, en directo, esta fin de semana nos medios públicos galegos

Santiago, 5.8.2022.-  A oferta deportiva dos medios públicos galegos comeza este sábado no concello ourensán de Castrelo de Miño, coa transmisión en directo da Coupe de la Jeunesse (10.55 h, G2 e G24.gal), unha das probas máis importantes do calendario europeo de remo, entre atletas con idades comprendidas entre os 16 e os 18 anos. Creada en 1985, nesta competición de remo internacional participan uns 400 deportistas e máis de 120 embarcacións procedentes de 16 países europeos.

As máximas competicións de traiñeiras volven ser protagonistas esta fin de semana na Galega, que ofrece o sábado a 35 edición da Bandeira de Hondarribia, novena proba da Liga Euskotren e décimo primeira da Eusko Label, cuxa clasificación lidéraa a embarcación anfitrioa. A proba feminina comezará ás 17.35 h e a masculina, ás 18.05 horas.

Ao día seguinte, a G2 e a g24.gal volverán ser testemuñas da 13 Bandeira de Getaria, cuxo club de remo é a revelación nesta temporada en que debuta na máxima categoría. Poderase seguir en directo a proba feminina, ás 11.35 horas, e a masculina, ás 12.05 horas.

Á marxe do remo, este domingo ofrecerase pola G2 e a G24.gal o MXGP de Suecia (14.00 e 17.00 horas), un novo gran premio do emocionante Campionato do Mundo de Motocrós. Despois de sufrir unha caída e unha operación que non o deixou participar no G. P. de Lommel, Rubén Fernández chega á pista sueca de Uddevalla en boas condicións. Malia a súa ausencia no premio de Lommel, o vigués mantén a sexta posición na xeral, mentres que o lucense Jorge Prado, nun terceiro posto, asiste a esta proba co bo recordo da súa proclamación como campión do mundo de MX2 en 2019. Tim Gajser é o líder da clasificación xeral, cunha vantaxe de 122 puntos sobre o seu rival máis próximo, Jeremy Seewer.


ler máis

As traiñeiras serán protagonistas na G2 esta última fin de semana de xullo

29/07/2022

O sábado ofrecerase en directo a Bandeira de Getxo e o domingo, as Bandeiras Euskotren e Lekeitio, ademais da da Virxe do Carme, correspondente á Liga Galega

As traiñeiras serán protagonistas na G2 esta última fin de semana de xullo

Santiago, 29.07.2022.-    O deporte do remo será esta fin de semana o gran protagonista na oferta da segunda canle da Galega, que o sábado retransmitirá a Bandeira de Getxo, novena proba da Liga Eusko Label e sétima da Euskotren. Este ano presenta a novidade da modificación do campo de regateo, xa que se disputará no Porto Novo. A proba feminina comezará ás 17.45 h e a masculina, ás 18.10 h.

ler máis

Regresan as traiñeiras á CRTVG esta fin de semana, coa disputa da Bandeira de Boiro

24/06/2022

Os medios públicos galegos ofrecerán esta tempada 8 regatas da Liga Galega de Traiñeiras e a Liga ACT ao completo
 
A G2 e a G24.gal/deportes transmitirán tamén o sábado o partido polo título entre Burela-Futsi da 1ª RFEF feminina de Futsal e, o domingo, en directo, o MXGP de Indonesia do Mundial de Motocrós

Regresan as traiñeiras á CRTVG esta fin de semana, coa disputa da Bandeira de Boiro

Santiago, 23.6.2022.-  As competicións de traiñeiras regresan á CRTVG desde esta fin de semana, coa transmisión este domingo, en directo, da Bandeira Concello de Boiro, nas modalidades feminina (12.00 h) e masculina (12.30 h), proba incluída na Liga Galega de Traiñeiras.

Esta tempada, a G2 e a G24.gal/deportes ofrecerán un total de 8 regatas da división A da Liga Galega de Traiñeiras, en que compiten unha ducia de tripulacións: Samertolaméu-Oversea, Tirán-Pereira, Bueu-Teccarsa, Cabo da Cruz, Cesantes-Rodavigo, Mecos, Mera, Mugardos, Narón, Chapela-Wofco, Puebla e  Rianxo. Igual que en edicións pasadas, os medios públicos achegarán todas as regatas que se desenvolvan na Liga Eusko Label e Euskotrén da ACT, as máximas competicións do deporte do remo, que dará comezo en Bilbao na primeira fin de semana de xullo, o próximo día 2. Da ducia de embarcacións que participan na Eusko Label, dúas embarcacións son galegas: Cabo de Cruz e Ares; mentres que no ámbito feminino non haberá representación galega.

Os medios públicos galegos achegarán un novo partido, ás 18.25 horas, do Pescados Rubén Burela contra o Futsi Atlético Navalcarnero, a decisiva cita da final da Liga da Primeira División de fútbol sala feminino. As xogadoras laranxas do Burela, que deberán gañar o encontro se queren acadar o quinto título da súa historia, empataron este pasado mércores e queda todo por decidir no partido deste sábado en Madrid.

Amais, a G2 e a G24.gal/deportes ofrecerán o domingo, en directo, un novo gran premio do Mundial de Motocrós, que cambia de continente para disputar o MXGP de Indonesia (mangas ás 07.00 e 10.00 horas). Tras rematar, por primeira vez, dous galegos entre os catro mellores no pasado MXGP de Alemaña, Jorge Prado intentará volverse facer cun oco no podio. Despois do terceiro posto a semana pasada, o lucense leva oito podios en 11 carreiras no que vai de competición. Pola súa parte, o vigués Rubén Fernández atópase cada vez máis preto dos mellores pilotos do torneo, encabezado polo esloveno Tim Gajser.


ler máis

O Rally de Ourense e as Series Mundiais de Loita Praia, esta fin de semana nos medios públicos galegos

17/06/2022

A G2 e a G24.gal/deportes transmiten ambas disciplinas en directo

O Rally de Ourense e as Series Mundiais de Loita Praia, esta fin de semana nos medios públicos galegos

Santiago, 17.6.2022.-  Os medios públicos galegos desprázanse a Ourense para ofrecer este sábado, en directo, os tramos decisivos do 55 Rally de Ourense, proba puntuable do Supercampionato de España, a única que se celebra en Galicia. A G2 e a G24.gal/deportes transmitirán esta cita ás 12.00 e ás 17.00 horas. O rally de Ourense é a cuarta proba do calendario, unha carreira estelar, en que se pode gozar coa participación dos pilotos de máis nivel en acción.

O domingo, ás 16.30 horas, a G2 e a G24.gal/deportes transmitirán a disputa da segunda etapa das Series Mundiais de Loita Praia desde Sanxenxo. É a primeira vez que se celebra en España unha proba deste campionato ao que acoden os/as mellores loitadores/as da especialidade, 80 deportistas procedentes dunha vintena de países. En representación da selección española de loita praia acoden tres deportistas galegas: Noelia Lalín, Cora Ayude e Pablo García.  


ler máis

Toda a emoción do playoff polo título da OK Liga de hóckey, este martes na G2, co Deportivo Liceo-Noia Freixenet

06/06/2022

A Galega achega, en directo, o partido decisivo da serie que decidirá o pase á final da OK Liga  

Toda a emoción do playoff polo título da OK Liga de hóckey, este martes na G2, co Deportivo Liceo-Noia Freixenet

Santiago, 6.6.2022.-    A G2 ofrece, en directo, o decisivo encontro de hóckey entre o Deportivo Liceo e o Noia Freixenet, que decidirá o pase á final da OK Liga. Tras as últimas dúas derrotas do conxunto coruñés na cancha do Noia, os galegos disputan este martes, a partir das 20.25 horas, o quinto partido de semifinais do playoff polo título na máxima categoría no Pazo dos Deportes da Coruña.

O Deportivo Liceo, que comezou a fase eliminatoria gañando os dous primeiros partidos na casa, afrontou este domingo unha dura derrota en Noia tras encaixar un gol a falta de segundos para o final. Para este último encontro, o club coruñés recupera o factor pista. Pola súa parte, a final disputarase co conxunto que tamén resulte gañador mañá da pugna entre o Barça e o Reus Deportiu.


ler máis

Os medios públicos galegos ofrecen este domingo, en directo, o Gran Premio de Francia de motocrós

04/06/2022

A G2 e a G24.gal achegarán esta décima proba do Mundial de Motocrós, en que destaca a participación galega de Jorge Prado e Rubén Fernández

Os medios públicos galegos ofrecen este domingo, en directo, o Gran Premio de Francia de motocrós

Santiago, 3.6.2022.-  Os medios públicos galegos volven ser o domingo testemuñas do MXGP de Francia, décima proba do Campionato do Mundo de Motocrós. Desde Ernee, a G2 e a G24.gal achegarán, en directo, a participación dos deportistas galegos nas dúas mangas (14.00 e 17.00 horas) deste gran premio.

Despois da cita española da pasada fin de semana, en que o piloto lucense Jorge Prado sufriu unha caída e rematou no quinto posto, dúas prazas por riba do vigués Rubén Fernández, os galegos loitarán por subir ao podio no circuíto francés, nunha competición que lidera ata o momento Tim Gajser.



ler máis

O torneo AF7, tres citas decisivas na 1ª RFEF e en hóckey, e o Mundial de Motocrós, esta fin de semana na CRTVG

27/05/2022

A G2 e a G24.Gal achegarán os partidos clasificatorios e as fases de cuartos, semifinais e final do Arousa Fútbol 7 de fútbol alevín, que disputan os clubs máis importantes do mundo
 
O sábado simultanearanse pola G2 os encontros de fútbol do Deportivo e o Rácing Ferrol

O MXGP Madrid e o arranque do playoff do Deportivo Liceo na OK Liga, o domingo tamén en directo nos medios públicos galegos

O torneo AF7, tres citas decisivas na 1ª RFEF e en hóckey, e o Mundial de Motocrós, esta fin de semana na CRTVG

Santiago, 27.5.2022.-  A celebración do gran torneo de fútbol base, a 25 edición do Arousa Fútbol 7 (AF7), copará boa parte das retransmisións deportivas dos medios públicos galegos esta fin de semana. A G2 e a G24.gal ofrecerán en directo algúns dos partidos clasificatorios máis destacados da xornada do sábado e, o domingo, as fases de cuartos de final, semifinais e final desta competición internacional, que disputan os equipos sub-12 dos clubs máis importantes do mundo.

O sábado poderanse seguir en vivo os partidos do AF7 que disputarán en Ribadumia: Real Madrid-C. D. Areosa (12.05 h), RCD Español-R. C. Celta (12.45 h), F. C. Barcelona-Valencia C. F. (13.25 h), Real Betis-Atlético de Madrid (16.55 h), R. C. Celta-KRC Genk (17.30 h) e Manchester City-F. C. Barcelona (20.30 h). Na xornada do domingo ofreceranse os catro encontros de cuartos de final (9.35 h, 10.15 h, 10.55 h e 14.50 h), as dúas semifinais (16.05 e 17.55 h) e a gran final (18.55 h).

Amais de achegar o torneo de fútbol alevín, os afeccionados ao deporte poderán gozar de citas decisivas na Primeira RFEF de fútbol e na elite do hóckey a patíns e motocrós.

Así, o sábado, a G2 e a G24.gal simultanearán o R. C. Deportivo-Unionistas Salamanca C. F. (18.25 horas) e o Rácing Ferrol-Dux Internacional (18.25 h). Desde Riazor, os coruñeses, no segundo posto da táboa, afrontan esta última xornada da tempada coa vista posta en chegar fortes ao playoff, aínda que tamén coa gañas de resarcirse da derrota no partido de ida. Pola súa parte, os ferroláns están tamén co ollo posto no playoff de ascenso a Segunda, que dará comezo a próxima semana. O conxunto racinguista ten confirmada a terceira posición na clasificación, mentres que o visitante madrileño, asegurada a súa permanencia.

No canto do hóckey a patins, os medios públicos ofrecerán o domingo o arranque das semifinais dos playoff da Parlem OK Liga. O Deportivo Liceo de Juan Copa recibe, ás 11.55 horas, o Noia Freixenet, de Sant Sadurní. Dúas eliminatorias ao mellor de cinco partidos decidirán os dous finalistas, entre Deportivo Liceo, Noia Freixenet, Barça e Reus Deportiu Virginias.

A emoción dispararase tamén esta xornada coa transmisión da novena proba do Mundial de Motocrós, que chega ao circuíto español de Intu Xanadú. Os medios públicos ofrecerán as dúas quendas deste MXGP Madrid, ás 14.00 e ás 17.00 horas. Os galegos Jorge Prado, cuarto na clasificación xeral tras quedar segundo na proba de Sardeña, e Rubén Fernández, nun sexto posto, buscarán gañar diante da súa afección.


ler máis

A G2 achega esta fin de semana senllas citas do Deportivo e Rácing na recta final da liga de bronce do fútbol

13/05/2022

Desde Italia, a segunda canle da Galega e a G24.gal ofrecen o domingo a participación dos pilotos galegos no MXGP de Sardeña
 
Transmisión simultánea na 2ª RFEF do Coruxo-Ximnástica Segoviana e o Arousa-Bergantiños

Os espectadores poderán ver, amais, novos encontros das ligas francesa e portuguesa, que chega a súa fin

A G2 achega esta fin de semana senllas citas do Deportivo e Rácing na recta final da liga de bronce do fútbol

Santiago, 13.5.2022.-  Nova fin de semana deportiva nos medios públicos galegos, coa transmisión pola G2, en directo, de dúas das citas destacadas do fútbol galego, as que protagonizarán Deportivo e Rácing de Ferrol, correspondentes á trixésima xornada da 1ª RFEF. Cómpre salientar, amais, a transmisión do MXGP de Sardeña de motocrós.  

Na recta final da liga de bronce do fútbol, cando faltan tres xornadas para o remate, o conxunto branco e azul, que este sábado se enfronta ao C. D. Tudelano, ás 17:00 horas, volve tras a parada coa intención de asegurar a segunda praza e chegar así ao playoff coas pilas cargadas.

Pola súa parte, ‘A liga das cidades’ ofrecerá o domingo, ás 17:00 horas, o encontro que disputará o Rácing Ferrol contra o Ath. Bilbao B. O Rácing, un dos mellores da División, está asinando unha segunda volta sensacional, que intentará ratificar fronte aos cachorros de San Mamés.

O fútbol de 2ª RFEF e o motocrós destacan tamén na xornada do domingo. A oferta futbolística comezará ás 12:00 horas, coa emisión simultánea de Coruxo F. C.–Ximnástica Segoviana e Arousa S. C.–Bergantiños C. F.  (G2 e G24.gal).

ler máis

Deportivo Liceo-Reus Deportiu e Ourense Envialia-Pesc. Rubén Burela xóganse hoxe nos medios públicos galegos

06/05/2022

G2 e G24.gal ofrecen estes encontros correspondentes aos cuartos de final da Copa do Rei de hóckey e da Copa da Raíña de fútbol sala, respectivamente

Deportivo Liceo-Reus Deportiu e Ourense Envialia-Pesc. Rubén Burela xóganse hoxe nos medios públicos galegos

Santiago, 6.5.2022.- A G2 e a G24.gal transmiten este venres decisivos encontros con participación galega en hóckey e fútbol sala. Desde Lleida, a primeira cita, ás 18:55 horas, correspondente aos cuartos de final da 78 edición Copa do Rei de hóckey, enfrontará o Deportivo Liceo, actual campión e un dos favoritos do trofeo, co Reus Deportiu (ás 18:00 h, en G24.gal).

A continuación, ás 20:55 h, os medios públicos galegos tamén achegarán, desde Ourense, o partido que disputarán por unha praza en semifinais da Copa da Raíña de fútbol sala, o Ourense C. F. Envialia e o Pescados Rubén Burela, gañador do torneo nas súas últimas tres edición e un dos grandes favoritos para levarse o título.


ler máis

C. P. Vila-Sana – Deportivo Liceo, correspondente á Copa Raíña de hóckey á patíns, en directo, na G2

05/05/2022

Este partido de cuartos de final do torneo ofrecerase ás 20:25 horas

C. P. Vila-Sana – Deportivo Liceo, correspondente á Copa Raíña de hóckey á patíns, en directo, na G2

Santiago, 5.5.2022.-  A G2 achega hoxe, en directo, ás 20:25 horas, o partido C. P. Vila-sana – Deportivo Liceo, correspondente aos cuartos de final da Copa da Raíña de hóckey a patins, que se disputa desde hoxe ata o 8 de maio no pavillón Onze de Setembre de Lleida.

Partido difícil para as xogadoras de Stanis García, xa que se enfrontarán o actual líder da OK Liga Iberdrola. O equipo feminino do Deportivo Liceo xogará como visitante e, no caso de vencer esta noite, tocaríalle xogar na competición co Palau ou Cerdanyola.


ler máis