Santiago, 24.08.2023.- A TVG foi líder de audiencia onte en Galicia en varias franxas horarias, cos tres programas máis vistos da xornada e catro nas dez primeiras posicións. En conxunto a Televisión de Galicia situouse na xornada do 23 de agosto no 13,1 % de cota de pantalla, máis de 4 puntos por riba da outra canle pública TVE (9%) e 2,7 puntos por riba de  A3, a segunda canle máis vista na comunidade autónoma, cun 10,4 %.

Santiago, 22.08.2023.- O programa ‘Pensando en ti’, da Radio Galega recibe o Premio Solidario Grupo Social ONCE Galicia 2023, na categoría de Medios de Comunicación. Xunto co espazo que conduce Marcial Mouzo, recollerán o galardón o vindeiro 5 de outubro nunha gala no Teatro Colón da Coruña, a Fundación María José Jove, a xornalista galega Cristina Saavedra, Estrella Galicia e a Axencia de Doazón de Órganos e Sangue.

Santiago, 26.07.2023.-    A serie da Televisión de Galicia ‘Motel Valkirias’ é candidata aos XXVII Globos de Ouro portugueses, que se entregarán o 1 de outubro en Lisboa, na categoría de mellor proxecto de ficción.

Esta nominación súmase a outro galardón internacional conseguido pola serie, o Premio CIRCOM, da asociación das televisións rexionais europeas, no apartado de entretemento e ficción.

‘Motel Valkirias’ é unha coprodución entre CTV e SPi, de España e Portugal, e conta co apoio da Agadic, Xunta de Galicia, PIC Portugal, Turismo de Portugal e a colaboración da Deputación de Ourense e a Cámara Municipal de Montalegre. A serie é un wéstern fronteirizo protagonizado por tres mulleres que se atopan nunha situación límite (María Mera, Marina Mota, Maria João Bastos) e o gañador dun Goya Chechu Salgado.

Santiago, 20.07.2023.-      Na súa liña sostida de busca de talento, produción de contidos e colaboración co sector audiovisual, a CRTVG lanza a segunda convocatoria de selección de proxectos dixitais en galego, dotada con 330.000 euros.

Seleccionaranse 27 contidos dixitais repartidos en doce proxectos de ata 50 minutos, e outros 15 cun máximo de 10 minutos de duración. Os 27 traballos han de ser inéditos e xirar arredor da ficción, o humor, a divulgación, a educación, a cultura ou infotainment, e o seu hábitat serán ás canles dixitais, web e redes sociais dos medios públicos galegos. A convocatoria estará aberta ata o 20 de setembro e enmárcase na estratexia de innovación da CRTVG na súa relación co sector audiovisual.

Neste 2023, segundo indica Fernando R. Ojea, director de Contidos da CRTVG, “insistimos na liña de promover a creatividade, sempre en galego, e procurar novas formas de produción de contidos multiplataforma e/ou transmedia creados desde cero pensando na audiencia e na linguaxe dixital”. Da primeira edición, resolta en 2022, hai proxectos en fase de produción e algún deles xa en emisión, como o concurso ‘O mellor tractor do mundo’, xa dispoñible no YouTube de TVG.

Con esta convocatoria, a CRTVG atende tamén unha parte específica do sector audiovisual galego, o das pequenas empresas ou profesionais individuais que poden ter máis dificultades para presentar proxectos destinados á emisión por medios tradicionais e cun orzamento máis elevado. Toda a información sobre a convocatoria pode consultarse no Portal de Transparencia da Corporación.

Santiago, 14.07.2023.-    ‘O Corno’, a segunda longametraxe da directora e guionista Jaione Camborda, participada pola TVG, terá a súa estrea europea na sección oficial da 71ª edición do Festival Internacional de Cine de San Sebastián, antes da súa distribución en cinemas o 11 de outubro, da man de Elastica Films.

O filme fai historia ao ser a primeira longametraxe en galego que compite na sección oficial deste certame, o primeiro de produción galega e tamén a primeira obra dunha cineasta galega ou residente en Galicia, como é Jaione Camborda (donostiarra que leva máis dunha década asentada en Compostela), que aspira á Concha de Ouro.

A película, un drama rural ambientado na Galicia dos anos 70, está protagonizada pola bailarina Janet Novás, no que é o seu debut no cinema, e conta no seu elenco con Carla Rivas, Nuria Lestegás, María Lado, Siobhan Fernandes e Diego Anido, entre outros.

‘O Corno’ está rodada en galego e en portugués en varias localizacións das comarcas de Arousa e Baixo Miño (Pontevedra) e Alto Miño (Portugal) e narra a historia de María, unha mariscadora e tamén parteira que, tras un terrible suceso, se ve obrigada a fuxir a través dunha ruta de contrabandistas. 

Santiago, 13.07.2023.-    A Corporación Radio e Televisión de Galicia está a facer unha intensa despregadura para ofrecerlle á cidadanía toda a información das diferentes opcións políticas que concorren ás eleccións xerais do 23 de xullo. Á marxe dos espazos electorais nos diferentes informativos, a CRTVG ofrece este venres un debate en que participarán os cabeza de lista ao Congreso dos Deputados pola provincia da Coruña de PP, PSOE, Sumar e BNG: Miguel Tellado, Xosé Miñones, Marta Lois e Néstor Rego, respectivamente.

O debate, moderado polo xornalista Luis Ojea e dunha hora de duración, emitirase en directo, de 10:00 a 11:00 h, en todos os medios da CRTVG: Televisión de Galicia, Radio Galega e a través da canle dixital  g24.gal. Será reemitido a través da G2 ás 22:45 h do mesmo día, onde se incorporará a interpretación en lingua de signos. Os bloques de debate acordados no plan de cobertura son: a situación política actual, gobernanza e modelo de Estado; as políticas sociais e atención á cidadanía, e un terceiro sobre economía, industria, infraestruturas e fiscalidade.

Ademais, a vindeira semana realizaranse, desde o mesmo estudio multimedia, catro entrevistas individuais aos candidatos. A quenda do BNG será o luns 17 de xullo; Sumar Galicia, o martes 18; PsdeG-PSOE, o mércores 19, e PP, o xoves 20. Todas elas terán lugar ás 08:30 h, poderán escoitarse na RG e tamén a través da web. As datas, horarios e tempos destas entrevistas establecéronse segundo criterio de proporcionalidade con respecto aos resultados das últimas eleccións.

E a isto hai que sumarlle a despregadura informativa do propio domingo 23 de xullo, con cobertura nos distintos servizos informativos da TVG, con dous adiantos informativos, un ao mediodía e outro pola tarde, e un programa especial, de máis de cinco horas de duración, presentado por Marta Darriba, Marcos Sueiro e Carlos Amado. Este espazo establecerá conexións coas sedes dos partidos e os principais centros de votación, ofrecerá ás 20:00 h o resultado do tracking realizado por Sigma Dos para FORTA e, unha vez pechados os colexios electorais, seguirá o minuto a minuto do reconto.

A Radio Galega tamén ofrecerá toda a actualidade da xornada a través dos seus especiais informativos desde primeira hora da mañá, e cun programa especial que analizará todas as claves da cita coas urnas.

Santiago, 08.07.2022.-      A vaca Blanca procedente de Teo (A Coruña), foi este venres a gañadora do concurso ‘Miss Vaca 2023’, o certame máis agardado da temporada no programa ‘Luar’ da TVG e o título máis cobizado entre as reses galegas. O evento celébrase desde 2006, pero nos últimos anos causa sensación entre os máis novos grazas ás redes sociais e xera moita expectación en toda Galicia e tamén no resto de España. O seu obxectivo é apoiar e visibilizar o traballo do sector gandeiro en Galicia.

Santiago, 06.07.2023.-    As canles dixitais da CRTVG estrean este xoves o concurso ‘O mellor tractor do mundo’, ás 20:00 h no YouTube da TVG e a partir das 20:30 h nas redes sociais da Corporación. TikTok, Facebook e Twitter funcionarán como altofalante, mentres que os espectadores serán os que, coas súas votacións en YouTube e Instagram, elixirán o gañador de cada entrega e da final, no quinto e último capítulo.

Creado por A Revolta Producións, ‘O mellor tractor do mundo’ viaxará por toda Galicia  buscando os mellores tractoristas, homes e mulleres de todas as idades. As catro primeiras entregas presentarán os participantes e as súas habilidades ao volante, e no capítulo de hoxe os aspirantes son Amador, de Xinzo de Limia; María, de Curtis; e David, da Laracha. No quinto capítulo, os catro gañadores finais competirán entre si antes da votación dos espectadores.

Nova vía de colaboración co sector audiovisual

‘O mellor tractor do mundo’ é o primeiro programa que se estrea dos seleccionados na convocatoria de proxectos dixitais en lingua galega realizada polos medios públicos en apoio do sector. Esta convocatoria, lanzada en 2022, é unha nova vía de produción e colaboración da CRTVG co sector audiovisual que se enmarca na estratexia de dixitalización, innovación e posicionamento dos medios públicos na contorna dixital. Con ela, a Corporación quere promover a creatividade e procurar novas formas de produción de contidos multiplataforma e/ou transmedia en lingua galega, que permitan novas formas de interacción coa audiencia e dean cabida nos medios públicos a novas formas de expresión artística netamente dixitais. As propostas seleccionadas son contidos de ficción, humor, divulgación, educación, cultura ou infotainment en formato longo ou en forma de microespazos/serie, especificamente realizadas para a contorna dixital.

Santiago, 05.07.2023.- A CRTVG forma parte do proxecto colaborativo MEDRETIA, que desenvolverá, a través do Instituto Tecnolóxico Galego (ITG), unha intelixencia artificial (IA) que permita aventurar o comportamento na pantalla das producións audiovisuais. Mediante a aplicación de tecnoloxías Big Data e IA, as empresas de creación de contidos audiovisuais disporán de máis ferramentas para avaliar e anticiparse ás necesidades do mercado optimizando os seus procesos produtivos.

Santiago, 04.07.2023.-   A Xunta Electoral Provincial da Coruña deu traslado, na mañá do martes 4 de xullo, de senllos acordos sobre os recursos presentados contra o Plan de Cobertura Electoral da CRTVG de cara ás eleccións xerais do 23 de xullo.

Ante o recurso do BNG, a Xunta Electoral Provincial da Coruña estima as alegacións feitas pola CRTVG na súa totalidade e acorda “rexeitar a reclamación formulada” polo BNG, xa que non existe “vulneración dos principios recollidos no art. 66 da LOREG“, conclúe o texto.

Con respecto á reclamación de Vox, a Xunta Electoral Provincial da Coruña acorda tamén “desestimar a reclamación” que versaba sobre a pretensión de participación desta formación nos debates e entrevistas electorais, e acadar máis tempo de cobertura.

A CRTVG, a data de hoxe, non recibiu ningún recurso máis contra o Plan de Cobertura Electoral de cara ás eleccións xerais.

Nas pasadas eleccións municipais do 28-M, tanto a Xunta Electoral Provincial como a Xunta Electoral Central resolveron a favor da Corporación todos os recursos presentados polas diferentes formacións políticas.