CRTVG

Buscar

CRTVG Viva

Novas TVG

'Segredos - Desmontado Galicia' viaxa hoxe a Ourense, unha das urbes máis importantes da Hispania romana

11/11/2019

O programa (22.15 h) realizará unha viaxe no tempo para saber como esta cidade de nobres, igrexas e prazas inclinadas medrou ao longo da súa historia dunha beira á outra do Miño a través das súas pontes

'Segredos - Desmontado Galicia' viaxa hoxe a Ourense, unha das urbes máis importantes da Hispania romana

Santiago, 11.11.2019.-     O programa ‘Segredos - Desmontando Galicia’, que cada semana  amosa a nosa comunidade dun xeito único, desde os puntos de vista máis abraiantes e inéditos na televisión, desprázase nesta ocasión a Ourense, a terceira cidade de Galicia.

É a capital termal da comunidade, pero Ourense ten moito máis que baños medicinais. A través de espectaculares imaxes aéreas e recreacións en 3D, os espectadores da Televisión de Galicia descubrirán esta noite todos os segredos dunha das urbes máis importantes da Hispania romana nunha zona rica en minas de ouro e cunha climatoloxía peculiar.

Coa axuda do ‘Sabichón’, Diana Nogueira e Alicia Burton realizarán unha viaxe no tempo para saber como esta cidade de nobres, igrexas e prazas inclinadas medrou ao longo da súa historia dunha beira á outra do Miño a través das súas pontes.

ler máis

Os medios públicos galegos ofrecerán hoxe unha programación especial con toda a actualidade da xornada electoral

10/11/2019

A cobertura contará con preto de 30 puntos de directo e disporá dun amplo equipo de xornalistas desde as mesas electorais e nas sedes das forzas políticas en Galicia e Madrid

Tanto a Televisión de Galicia coma a Radio Galega e a web crtvg.gal ofrecerán programas especiais ao peche dos colexios cos datos da evolución do escrutinio, as primeiras reaccións e a análise dos resultados

Os medios públicos galegos ofrecerán hoxe unha programación especial con toda a actualidade da xornada electoral

Santiago, 10.11.2019.-    Os medios públicos galegos poñen en marcha este domingo un amplo despregamento de medios para informar de todo cando aconteza na xornada electoral. En total, ao longo do día, a CRTVG contará con preto de 30 puntos de directo e xornalistas en todas as sedes dos partidos en Galicia e Madrid.

A TVG terá o primeiro contacto informativo coa xornada electoral ás 9.00 horas, en que se ofrecerá un especial informativo que realizará unha rolda de conexións con colexios electorais das catro provincias galegas. Ás 10.30 h, os espectadores poderán seguir, nun ‘Adianto Informativo’, as primeiras comparecencias no Centro de Datos de Madrid. No programa ‘A Revista Fin de Semana’, que comezará arredor das 12.10 h, realizarase un novo percorrido pola actualidade da xornada electoral, coñeceranse os primeiros datos de participación e ofreceranse as primeiras imaxes das votacións dos principais líderes políticos, tanto en Galicia coma en Madrid.

Ás 14.30 h, o ‘Telexornal Mediodía’ ofrecerá unha ampla información do transcurso da xornada. A dúas horas do peche dos colexios electorais, ás 18.00 h, a TVG emitirá un novo ‘Adianto Informativo’, en conexión co Ministerio do Interior.

A partir das 19.30 h, a Televisión de Galicia porá en marcha o Especial Informativo ‘Eleccións Xerais 10-N’. Desde o estudio 5 de San Marcos, Marta Darriba e Ana Celia Vázquez ofrecerán ao peche dos colexios electorais os resultados dun tracking elaborado pola empresa de demoscopia Gad3 para a rede de FORTA, cunha previsión dos resultados, coa porcentaxe de votos e de escanos estimados. Este tracking-poll foi realizado sobre unha base de 13.000 entrevistas telefónicas. Os datos desta enquisa serán obxecto de debate por Matilde Massó, Luís Cuntín, Arturo González e Xosé Luís Gomez, analistas que estarán presentes no estudio.

Outro dos puntos informativos estará situado na redacción da TVG, desde onde se establecerán conexións ao fío da actualidade con Carlos F. Amado. E contarase tamén cun equipo desprazado a Barcelona para seguir o transcorrer da xornada en Cataluña. Unha vez que vaia avanzando o escrutinio e se vaian coñecendo resultados oficiais, o especial informativo da TVG abrirá outra mesa de debate, en que María Cadaval, José Rodríguez Polo, Xoán Antón Pérez Lema e Pablo Vázquez Sande analizarán polo miúdo os resultados, tanto a nivel nacional coma nas circunscricións galegas.

A cobertura da CRTVG posibilitará estar tamén nas sedes dos principais partidos políticos en Galicia e Madrid para seguir as primeiras reaccións ao reconto de votos, as conferencias de prensa e as comparecencias oficiais dos líderes para valorar os resultados. En total, serán case seis horas de programa en directo.

Cobertura da Radio Galega

A Radio Galega iniciará o domingo ás 8.00 h da mañá a súa programación especial para dar cobertura á xornada electoral. Desde primeira hora, con Javier Corral e Victoria Rodríguez á fronte dunha edición especial do ‘Galicia por Diante’, a emisora pública pulsará os últimos preparativos nos colexios electorais antes da súa apertura ao público e seguirá con atención os primeiros compases da xornada. Ao mediodía, nunha edición especial da ‘Crónica das Dúas’, avanzaranse os primeiros datos de participación e resumiranse todas as incidencias da xornada ata o momento.

Os xornalistas Luís Ojea e Celia Rúa presentarán o Especial Informativo entre as 19.45 e a 01.00 h para informar e analizar o resultado das urnas. Será ás 20.00 h. do domingo cando a Radio Galega avance a última sondaxe antes do reconto definitivo, o tracking elaborado por Gad3. A interpretación dos datos correrá a cargo de colaboradores da emisora pública como Fernando Ónega, Javier Casqueiro, Ricardo Colmenero, Luís Pérez, Roi Rodríguez, Julián Rodríguez, Martín García Piñeiro, María Pereira, Susana Luaña ou Fran Espiñeira.

En tempo real, tamén na web da CRTVG

Un espazo habilitado na páxina web da CRTVG (www.crtvg.gal) achegará en tempo real tamén toda a actualidade da xornada, e os resultados electorais a medida que se vaia producindo o escrutinio. Tamén estarán dispoñibles os datos do tracking electoral tras o peche dos colexios.

ler máis

Manu Tenorio e María do Ceo están convidados hoxe á velada musical de 'Bamboleo'

09/11/2019

O programa presentado por Lucía Regueiro (21.55 h) tamén contará coa presenza da orquestra Finisterre

Manu Tenorio e María do Ceo están convidados hoxe á velada musical de 'Bamboleo'

Santiago, 09.11.2019.-   ‘Bamboleo’, o programa de entretemento dos sábados á noite na Televisión de Galicia, recibe esta semana a visita do cantante andaluz Manu Tenorio, que lles presentará aos espectadores galegos o seu novo disco, ‘Nosotros en la noche’, cheo de matices e atmosferas diferentes, con momentos fondos e introspectivos acompañados doutros divertidos e alegres. O álbum mestura diversos estilos non habituais en Manu Tenorio, xa que se funden toques electrónicos con guitarras funky, sen deixar de lado o seu irresistible romanticismo.

ler máis

Os medios públicos galegos ofrecerán o domingo unha programación especial arredor das eleccións xerais

08/11/2019

A cobertura contará con preto de 30 puntos de directo e disporá dun amplo equipo de xornalistas desde as mesas electorais e nas sedes das forzas políticas en Galicia e Madrid

Tanto a Televisión de Galicia coma a Radio Galega e a web crtvg.gal ofrecerán programas especiais ao peche dos colexios cos datos da evolución do escrutinio, as primeiras reaccións e a análise dos resultados

Os medios públicos galegos ofrecerán o domingo unha programación especial arredor das eleccións xerais

Santiago, 08.11.2019.-    Os medios públicos galegos porán en marcha este domingo un amplo despregamento de medios para informar de todo cando aconteza na xornada electoral. En total, ao longo do día, a CRTVG contará con preto de 30 puntos de directo e xornalistas en todas as sedes de Galicia e Madrid, acompañando todos os partidos con aspiracións a ter representación no Congreso dos Deputados.

A TVG terá o primeiro contacto informativo coa xornada electoral ás 9.00 horas, en que se ofrecerá un especial informativo que realizará unha rolda de conexións con colexios electorais das catro provincias galegas para estar presente na apertura das mesas e nos primeiros compases das votacións. Ás 10.30 h, os espectadores poderán seguir, nun ‘Adianto Informativo’, as primeiras comparecencias no Centro de Datos de Madrid. No programa ‘A Revista Fin de Semana’, que comezará arredor das 12.10 h, realizarase un novo percorrido pola actualidade da xornada electoral, coñeceranse os primeiros datos de participación e ofreceranse as primeiras imaxes das votacións dos principais líderes políticos, tanto en Galicia coma en Madrid.

Ás 14.30 h, o ‘Telexornal Mediodía’ ofrecerá unha ampla información do transcurso da xornada. Conectarase novamente co Centro de Datos de Madrid e achegaranse datos de participación, posibles incidencias e anécdotas destacables. A dúas horas do peche dos colexios electorais, ás 18.00 h, a TVG emitirá un novo ‘Adianto informativo’, en conexión co Ministerio do Interior.

A partir das 19.30 h, a Televisión de Galicia porá en marcha o Especial Informativo ‘Eleccións Xerais 10-N’. Desde o estudio 5 de San Marcos, Marta Darriba e Ana Celia Vázquez ofrecerán ao peche dos colexios electorais os resultados dun tracking elaborado pola empresa de demoscopia Gad3 para a rede de FORTA, cunha previsión dos resultados, coa porcentaxe de votos e de escanos estimados. Este tracking-poll foi realizado sobre unha base de 13.000 entrevistas telefónicas. Os datos desta enquisa serán obxecto de debate por Matilde Massó, Luís Cuntín, Arturo González e Xosé Luís Gomez, analistas que estarán presentes no estudio.

Outro dos puntos informativos estará situado na redacción da TVG, desde onde se establecerán conexións ao fío da actualidade con Carlos F. Amado. E contarase tamén cun equipo desprazado a Barcelona para seguir o transcorrer da xornada en Cataluña. Unha vez que vaia avanzando o escrutinio e se vaian coñecendo resultados oficiais, o especial informativo da TVG abrirá outra mesa de debate, en que María Cadaval, José Rodríguez Polo, Xoán Antón Pérez Lema e Pablo Vázquez Sande analizarán polo miúdo os resultados, tanto a nivel nacional coma nas circunscricións galegas.

A cobertura da CRTVG posibilitará estar tamén nas sedes dos principais partidos políticos en Galicia e Madrid para seguir as primeiras reaccións ao reconto de votos, as conferencias de prensa e as comparecencias oficiais dos líderes para valorar os resultados. En total, serán cinco horas de programa en directo.

ler máis

A cantante sevillana Melody e a popular artista galega Pili Pampín encabezan o cartel musical do 'Luar' desta noite

08/11/2019

Tamén estarán no escenario José María Guzmán, Davide Salvado e Fransy González, a orquestra Israel e a histórica agrupación folclórica Cantigas e Agarimos, entre outros (22.00 h)

A cantante sevillana Melody e a popular artista galega Pili Pampín encabezan o cartel musical do 'Luar' desta noite

Santiago, 08.11.2019.-     A cantante Melody, que saltara á fama con dez anos coa súa popular canción de ‘El baile del gorila’, visita esta noite o programa ‘Luar’ con algúns dos temas do seu amplo repertorio, entre eles o seu último éxito, ‘Rúmbame’. A sevillana, cunha proposta moderna que abrangue diferentes estilos, fará gozar os espectadores coa súa música e a súa voz. Ademais de actuar en solitario, interpretará a dúo co seu pai, Lorenzo Molina, a canción ‘Loco’.

No escenario tamén estarán o compositor e cantante José María Guzmán, unha lenda da música española, fundador de grupos como Cadillac ou Cánovas, Rodrigo, Adolfo e Guzmán, e a popular artista galega Pili Pampín, que porá o público en pé cos seus temas.

A música tradicional galega virá da man de Davide Salvado e Fransy González, a histórica agrupación folclórica Cantigas e Agarimos, o Coro Cántigas da Terra e a Banda de Música Xuvenil de Xinzo (Ponteareas). Ademais, o espazo presentado por Xosé Ramón Gayoso e Beatriz Serén ofrecerá as actuacións da orquestra Israel e da formación Alegría Berciana, de Ponferrada.

Non faltará á cita desta noite unha nova entrega do concurso ‘Recantos’, que nesta ocasión enfrontará sobre o escenario a O Chylava, representante da comarca Terras do Eume, e a Velusa, procedente de Portugal Norte.

ler máis

Luís Iglesia, recoñecido polos seus papeis de malo malísimo, aterra esta noite no 'Land Rober Tunai Show'

07/11/2019

Vai pintar a mona e enfundarse no traxe de Garda Civil para unha tarefa un tanto complicada (22.05 h)

Luís Iglesia, recoñecido polos seus papeis de malo malísimo, aterra esta noite no 'Land Rober Tunai Show'

Santiago, 07.11.2019.-    O actor galego Luís Iglesia aterra este xoves no ‘Land Rober Tunai Show’ para poñer un pouco de seriedade a tanta festa. Recoñecido polos seus papeis de malo malísimo, vai pintar a mona e enfundarse no traxe de Garda Civil para unha tarefa un tanto complicada. Será capaz, coa súa sedutora voz, de poñer orde a tanta loucura? Ademais, o público máis entregado terá que convencelo das súas trolas! Serán capaces os seguidores do programa de enganalo?

ler máis

A TVG ofrece hoxe 'A noite máxica de Lorient', multitudinaria gala que se celebra no Festival Intercéltico desta cidade francesa

06/11/2019

O programa (22.30 h) falará cos artistas galegos participantes neste grande evento, cuxo obxectivo é amosar a riqueza musical celta e que este ano estivo dedicado a Galicia

A TVG ofrece hoxe 'A noite máxica de Lorient', multitudinaria gala que se celebra no Festival Intercéltico desta cidade francesa

Santiago, 06.11.2019.-   Os espectadores da TVG asistirán esta noite a un impresionante espectáculo de luz, cor e son, o de 'A noite máxica de Lorient', un concerto que se celebra cada ano no contexto do Festival Intercéltico desta cidade francesa.

Máis de 500 artistas déronse cita no mes de agosto no estadio de Lorient para participar nun grande evento cuxo obxectivo é amosar a riqueza musical celta. Neste punto de encontro das chamadas nacións celtas, danse cita a cultura, a música e as tradicións dos diferentes países e rexións: Irlanda, Escocia, Gales, Illa de Man, a Bretaña Francesa, Cornualles, Asturias e Galicia, que este ano foi o país protagonista.

Por este motivo, un equipo da TVG, comandado por Arturo Fernández, estivo este verán en Lorient para falar cos artistas galegos participantes - Abraham Cupeiro, Xacarandaina, a Banda de Gaitas de Forcarei e a Banda de Gaitas de Invernía - e con outros moitos artistas doutras nacións celtas.

'A noite máxica de Lorient' é unha gala tan agardada que se repite durante varios días e, ademais, cada ano colleita millóns de telespectadores no prime time francés. Despois desta emisión, a Televisión de Galicia ofrecerá o concerto que deu en Lorient o grupo Tiruleque, un recital vivo e enérxico co que arrasou entre o público bretón.

ler máis

No 'Larpeiros Social Club' practicarán hoxe a cociña km 0, con produtos que se poden atopar ao carón da porta

05/11/2019

Ensalada de burrata e tomates confeitados, papos de porco con puré de pataca azul e pastel de queixo e cereixas son as propostas desta noite (22.00 h)

No 'Larpeiros Social Club' practicarán hoxe a cociña km 0, con produtos que se poden atopar ao carón da porta

Santiago, 05.11.2019.-     Para atopar produtos de excelente calidade non hai que ir moi lonxe, polo menos en Galicia. Hoxe, na cociña do ‘Larpeiros Social Club’, presumirán do produto quilómetro 0, dese que temos ao carón da nosa porta e que resulta ser o mellor, por moitos motivos.

Para coñecer este apaixonante mundo, visitará a sociedade da TVG o cociñeiro do Eco Hotel Nos, en Silleda, un lugar para soñar e comer pratos elaborados con produtos só da zona. A súa proposta para hoxe é unha ensalada de burrata km 0 e tomates confeitados, un traballo artesán que deixará a todos coa boca aberta. Entre eles, Luís Caruncho, gaiteiro e regueifeiro galego e, por suposto, amante da cociña. Con Leni fará unha gran parella, así que non faltarán os contos, as cantigas e os mellores trucos dos cociñeiros.

Julio completará o menú cuns papos de porco da casa cun puré de pataca azul, unha receita pouco habitual na mesa dos galegos, pero que resulta moi coñecida nalgúns países de América do Sur.

A encargada de poñer o toque doce será Merchi, cun pastel de queixo e cereixas, bonito, rico e sinxelo. Pero antes, a reposteira do ‘Larpeiros Social Club’ viaxará ata Negreiros para conseguir o mellor queixo para a sobremesa. Na queixaría dos irmáns Germán e Rita, aprenderá todo sobre a elaboración de queixos feitos con vacas de pastoreo, leite cru e, sobre todo, moita arte e dedicación.

Pola súa parte, Leni tamén enredará polos lares empinados que miran ao Miño, en Chantada, na busca das mellores cereixas, cun gran experto. Ramón, un traballador de banca retirado e amante deste froito por tradición familiar, amosaralle todos os segredos. Apañarán cereixas, irán vendelas á Feira da Gouxa, en Dozón, e rematarán a xornada cun prato de carne ao caldeiro, todo un clásico.

ler máis

'Segredos - Desmontando Galicia' achégase esta semana ao corazón da comarca do Eume para descubrir a riqueza dos seus recursos

04/11/2019

A través de espectaculares imaxes aéreas e recreacións en 3D, os espectadores descubrirán como é posible crear un lago e un monte nas Pontes e como funcionan as turbinas da súa central

'Segredos - Desmontando Galicia' achégase esta semana ao corazón da comarca do Eume para descubrir a riqueza dos seus recursos

Santiago, 04.11.2019.-     O programa ‘Segredos - Desmontando Galicia’ (22.10 h), que axuda a entender os xeitos de vida da nosa terra e a súa evolución sen límites espaciais e temporais grazas ás integracións 3D, achégase esta semana ao corazón da comarca do Eume para descubrir a riqueza dos seus recursos naturais, que creou toda unha industria nunha vila de só uns 10.000 habitantes, pero que produce enerxía para toda España.

O espazo da TVG proponlles aos seus espectadores unha viaxe no tempo que incluirá unha parada na térmica das Pontes, nunha gravación que se realizou antes de que Endesa decidise acelerar o peche das súas centrais de carbón.

Como é posible crear un lago e un monte nas Pontes de García Rodríguez? Como funcionan as turbinas da central? Estas son algunhas das preguntas que, a través de espectaculares imaxes aéreas e recreacións en 3D, atoparán hoxe resposta en ‘Segredos - Desmontando Galicia’.

Ademais, Diana Nogueira e Alicia Burton subirán ao alto da cheminea das Pontes e descubrirán como funcionan os eólicos da man do ‘Sabichón’. Tamén comprobarán se  Miguel Alvariño, todo un campión mundial do tiro con arco, é capaz de manexar os mandos da central.

ler máis

Despois dun novo fracaso no intento de cazar a César, a pantasma dun infiltrado na comisaría volve aflorar en 'A estiba'

03/11/2019

Tras o espallamento do escandoloso vídeo de Marcos por toda Ardora, a súa relación con Rosalía toca fondo, pero esta descubrirá, da man da persoa máis inesperada, que todo forma parte dun plan do seu pai

Despois dun novo fracaso no intento de cazar a César, a pantasma dun infiltrado na comisaría volve aflorar en 'A estiba'

Santiago, 03.11.2019.-    O capítulo deste domingo de 'A estiba' (22.05 h) comeza coa chegada dun novo barco ao porto de Ardora. César e os seus homes prepáranse para unha nova descarga, pero non son os únicos. Manuela activa unha operación sen precedentes para cazar a César durante o transporte. Este decátase da presenza policial e evita, por pouco, a intervención da comisaría. Ante un novo fracaso, a pantasma dun infiltrado entre os seus volve aflorar na cabeza de Manuela e, coa axuda de Cruz, organiza un plan para descubrila.

Despois de anular a descarga, César tamén pensa que ten un delator entre os seus e encárgalle a Salvador que o atope custe o que custe. Salva non tarda en establecer unha lista cos seus sospeitosos e os primeiros que ocupan os postos de saída son Lucas e Estela. Lucas non pode ser o delator, pero Estela, a filla de Castor, xa é outro cantar.

Mentres tanto, o escandaloso vídeo de Marcos espallouse por toda a cidade. A vida pública e a carreira política do alcalde penden dun fío e, o que é peor, a súa relación con Rosalía tocou fondo. Para ela, a traizón de Marcos é imperdoable, pero o que aínda non sabe é que todo responde a un plan do seu pai para afundilo, unha información que non tarda en coñecer e que vén da persoa que menos imaxinaría.

ler máis