CRTVG

Buscar

CRTVG Viva

Novas TVG

A película documental ‘O pacto dos estudantes’, nova estrea este martes na segunda canle da Galega

19/10/2021

Tres alumnos universitarios reciben o encargo de buscar unha longametraxe que puideron realizar Lorca, Dalí e Buñuel na Residencia de estudantes

A película documental ‘O pacto dos estudantes’, nova estrea este martes na segunda canle da Galega

Santiago, 19.10.2021.-  A segunda canle da Galega estrea este martes unha nova película documental participada pola Televisión de Galicia, ‘O pacto dos estudantes’ (23.25 h). A produción está dirixida por Juan Miguel del Castillo e con Alejandro Albarracín, Marina Salas e Alba Messa como protagonistas.

Nesta movie-doc, tres alumnos que acaban de graduarse na universidade reciben o encargo de buscar unha película que puideron realizar Lorca, Dalí e Buñuel durante a súa estadía na Residencia de estudantes.

ler máis

Andrea e Jorge, dous mozos de Lugo que levan 10 anos xuntos, celebran unha voda por todo o alto en 'Casamos!'

19/10/2021

Os espectadores da TVG están convidados a un enlace onde non faltarán as sorpresas nin as emocións

Andrea e Jorge, dous mozos de Lugo que levan 10 anos xuntos, celebran unha voda por todo o alto en 'Casamos!'

Santiago, 19.10.2021.-  O fútbol foi o deporte que uniu a Andrea e Jorge, os protagonistas desta noite do programa ‘Casamos!’ (23.05 h). O irmán de Andrea xogaba no mesmo equipo ca Jorge e precisamente foi el quen tomou a iniciativa da primeira cita despois dun tempo falando con ela por redes sociais.

Ningún quería nada serio, pero tras esa primeira cita viñeron máis e así xurdiu o amor entre estes dous mozos de Lugo. Xuntos levan xa 10 anos e os dous pensan que é o momento de casar. Hoxe celebran unha voda por todo o alto, onde non faltarán as sorpresas nin as emocións e á que están convidados os espectadores da TVG.

ler máis

'Desmontando Galicia' fará esta noite un percorrido pola historia da ría de Muros e Noia, unha das máis ricas e fértiles

18/10/2021

Ademais de descubrir as xoias arquitectónicas das dúas localidades, o programa coñecerá a herdanza deixada polos primeiros habitantes do Castro de Baroña

'Desmontando Galicia' fará esta noite un percorrido pola historia da ría de Muros e Noia, unha das máis ricas e fértiles

Santiago, 18.10.2021.-    ‘Desmontando Galicia’ (23.10 h) chega esta semana á ría de Muros e Noia para facer un percorrido pola súa historia. A viaxe comezará coñecendo a herdanza deixada polos primeiros habitantes no Castro de Baroña. O programa porá en marcha a máquina do tempo para descubrir a forma de vida neste asentamento da Idade do Ferro.  

O percorrido continuará na vila de Noia, que no século XV viviu a súa etapa de máxima prosperidade deixando auténticas xoias arquitectónicas tanto relixiosas como civís e cun marcado carácter mariñeiro. En Muros, os espectadores coñecerán unha magnífica obra de enxeñería do século XIX como é o muíño de marea do Pozo Cachón e o auxe da industria conserveira en Galicia visitando a fábrica de Sel.  

Todo isto ao xeito do ‘Desmontando Galicia’, sen deixar unha pedra no seu sitio para descubrir da man de Diana Nogueira, Isabel Blanco e Quique Morales todo o que ten que contar unha das rías atlánticas máis ricas e fértiles.

ler máis

No capítulo desta semana de 'A Lei de Santos', a detención do protagonista non supón que a Garda Civil peche a investigación

17/10/2021

Abel, Peixe e Emilia queren axudalo, pero primeiro teñen que atopar as figuras que roubaron no pazo de Meirás

No capítulo desta semana de 'A Lei de Santos', a detención do protagonista non supón que a Garda Civil peche a investigación

Santiago, 17.10.2021.-  Esta noite, nun novo capítulo de ‘A Lei de Santos’ (23.05 h), cada minuto que pasa, a situación do protagonista é peor. A Garda Civil cre que está implicado na morte de Denís, sobre todo despois de saber que el foi o responsable da malleira a Constante, pero Santos defende a súa inocencia. O peor para el é pensar que Uxía xa non confía na súa palabra.

Pero a detención de Santos non supón que a Garda Civil peche a investigación. Aínda non o teñen todo resolto e tanto Uxía como Roi traballan xuntos de novo para pechar o caso o antes posible.

Para Abel, Peixe e Emilia, axudar a Santos é o obxectivo prioritario, pero primeiro teñen que atopar as figuras que roubaron do pazo de Meirás. Ao mesmo tempo, Abel quere convencer a Áurea para que fuxa con el de Viladesantos. A Áurea non lle parece mala idea, pero cando Breixo lle conta o que pretende facer o Matachín, é consciente de que ten que separarse de Abel para protexelo, aínda que iso supoña romperlle o corazón.

ler máis

A cantante Conchita e o grupo Os Resentidos presentan esta noite os seus novos discos en 'Bamboleo'

16/10/2021

A orquestra Solara interpretará unha selección musical moi propia da verbena, perfecta para levantar o ánimo

A cantante Conchita e o grupo Os Resentidos presentan esta noite os seus novos discos en 'Bamboleo'

Santiago, 16.10.2021.-  ‘Bamboleo’ (22.35 h) volve esta noite cun novo espectáculo de entretemento familiar. O espazo conducido por Xosé Manuel Piñeiro contará nesta ocasión coa presenza do grupo Os Resentidos, con gran pegada na cultura musical galega. Ademais, actuarán a cantante Conchita e a orquestra Solara.

‘La orilla’ é o título de último disco da cantante e compositora Conchita. Famosa por cancións como ‘Nada que perder’, agora presenta temas que contan vivencias e historias que foi reunindo nos últimos tempos. Son composicións como ‘Celebraré’, que interpretará hoxe en ‘Bamboleo’.

A banda viguesa liderada por Antón Reixa acaba de publicar ‘Organización Nautilus’. Neste disco, Os Resentidos invocan a figura do Capitán Nemo e o tesouro oculto na ría de Vigo como símbolo da súa pelexa e busca do tesouro do rock en galego. En ‘Bamboleo’ interpretarán temas do seu novo traballo e clásicos como ‘Galicia caníbal’. Mentres, a orquestra Solara interpretará unha selección musical moi propia da verbena, perfecta para levantar o ánimo.

Pola súa parte, Édgar e Gemma serán os protagonistas do ‘Dirtidansi’. Son bailaríns da selección española de baile deportivo e foron campións de España en varias ocasións.

No ‘Agora ou Nunca’ cantarán Mafe Rosero e María Luisa Pérez, que interpretarán os éxitos ‘Fue díficil’, de Rodrigo Tapari, na versión de María José Quintanilla, e ‘Yemanyá’, de Isabel Pantoja.

A Jrileira’ recibirá dous clubs deportivos: o Outes Fútbol Club e o Club Ciclista Travesas de Vigo. Primeiro cantarán ‘El muerto vivo’, de Peret, e despois terán minuto e medio para adiviñar o maior número posible de intérpretes.

Na ‘ITV do Amor’ un concursante do público terá que adiviñar quen é a parella de Amantia en función das respostas que lle vaian dando. Todo ao tempo que os colaboradores do programa, Tamara Pérez, Damián Cortes, Isi e Javier Varela, fan as súas propias valoracións.

ler máis

A música de Sergio Dalma e o humor de Touriñán e David Amor, protagonistas no 'Luar' deste venres

15/10/2021

Nesta edición, dedicada á comarca do Baixo Miño, asistirán como convidados especiais dous cabaqueiros: Praxíteles González ‘Telis’ e José Álvarez ‘o Buraco’

A música de Sergio Dalma e o humor de Touriñán e David Amor, protagonistas no 'Luar' deste venres

Santiago, 15.10.2021.-   ‘Luar’ (21.55 h) volve este venres cun variado elenco de artistas e con sorpresas nos seus contidos para toda a audiencia da Galega. Esta semana, a comarca protagonista será a do Baixo Miño e, como convidados especiais, o espazo contará coa presenza de Praxíteles González ‘Telis’ e José Álvarez ‘o Buraco’, en representación dos cabaqueiros, que farán unha demostración do seu centenario oficio, o de facer tellas.

No apartado musical, Xosé R. Gayoso e Trisha Fernández recibirán no estudio un amigo do programa, Sergio Dalma, en plena celebración dos seus 30 anos de carreira cun novo disco ’30... y tanto’.

ler máis

Os actores Sara Escudero e Antonio Garrido, decididos a pintar a mona no 'Land Rober Tunai Show' deste xoves

14/10/2021

Esta noite desenvolveranse as seccións ‘Que me estás contando!’, coas palabriñas máis divertidas, e ‘Non cho creo!’, que descubrirá as estrañas habilidades do público

Os actores Sara Escudero e Antonio Garrido, decididos a pintar a mona no 'Land Rober Tunai Show' deste xoves

Santiago, 14.10.2021.-  Este xoves a meta do Camiño está no estudio do ‘Land Rober Tunai Show’ (21.55 h), xa que a convidada que vai asistir ao programa é a cómica Sara Escudero. A actriz acaba de facer a andaina co seu can, e de bichería vai andar o conto. O programa aproveitará o seu sentido do humor e os seus coñecementos para poñela a proba!

Tamén se une ao espectáculo o andaluz, case galego, Antonio Garrido, que vai ir a un lugar un tanto peculiar: un cemiterio.

E o máis importante de todo, o ‘Land Rober Tunai Show’ vai encher de novo de xente o estudio e para celebralo volve, por petición popular, o ‘Que me estás contando!’. Cales serán as palabriñas máis divertidas e rebuscadas que os esperan? Por se isto fose pouco, coñeceranse as estrañas habilidades do público en ‘Non cho creo!’.

Isto e máis con Roberto Vilar, Eva Iglesias e Miguel Canalejo, a partir das 22.00 horas na Televisión de Galicia.

ler máis

Duelo de estrelas esta noite en 'Os Mellores da Clase': José Manuel Parada contra Pili Pampín

13/10/2021

Xuntos emprenderán unha viaxe onde lembrarán a importancia das avoas, a paga dos domingos e os sabores da infancia

Duelo de estrelas esta noite en 'Os Mellores da Clase': José Manuel Parada contra Pili Pampín

Santiago, 13.10.2021.-   O programa desta noite de ‘Os Mellores da Clase’ (23.05 h) é de traca, un auténtico duelo de estrelas competindo por acadar o podio: o presentador José Manuel Parada e a cantante Pili Pampín xuntos nun programa de televisión e dando guerra, moita guerra, coa axuda dos seus acompañantes.

Parada era o alumno perfecto, aplicado e responsable. Pili só quería cantar e podíase atopar, en calquera momento, ensaiando diante dos espellos que adornaban o restaurante dos pais. Xuntos van emprender unha viaxe onde lembrarán a importancia das avoas, a paga dos domingos e os sabores da infancia.

ler máis

Coa estrea da docuficción 'A dama do cadro', a G2 adéntrase na vida e obra do creador do pintalabios español

12/10/2021

Os espectadores verán como, a raíz dunha fermosa historia de amor, o empresario Antonio Puig Castellón, dono dunha pequena perfumería na cidade condal dos anos 20 traballa duramente ata fabricar o primeiro pintalabios do noso país

 

 

Coa estrea da docuficción 'A dama do cadro', a G2 adéntrase na vida e obra do creador do pintalabios español

Santiago, 12.10.2021.-  ‘A dama do cadro’ (23.25 h) é o título da docuficción que estrea este martes a G2, que se adentra na vida e obra do empresario Antonio Puig Castelló, creador do primeiro pintalabios español e fundador do que agora é unha compañía de renome internacional: o grupo Puig.

O proceso de ensaios dunha obra de teatro na Barcelona actual dálle pé ao descubrimento da figura do fundador desta compañía catalá. Os espectadores verán como, a raíz dunha fermosa historia de amor, este novo emprendedor, dono dunha pequena perfumería na cidade condal dos anos 20 traballa duramente ata conseguir fabricar o primeiro pintalabios do noso país.

ler máis

Un amor nado na rede, o de Mari e Polo, protagonista esta semana no espazo 'Casamos!'

12/10/2021

Levan xa sete anos de relación e agora deciden dar un paso máis na súa fermosa historia de amor e casar nunha cerimonia íntima e familiar
 

Un amor nado na rede, o de Mari e Polo, protagonista esta semana no espazo 'Casamos!'

Santiago, 12.10.2021.-  O amor está e aparece cando menos se espera. Isto foi o que lle pasou a Mari e Polo, de Vilagarcía de Arousa, que serán esta noite protagonistas no programa ‘Casamos!’ (23.05 h).

Unha aplicación web para coñecer xente uniu os seus camiños e desde aquela nunca máis se volveron separar. Xuntos levan xa sete anos de relación e agora deciden dar un paso máis na súa fermosa historia de amor e casar nunha cerimonia íntima e familiar.

Pero nesta voda non só os noivos están involucrados, senón que as súas respectivas familias, que xa forman unha, están a tope tamén cos preparativos do enlace, que para eles será o evento familiar do ano.

ler máis