CRTVG

Buscar

CRTVG Viva

Deportes

Balonmán, traiñeiras e fútbol, nas retransmisións deportivas da CRTVG esta fin de semana

06/09/2019

As galegas do Conservas Orbe BM Porriño e o conxunto do Frigoríficos do Morrazo inician o sábado respectivas temporadas nas máximas categorías de balonmán

A G2 e a web da CRTVG ofrecerán tamén o domingo, en directo, a xornada decisiva
da Bandeira da Concha de traiñeiras

Balonmán, traiñeiras e fútbol, nas retransmisións deportivas da CRTVG esta fin de semana

Santiago, 06.09.2019.- Dous encontros de balonmán abren este sábado as retransmisións deportivas, en directo, dos medios públicos galegos na fin de semana. Por unha parte, ás 16.30 horas, na división de honra, poderase ver en acción as galegas Conservas Orbe BM Porriño xogar na casa contra o Helvetia BM. Alcobendas e, a continuación, tamén iniciarán a nova temporada da Liga Asobal no Gatañal o conxunto cangués Frigoríficos do Morrazo e o BM. Granollers (18.30 h.).

A competición pola Bandeira da Concha continúa este domingo tamén na G2 e na web da CRTVG coa segunda xornada en disputa. Ofreceranse en directo, a partir das 11.00 horas, tanto as traiñeiras da Liga Euskotren masculina como da Eusko Label feminina.

Na faixa da tarde, unha nova edición de 'A liga das cidades' emitirá dous partidos de fútbol da 2ªB: Coruxo F. C. – R. Ferrol e Pontevedra C. F. – SP. Xixón B. E como é costume, o espazo 'En xogo' (22.30 h.) achegará os resumos, as declaracións dos protagonistas e as principais xogadas de cada xornada.

ler máis

Novas xornadas da máxima competición de traiñeiras desde augas vascas, en directo, esta fin de semana na CRTVG

09/08/2019

Os medios públicos galegos ofrecerán as bandeiras de Ondarroa, o sábado en Biscaia, e ao día seguinte o trofeo de Hondarribia en Guipúscoa

Novas xornadas da máxima competición de traiñeiras desde augas vascas, en directo, esta fin de semana na CRTVG

Santiago, 02.08.2019.- Tras a parada ligueira para disputar o Campionato de España de Traiñeiras, retómase esta fin de semana a pugna na máxima categoría do remo en augas do País Vasco. Os medios públicos galegos, como é costume, ofrecerán as competicións masculina da Liga Euskotren e a Eusko Label feminina de ambas as dúas bandeiras, en directo.

O sábado, a partir das 18.00 horas, a atención da G2 e da web da CRTVG estará posta en Biscaia, onde se medirán as embarcacións na 35 edición da Bandeira Ondarroa. Esta regata disputarase no formato clásico de liña, con dous longos e unha ceavoga en modalidade feminina e catro longos e tres ceavogas na masculina.

E a maiores, as augas de Guipúscoa acollerán o domingo a 32 edición da Bandeira Mapfre Hondarribia na Liga Eusko Label e a II Mapfre Bandeira na Liga Euskotren desde as 11.30 horas. As quendas desta regata, que se disputará en catro longos para as embarcacións masculinas, formaranse en base á clasificación final da xornada do sábado en Ondarroa.

ler máis

Os trofeos de fútbol do verán galego, Teresa Herrera e Memorial Quinocho, este sábado, na CRTVG

07/08/2019

Os medios públicos ofrecerán o choque do Celta de Vigo co Lazio de Roma e, a continuación, o do Dépor fronte ao Real Betis
  

Os trofeos de fútbol do verán galego, Teresa Herrera e Memorial Quinocho, este sábado, na CRTVG

Santiago, 07.08.2019.-  Os medios públicos galegos, TVG e Radio Galega, ofrecerán este sábado dous dos torneos de fútbol máis destacados do verán galego: o Memorial Quinocho e o Teresa Herrera.

O clásico vigués, que este ano celebra a súa 24 edición en Balaídos, enfrontará, ás 20.00 horas, o Celta co Lazio italiano. Unha semana antes do comezo da Liga, o equipo de Escribá preséntase ante a súa afección cun ambicioso proxecto para mellorar a clasificación da pasada temporada e mesmo aspirar á zona dos postos que conducen a Europa. Roberto Prado narrará este partido para a Televisión de Galicia, apoiado por Xosé L. Mosquera; mentres que na Radio Galega será Roberto Carlos Carballo quen traslade a emoción do que suceda no céspede, cos comentarios de Víctor López e Moncho Carnero.

A continuación, a TVG ofrecerá a septuaxésimo cuarta edición do Teresa Herrera, o torneo decano das competicións de fútbol do verán, o máis antigo do mundo no que a trofeos amigables se refire. Nesta ocasión, o Deportivo xogará contra o Real Betis, un dos históricos do fútbol español que acode ao Abanca-Riazor para disputar por primeira vez un Teresa Herrera. Óscar Benito e Javier Oreiro realizarán os comentarios oportunos.

A Radio Galega transmite, amais, o trofeo Teresa Herrera feminino

Alfonso Pardo conducirá este sábado na Radio Galega a edición especial do ‘Galicia en Goles’ para contar a emoción do fútbol de verán. Desde as 18.00 horas, os micrófonos da emisora autonómica estarán en tres frontes. A primeira, en Riazor, onde o Deportivo da Coruña e o Granadilla de Tenerife disputan o trofeo Teresa Herrera feminino. Alfonso Núñez encargarase da narración dos noventa minutos de xogo, co apoio nos comentarios da especialista Rocío Candal. A segunda cita da tarde que ofrecerá a Radio Galega, con motivo do Memorial Quinocho, será Celta de Vigo-Lazio de Roma.

E despois do feminino, o terceiro encontro en xogo chegará en Riazor, co partido masculino polo Teresa Herrera entre o Deportivo e o Real Betis. Alfonso Núñez, desta volta, estará acompañado por Millán Gómez e Xosé Manuel Traba para retransmitir o partido de presentación do equipo herculino antes de debutar na Liga de segunda o domingo 18 ante o Oviedo.

ler máis

Os medios públicos galegos ofrecen, en directo, o Campionato de España de Traiñeiras desde Moaña

02/08/2019

O trofeo masculino contará coa participación de cinco embarcacións galegas e tres vascas, mentres que na cita feminina competirán só tres traiñeiras galegas

Os medios públicos galegos ofrecen, en directo, o Campionato de España de Traiñeiras desde Moaña

Santiago, 02.08.2019.-  A G2 e a web da CRTVG ofrecen este domingo, en directo, a celebración da 72 edición do Campionato de España de Traiñeiras (12.00 horas). Nas clasificatorias da regata masculina participarán cinco embarcacións galegas e tres vascas, mentres que na feminina só competirán tres traiñeiras galegas.

Fronte ás vascas Santurtzi, Donostiarra e Zierbena, que defende o título, situaranse as embarcacións de Ares, Samertolameu, Tirán, Mecos e Vilaxoán. Por parte da cita feminina vogarán Mecos, Náutico Riveira e Samertolameu, na mesma distancia que os homes.

O trofeo, tras disputarse os últimos cinco anos en augas cántabras, regresa nesta edición a Galicia, en concreto, a augas de Meira-Moaña. A seguinte fin de semana retomarase a competición ligueira na máxima categoría de traiñeiras o sábado en Ondarroa e coa bandeira de Hondarribia, o domingo.

O sábado serán tamén protagonistas os deportes náuticos na G2, xa que ás 18.30 horas poderase ver como se desenvolveu a 83 edición do Descenso Internacional do Sella en piragua, que se celebra entre as localidades de Arriondas e Ribadesella.

ler máis

Os espectadores da G2 vivirán toda a emoción da Liga de Traiñeiras, que esta fin de semana chega a augas biscaíñas

26/07/2019

O sábado ofrecerase a Santurtziko Ikurriña, mentres que o domingo será a quenda da proba que se disputará en Getxo

O Campionato do Mundo de Balonmán Júnior será o outro grande atractivo da oferta deportiva dos medios públicos, coa retransmisión dunha das semifinais e da gran final

Os espectadores da G2 vivirán toda a emoción da Liga de Traiñeiras, que esta fin de semana chega a augas biscaíñas

Santiago, 26.07.2019.-    As dúas máximas categorías do remo cítanse esta fin de semana en augas biscaíñas, exactamente en Santurtzi e Getxo, para disputar a 11ª e a 12ª xornada da Eusko Label Liga e a 9ª e 10ª xornada da Liga Euskotren, citas deportivas que se poderán seguir en directo a través dos medios públicos galegos.

Así pois, as traiñeiras desembarcan este sábado en Santurtzi, onde se celebrarán, a partir das 18.00 h., a VIII Bandeira Euskotren e a XL Santurtziko Ikurriña. As 12 embarcacións da Eusko Label Liga sairán en orde inversa á que marca a clasificación xeral e a proba constará de catro longos e tres ciabogas, pero coa particularidade de que non todos os longos terán a mesma distancia.

O domingo, en Getxo, estará en xogo na G2 a Getxoko Ikurriña nas súas categorías feminina (11.30 h.) e masculina (12.00 h.). A regata deste municipio biscaíño terá o formato habitual de liña con dous longos e unha ciaboga para as mulleres e catro longos e tres ciabogas para os homes. A orde de saída virá determinada pola clasificación da regata de Santurtzi do día anterior.

Ademais das traiñeiras, o outro gran protagonista da fin de semana deportiva na G2 será o balonmán júnior, que está a disputar estes días o seu Mundial en Pontevedra e Vigo. O sábado, ás 20.30 h., ofrecerase unha das semifinais do torneo, a que disputarán  Portugal e Croacia, mentres que o domingo os espectadores poderán ver, a partir das 16.30 h., a gran final.

ler máis

As traiñeiras desprazan a atención dos medios públicos galegos cara a augas de San Sebastián e Castro Urdiales

12/07/2019

A G2 e a web da CRTVG ofrecen esta fin de semana respectivas bandeiras, en que participan as principais embarcacións masculinas e femininas do remo nacional

As traiñeiras desprazan a atención dos medios públicos galegos cara a augas de San Sebastián e Castro Urdiales

Santiago, 12.07.2019.-   A máxima competición de traiñeiras, a Liga ACT, será protagonista das transmisións deportivas dos medios públicos galegos esta fin de semana. O sábado, toda a atención da G2 e da web da CRTVG dirixirase cara a augas da baía da Concha en San Sebastián, para ofrecer desde as 18.00 horas a disputa pola décimo segunda Bandeira Donostiarra Kaiarriba-Amenabar, no caso das embarcacións masculinas da Eusko Label Liga, e a cuarta Bandeira Kaiarriba-Amenabar da Liga Euskotren.

Neste escenario histórico da competición, as traiñeiras masculinas, que afrontan este sábado a súa sétima xornada, deberán completar 5.556 metros, divididos en catro longos e tres ceavogas, mentres que os clubs femininos competirán a quinta regata da temporada nunha distancia de 2.778 metros.

O domingo, a partir das 11.30 h., a G2 e a web da CRTVG desprazaranse a Castro Urdiales, para ofrecer outra das bandeiras clásicas da elite do remo, a Bandeira CaixaBank: a sexta edición para as embarcacións da Eusko Label Liga e a cuarta da Liga Euskotren.

Polo de agora encabeza a competición masculina, con doce embarcacións en liza, Orio (67 puntos), seguida por Hondarribia (61) e Santurtzi (57), mentres que, o único club galego no torneo, Cabo, descendeu ao noveno posto da táboa con 29 puntos a última xornada. Na liga feminina, con 4 embarcacións e sen participación galega, tamén vai á cabeza o club Orio (15 puntos).

ler máis

Brasil-Perú, a gran final da Copa América de fútbol, xógase este domingo á noite, en directo, na TVG

05/07/2019

Na véspera, a G2 ofrecerá o partido polo terceiro e cuarto posto, que disputarán Arxentina e Chile (20.50 h.)

Os medios públicos galegos ofrecerán, amais, esta fin de semana a III Bandeira Cidade da Coruña, en augas da praia de Riazor
 

Brasil-Perú, a gran final da Copa América de fútbol, xógase este domingo á noite, en directo, na TVG

Santiago, 05.07.2019.-  Televisión de Galicia ofrecerá este domingo, en exclusiva, en aberto para Galicia, a gran final da Copa América de fútbol que, contra todo prognóstico, enfrontará a selección anfitrioa Brasil contra Perú, tras derrotar en semifinais a actual campioa Chile.

O partido, que se xogará no mítico estadio Maracaná do Río de Xaneiro, poderase seguir en directo pola TVG, a partir das 21.50 horas, e contará como comentaristas con Gustavo Varela, Luis Timiraos e Álex Couto.

As transmisións da Galega nesta Copa América non rematan aquí, xa que o día antes, o sábado, a G2 emitirá, tamén en directo, ás 20.50 horas, o partido polo terceiro e cuarto posto, entre Arxentina e Chile. Volveranse ver as caras no estadio Arena Corinthians de San Paulo tras xogar as dúas últimas finais da Copa América, con vitoria para o conxunto vermello, aínda que nesta ocasión xogarán para ser terceiros. Tomás Alonso e Luis Timiraos narrarán este encontro para os seguidores da G2.  

A Galega é a única canle en España que está ofrecendo os partidos da 46 edición da Copa América 2019 en aberto. Desde o comezo, está transmitindo os dez partidos máis destacados do principal torneo futbolístico entre as seleccións dos países de América do Sur, o máis antigo do mundo.

A máxima competición de traiñeiras, desde augas da Coruña

Os medios públicos galegos ofrecerán, amais, esta fin de semana respectivas xornadas da máxima competición de traiñeiras desde augas da praia de Riazor. Por terceiro ano consecutivo, desenvolverase o sábado (18.00 h.) e o domingo (11.25 h.) a Bandeira Cidade da Coruña, en que se citarán as principais embarcacións do remo nacional.

A G2 e a web da CRTVG transmitirán en directo tanto a competición masculina, denominada Liga Euskolabel (máis coñecida como Liga ACT), en que participarán 12 embarcacións, coma a feminina Euskotren, con catro clubs en liza. Polo de agora encabeza a competición Orio (46 puntos), seguida por Hondarribia (39), Santurtzi (38) e Zierbena (38), mentres que, o único club galego no torneo, Cabo, sitúase no sétimo posto da táboa con 21 puntos.

ler máis

A Copa América afronta os cuartos de final na CRTVG, que ofrece, amais, dúas novas bandeiras de traiñeiras

27/06/2019

Ás 21.00 horas, este venres poderase seguir, en directo, o choque Venezuela-Arxentina e, ao día seguinte, Uruguai-Perú
 
Nas dúas xornadas da fin de semana transmitiranse, respectivamente, as bandeiras de Astillero e El Correo Ikurriña da Liga ACT e o comezo da feminina Liga Euskotren
 

A Copa América afronta os cuartos de final na CRTVG, que ofrece, amais, dúas novas bandeiras de traiñeiras

Santiago, 27.06.2019.-  Os espectadores da CRTVG serán testemuñas únicas en Galicia, en aberto, dos novos partidos que se disputarán na Copa América, que chega este venres á súa fase de cuartos de final.

Dos oito equipos (Brasil, Venezuela, Perú, Colombia, Arxentina, Paraguai, Uruguai e Chile) cos que conta o torneo de seleccións máis importantes de América do Sur nesta etapa, o venres poderase seguir na G2, en directo, ás 21.00 horas, o choque entre Venezuela e Arxentina, primeira e segunda selección clasificadas, respectivamente, dos grupos A e B.

O sábado, tamén ás 21.00 horas, loitarán por un pase á fase de semifinais da Copa América o conxunto de Uruguai, clasificado como líder do grupo C, e o de Perú, o terceiro do grupo A.

ler máis

A CRTVG ofrece novos partidos da Copa América de fútbol, ao tempo que arranca a Liga máis importante de traiñeiras

21/06/2019

Esta fin de semana xogaranse o Perú-Brasil (sábado) e o Qatar-Arxentina (domingo), ambos os dous ás 21.00 horas

A Bandeira de Bilbao abre o sábado unha nova temporada da máxima competición de traiñeiras, seguida, o día despois, polo torneo Petronor de Ziérbena

Os medios públicos galegos transmiten, amais, o Rally do Cocido de Lalín (sábado, 17.15 e 19.35 h.)
   

A CRTVG ofrece novos partidos da Copa América de fútbol, ao tempo que arranca a Liga máis importante de traiñeiras

Santiago, 21.06.2019.-  A CRTVG continúa esta fin de semana coa emisión en directo da Copa América 2019, o principal torneo futbolístico entre as seleccións dos países de América do Sur, con dous novos encontros correspondentes á fase de grupos. Así, a G2, única canle en España que ofrece os partidos da Copa América 2019 e en exclusiva para Galicia, transmitirá Perú-Brasil (sábado) e Qatar-Arxentina (domingo), ambos os dous ás 21.00 horas.

A Galega ten previsto emitir un total de 10 partidos da competición de fútbol máis antiga do mundo, repartidos entre as catro etapas da competición: fase de grupos, cuartos de final, semifinais e final.

Traiñeiras

Esta fin de semana arranca unha nova temporada da Liga ACT de traiñeiras ou Eusko Label. Un ano máis, a G2 e a web da CRTVG ofrecerán, de xeito íntegro, a máxima competición deste deporte, consistente na transmisión de 22 regatas, 14 delas correspondentes á liga feminina. Esta nova temporada conta con só unha embarcación galega, o Club de Remo Cabo da Cruz, que fai o seu quinto ano consecutivo disputando a Liga Eusko Label.

Como vén sendo habitual nos últimos anos, as augas da ría bilbaína acollerán a primeira cita este sábado, ás 17.55 horas, para disputar a X Bandeira de Bilbao, onde loitarán as 12 mellores embarcacións. A orde de saída está establecida pola clasificación xeral do ano pasado, polo que a primeira quenda estará composta por Astillero, Lekittarra Elecnor, Kaiku e San Pedro. Na segunda vogarán Ondarroa Cikautxo, Donostiarra, Cabo e Santurtzi Iberdrola. Mentres que na quenda de honra estará Orio Babyauto, Zierbena Bahías Bizkaia, GO fit Hondarribia e, o vixente campión, Urdaibai Avia.

ler máis

O Deportivo Fabril, o Rápido de Bouzas e o Rácing de Ferrol xogan esta fin de semana nos medios públicos

13/10/2017

Os afeccionados ao deporte poderán ver tamén as xogadoras do Guardés na Copa EHF de balonmán e o derbi de baloncesto entre o Río Ourense Termal e o Leyma Coruña

O Deportivo Fabril, o Rápido de Bouzas e o Rácing de Ferrol xogan esta fin de semana nos medios públicos

Santiago, 13.10.2017.- O deporte volve con forza esta fin de semana aos medios públicos. En concreto, o fútbol galego, de 2ªB e en directo, terá un oco destacado na programación deportiva, que tamén transmitirá destacadas citas de balonmán feminino e de baloncesto.

As transmisións comezan o sábado, ás 18.00 horas, co partido que disputará o Rácing de Ferrol, situado na metade da táboa, contra o Unión Adarve. A continuación, ás 20.00 horas, a Guarda volverá acoller unha nova eliminatoria da competición continental Copa EHF, en que o Mecalia se enfrontará ao ruso Astrakhanochka Astrakhan.

ler máis