CRTVG

Buscar

CRTVG Viva

Novas RG

'Galicia en Goles' regresa este sábado coa programación habitual da fin de semana

04/06/2020

O programa deportivo da Radio Galega volve ao seu horario convencional e seguirá de preto aos tres equipos galegos de fútbol profesional

'Galicia en Goles' regresa este sábado coa programación habitual da fin de semana

Santiago, 02.06.2020.- Galicia en Goles’ recupera a programación habitual da fin de semana desde o sábado 6 de xuño. Co reinicio da Liga de Fútbol, o programa volve ao horario convencional, de 15:00 a 23:00 horas. Con Xoán Galán estarán nos estudios de San Marcos Rodrigo Pérez e o humorista David Noya, xunto ao equipo de locutores, reporteiros e analistas espallados polos campos onde compitan os nosos equipos.

ler máis

O programa 'Ao Contraataque' da RG volve este luns ao horario das once da noite

22/05/2020

A Radio Galega vai recuperando a normalidade das súas emisións deportivas

Desde o 29 de maio, o ‘Galicia en Goles’ dos venres emitirase ata as 23:59 h, ampliando unha hora a súa duración

O programa 'Ao Contraataque' da RG volve este luns ao horario das once da noite

Santiago, 22.05.2020.- A medida que se achega a volta da Liga de fútbol, a programación deportiva da Radio Galega vai recuperando a normalidade. Se hai dúas semanas, 'Zona Mixta' regresaba á emisión convencional das 15:00 horas, agora é 'Ao Contraataque' o espazo que normaliza a súa emisión no horario habitual das 23:00 h.

ler máis

Unha reportaxe da Radio Galega sobre o ciclismo nas estradas, finalista no XVII Premio Xornalístico de Seguridade Viaria

15/05/2020

O traballo de Paula Martínez foi emitido esta temporada no programa ‘Panorámica’

Este galardón de referencia no xornalismo español, ao que este ano se presentaron máis de 2.000 candidaturas, quere recoñecer o labor dos profesionais que promoven a difusión de noticias sobre hábitos responsables ao volante

Unha reportaxe da Radio Galega sobre o ciclismo nas estradas, finalista no XVII Premio Xornalístico de Seguridade Viaria

Santiago, 15.05.2020.-    Unha reportaxe de Paula Martínez, da Radio Galega, sobre a convivencia entre ciclistas e outros condutores, é finalista no XVII Premio Xornalístico de Seguridade Viaria. Estes premios da Fundación Línea Directa recoñecen así o traballo da xornalista da Radio Galega, emitido esta temporada no programa ‘Panorámica’ baixo o título ‘Como conviven nas estradas galegas os ciclistas con outros vehículos?’. ‘Panorámica’ emítese os sábados a mediodía, desde hai dous anos, na radio pública e xa ten recibido outros premios neste tempo.

Nesta edición presentáronse máis de 2.000 candidaturas, o que sitúa o Premio Xornalístico de Seguridade Viaria como un galardón de referencia no xornalismo español. Será un prestixioso xurado, presidido polo director xeral de Tráfico, Pere Navarro, e formado por importantes personalidades do mundo da comunicación, quen designará os gañadores en función da calidade, o labor de concienciación e o enfoque dos traballos presentados. Os traballos xornalísticos finalistas, que, segundo a organización, destacan pola súa calidade e o seu labor informativo en materia de seguridade viaria, optan a un premio de 10.000 euros netos en cada unha das tres categorías do premio (prensa e medios online, radio e televisión).

O Premio Xornalístico de Seguridade Viaria da Fundación Línea Directa quere recoñecer o labor daqueles xornalistas que elaboran e difunden traballos xornalísticos de seguridade viaria, coa finalidade de impulsar a difusión de noticias que promovan hábitos responsables ao volante e nos acheguen ao obxectivo común de cero falecidos na estrada.

ler máis

Semana das Letras na CRTVG coa estrea de cinema, documentais e a primeira ópera en galego

10/05/2020

Debut na Galega do filme de época 'A sombra da lei', do monfortino Dani de la Torre, e a adaptación cinematográfica de ‘A estación violenta’, de Manuel Jabois

Poderase gozar, en primicia en televisión, da ópera 'A amnesia de Clío' e do espectáculo musical 'Son galego, son cubano', unha homenaxe á emigración galega, desenvolvido con letras de Neira Vilas

Semana das Letras na CRTVG coa estrea de cinema, documentais e a primeira ópera en galego

Santiago, 11.05.2020.- A programación da canle pública galega métese de cheo esta semana na celebración do Día das Letras Galegas, que este ano destaca a figura e a obra de Ricardo Carvalho Calero, catedrático, crítico, creador literario ferrolán e autor da Historia da Literatura Galega Contemporánea. Durante estes días, os espectadores poderán ver longametraxes galegas destacadas, documentais, contidos específicos sobre o escritor e espectáculos musicais, en primicia en televisión, como a primeira ópera en galego, entre outras propostas culturais.

O Día das Letras, cinema e espectáculos musicais de estrea

Os amantes do cinema terán dúas destacadas estreas na TVG, con selo galego. A primeira proposta, 'A estación violenta', a adaptación cinematográfica da novela homónima de Manuel Jabois e primeira longametraxe de Anxos Fanzás, poderase ver o 14 de maio, tras a emisión do 'Land Rober Tunai Show'. Na tarde do Día das Letras, estrearase en aberto 'A sombra da lei', película de acción e de época do monfortino Dani de la Torre, con Luís Tosar como protagonista.

Cómpre salientar tamén a estrea en televisión, o 16 de maio na G2 e ao día seguinte na TVG, da representación de 'A amnesia de Clío', a primeira ópera galega do século XXI, dirixida por Marta Pazos, coa colaboración da Real Filharmonía de Galicia, o Centro Dramático Galego e a Asociación de Amigos da Ópera de Santiago de Compostela. Esta peza contemporánea, composta por Fernando Buide, escrita polo dramaturgo Fernando Epelde e con Paul Daniel na dirección musical, propón unha viaxe extravagante en que se mesturan a realidade histórica e a ficción política.

O 17 de maio, os espectadores poderán gozar na G2 co espectáculo musical 'Son galego, son cubano' (TVG, 18 de maio), desenvolvido por Roi Casal conxuntamente con Neira Vilas ata o falecemento deste último, en novembro de 2015. Esta posta en escena, con grandes músicos de ambos países e con letras do escritor, vista por primeira vez no Gran Teatro da Habana en 2016, está considerada como unha fermosa homenaxe ao propio Neira Vilas e á emigración galega en Cuba, onde o autor residiu 31 anos.

A programación especial polo Día das Letras continuará na TVG con 'En Land Rober Queremos Galego', unha edición, que tratará, en clave de humor, o xeito en que se emprega a lingua galega no show. Tamén nesta xornada festiva se emitirá un 'Zigzag Especial Letras', que debullará a vida e a obra do autor. Este monográfico acompañarase de imaxes de arquivo e do testemuño de numerosos convidados, entre amigos, familiares e alumnos do intelectual ferrolán.

Na véspera, o 16 de maio, a Televisión de Galicia ofrecerá unha biografía polo miúdo de Carvalho Calero no especial 'Carvalho da Galiza'.

Noites temáticas na G2

Entre o 12 e o 15 de maio, a G2 achegará contidos especiais nas súas Noites temáticas, onde a través de programas e documentais se recollerán as súas opinións, traxectoria, biografía, entrevistas e testemuños de especialistas no autor. Así, entre as propostas específicas sobre o autor, cómpre salientar o martes os espazos 'A trabe de ouro' (12 maio), que recolle unha conversa con Ricardo Carvalho Calero e 'A dúas bandas', programa de debate que enfronta a posición sobre o galego lusista de Carvalho Calero coa oficial de Constantino García; 'Ás de Ouros' (13 maio) ofrecerá as opinións do escritor homenaxeado sobre cuestións diversas; o programa 'Visións' (14 maio) achegará unha entrevista realizada a Ricardo Carvalho con motivo do seu premiado libro ‘Escorpio’, e pechando a semana poderase ver o documental 'De Carballo a Carvalho' (15 de maio), en que diversos expertos, como Víctor Freixanes, Pilar García Negro ou Darío Villanueva, entre outros moitos, repasarán a vida e obra do profesor e intelectual ferrolán.

'Quérote en galego' e cortinas

ler máis

Este luns regresa á RG o programa deportivo 'Zona Mixta'

08/05/2020

O espazo deportivo regresa ás ondas da Radio Galega para acompañar os oíntes e os afeccionados ao deporte, coincidindo nesta xornada coa volta aos adestramentos dos tres equipos galegos de fútbol profesional

 

Este luns regresa á RG o programa deportivo 'Zona Mixta'

Santiago, 08.05.2020.- Os oíntes da Radio Galega poden gozar de novo do programa ‘Zona Mixta’. Este luns 11 de maio, Carlos Alonso regresa ás 15:00 horas con toda a información deportiva, nunha hora de emisión con noticias, opinións e entretemento.

ler máis

O Mes das Letras Galegas comeza nos medios públicos con contidos especiais dedicados a Carvalho Calero

30/04/2020

A Radio Galega inicia mañá, 1 de maio, a emisión diaria de pílulas con fragmentos da obra do crítico, ensaísta e creador literario ferrolán, amais de ofrecer o Día das Letras especiais sobre o autor homenaxeado

Arredor do 17 de maio, a TVG estreará en televisión ‘A amnesia de Clío’, a primeira ópera en galego, e o espectáculo musical ‘Son galego, son cubano’

O Mes das Letras Galegas comeza nos medios públicos con contidos especiais dedicados a Carvalho Calero

Santiago, 30.04.2020.-  Os medios públicos galegos poñen en marcha desde este venres, 1 de maio, unha programación especial con motivo das Letras Galegas. Aínda que os actos centrais do Día das Letras se aprazaron pola crise sanitaria ao 31 de outubro, un día despois do 110 aniversario do nacemento do intelectual ferrolán, a CRTVG vai ter contidos específicos ao longo de todo o mes dedicados á figura e obra de Ricardo Carvalho Calero.

A Radio Galega comezará este 1 de maio a emisión de cápsulas diarias con fragmentos da obra de Carvalho Calero, apoiadas pola voz da xornalista Isabel Freire. Ao longo da primeira quincena, o legado do autor homenaxeado estará moi presente na programación da emisora pública.

A semana do 10 ao 17 de maio, no ‘Diario cultural’ emitiranse entrevistas con persoas expertas sobre o homenaxeado. Todos estes contidos especiais estarán dispoñibles no enderezo diariocultural.gal. Tamén o propio Día das Letras, na Radio Galega achegarase o especial ‘Arredor de nós’, dedicado ao escritor, así como microespazos sobre a súa vida e obra, coa participación de persoas moi coñecedoras da súa biografía.

A primeira ópera en galego e monográficos sobre o autor

Arredor do Día das Letras, Televisión de Galicia ofrecerá unha biografía de Carvalho Calero nun especial ‘Contraportada’ e un ‘Zigzag das Letras’ debullará a vida e a obra do autor. Este monográfico acompañarase de imaxes de arquivo e do testemuño de numerosos convidados, entre amigos, familiares e alumnos do intelectual ferrolán.  
    
Cómpre salientar tamén a estrea en televisión, o 16 de maio, da representación de ‘A amnesia de Clío’, a primeira ópera en galego, composta por Fernando Buíde, con texto do dramaturgo Fernando Epelde e interpretada pola Real Filharmonía de Galicia, baixo a batuta de Paul Daniel. Á fronte das voces sitúanse a soprano Raquel Lojendio, a mezzosoprano Marina Pardo, o barítono Sebastiá Peris e o Orfeón Terra A Nosa de Compostela.

Neste senso, os espectadores da Galega tamén poderán gozar o 17 de maio co espectáculo musical ‘Son galego, son cubano’, desenvolvido por Roi Casal conxuntamente con Neira Vilas ata o falecemento deste último, en novembro de 2015. Esta posta en escena, con grandes músicos de ambos países e con letras do escritor, vista por primeira vez no Gran Teatro da Habana en 2016, está considerada como unha fermosa homenaxe ao propio Neira Vilas e á emigración galega en Cuba, onde o autor residiu 31 anos.

Televisión de Galicia prepara tamén contidos específicos para ofrecer este mes, como as cortinas creadas sobre o crítico, ensaísta e creador literario homenaxeado, que serán visibles ao longo de toda a programación. Outra das propostas da TVG para celebrar o Mes das Letras é a emisión dunhas pezas, baixo o lema ‘Quérote en galego’, en que actores e presentadores dos medios públicos lle dedicarán á audiencia a súa palabra favorita na  nosa lingua, unha palabra que ten unha conexión emocional coas súas vidas.

Cine galego de estrea

Haberá estreas de cinema galego e na G2 ofreceranse catro noites temáticas, entre o 12 e o 15 de maio, onde a través de programas e documentais se recollerán as súas opinións, traxectoria, biografía, entrevistas e testemuños de expertos sobre o autor.

No que respecta ás propostas cinematográficas, destaca a estrea de dúas películas galegas participadas pola Televisión de Galicia. O 14 de maio poderase ver a adaptación cinematográfica de ‘A estación violenta’, primeira longametraxe de Anxos Fanzás, baseada na novela homónima de Manuel Jabois, e o día 17, en primicia en televisión, ‘A sombra da lei’, filme de época dirixido por Dani de la Torre, con Luís Tosar como protagonista.
 
A maiores, os espazos informativos da TVG achegarán contidos diversos sobre o catedrático e escritor ferrolán ao longo de todo mes e a CRTVG empregará a súa web e redes sociais coma outra fonte divulgadora.

                                     #Coidémonos   #SairemosXuntosDisto


ler máis

Todas as emisoras da Radio Galega, dispoñibles nos altofalantes intelixentes Alexa a través da aplicación Radioplayer

28/04/2020

A oferta da RG xa era accesible con estes dispositivos, pero agora súmanse tamén Radio Galega Música, Son Galicia Radio e Radio Picariña

Todas as emisoras da Radio Galega, dispoñibles nos altofalantes intelixentes Alexa a través da aplicación Radioplayer

Santiago, 28.04.2020.-    Toda a oferta da Radio Galega, incluída desde agora Radio Galega Música, Son Galicia Radio e Radio Picariña, está xa dispoñible en Alexa, os altofalantes intelixentes de Amazon. Radioplayer España, aplicación gratuíta con toda a oferta radiofónica española, acaba de anunciar a integración do seu servizo nestes dispositivos, que permiten, a través dun asistente de voz, acceder ás emisoras favoritas dun xeito cómodo e sinxelo.

Xa era posible escoitar a programación da Radio Galega a través de Alexa desde o mes de xaneiro, cando a radio pública de Galicia deu os primeiros pasos na súa distribución a través dos medios propiamente dixitais, e agora, con esta iniciativa de Radioplayer, os oíntes tamén poderán acceder en directo e á carta ao resto das súas emisoras.

Para escoitalas nestes dispositivos, é necesario habilitar primeiro a aplicación de voz para Alexa, dicindo "Alexa, habilita Radioplayer España". A partir dese momento, só haberá que dicir "Alexa, abre Radioplayer" ou "Alexa, pide a Radioplayer Radio Galega".
           
Con este lanzamento, Radioplayer España avanza no seu obxectivo de facilitar e promover a escoita de radio en dispositivos conectados. Os altofalantes intelixentes están a incrementar a súa presenza nos fogares españois e son unha boa alternativa para a escoita de radio na casa, nun momento en que, ante a difícil situación que estamos a vivir, a radio serve de punto de conexións de millón de persoas e xoga un papel crítico na sociedade, con información rigorosa en todo momento, música e entretemento.
 
Avalado polos líderes do sector radiofónico, Radioplayer é o sitio da radio española que ofrece centos de emisoras en directo, milleiros de programas á carta e podcasts, a través das aplicacións de iOS e Android, na web www.radioplayerespaña.es e agora tamén en Alexa. Radioplayer España forma parte da familia Radiplayer Worldwide, unha organización sen ánimo de lucro creada e xestionada por radiodifusores, presente en Alemaña, Austria, Bélxica, Canadá, Dinamarca, España, Irlanda, Italia, Noruega, O Perú, Reino Unido e Suíza.

ler máis

Desde o luns, volve o 'Diario Cultural' á Radio Galega

26/04/2020

De 17:30 a 18:00 h, Vituco Neira pescudará como está a vivir esta situación o mundo da cultura e cales son as súas inquietudes e proxectos

Os membros da Ukestra do Medio falarán do seu novo disco e da súa actividade na rede, e a comisaria de arte Rosario Sarmiento explicará a situación neste sector


Desde o luns, volve o 'Diario Cultural' á Radio Galega

Santiago, 26.04.2020.-    Para dar conta do que se está a mover no mundo da cultura durante estas semanas, a Radio Galega retoma a partir do luns, 27 de abril, a emisión do Diario Cultural, que fora suspendido despois da declaración do estado de alarma, na súa edición de tarde. De luns a venres, de 17:30 a 18:00 h, con Vituco Neira aos micrófonos, a RG recupera un tempo de seu para a cultura, cuxa información se estivo a ofrecer durante o confinamento nos distintos magazines da emisora.

Así pois, reábrese o Diario Cultural para saber o que está a ocorrer nas redes e para estar ao carón dos protagonistas da cultura galega nestes difíciles momentos. Cada tarde, os oíntes saberán como están a vivir esta situación, cales son as súas inquietudes e en que están traballando. O espazo da Radio Galega contará neste regreso coa participación dos seus colaboradores nos distintos ámbitos, desde a música, a literatura e a arte ata a danza e o teatro, pasando polo cinema ou a banda deseñada, entre outros.

ler máis

A actualidade científica e tecnolóxica regresa á Radio Galega cos programas 'Efervesciencia' e 'Lambóns dixitais'

22/04/2020

Emitiranse a medianoite do mércores e do xoves, respectivamente, e amosarán como está a afectar a crise da COVID-19 nestes dous eidos

No seu regreso, Efervesciencia ofrece esta noite unha entrevista en exclusiva co virólogo galego César Muñoz-Fontela, que traballa no Plan de Aceleración de Vacinas da OMS

A actualidade científica e tecnolóxica regresa á Radio Galega cos programas 'Efervesciencia' e 'Lambóns dixitais'

Santiago, 22.04.2020.-    A Radio Galega retoma esta semana a emisión dos programas Efervesciencia e Lambóns dixitais, centrados na actualidade científica e tecnolóxica, respectivamente, que foron suspendidos despois da declaración do estado de alarma.

O espazo de divulgación científica Efervesciencia, dirixido e presentado por Manuel Vicente, regresa esta noite ás 00:00 h e durante as vindeiras semanas estará centrado fundamentalmente na investigación sobre o coronavirus desde un dobre enfoque: informativo e humano. No seu regreso, ofrecerá unha entrevista en exclusiva co virólogo galego César Muñoz-Fontela, que traballa no Plan de Aceleración de Vacinas da OMS. A título persoal, explicará o traballo que se está a realizar para testar todas as propostas de vacinas da COVID-19 que xa hai enriba da mesa, unhas 140. É un esforzo científico sen precedentes, baseado na colaboración internacional e na compartición de información.

Ademais, cada semana, Efervesciencia falará con diferentes divulgadores científicos galegos que comentarán como están a vivir esta situación extraordinaria. Esta noite, Manuel Vicente conversará con Eduardo Rolland, director de GCiencia, que explicará como se viviron en Galicia outros andazos, como a peste ou a gripe de 1918, e coa presidenta de SciCom Portugal, Joana Lobo Antunes, que falará da situación no país veciño.

Pola súa parte, Lambóns Dixitais, o programa da RG sobre as tecnoloxías da información e a comunicación, regresa mañá xoves, tamén ás 00:00 h, dirixido e presentado por Carlos García-Verdugo. Cada semana e a través das súas seccións habituais, fará un repaso da actualidade tecnolóxica e tamén haberá tempo para saber como lle está a afectar a este sector a crise sanitaria da COVID-19.

Lambóns Dixitais tamén recupera nesta nova andaina os seus colaboradores habituais. Deste xeito, Marcus Fernández comentará a actualidade tecnolóxica, Javier Mos falará de redes sociais e Daniel González Portela fará unha aproximación semanal ao mundo dos videoxogos.

ler máis

As radios públicas autonómicas, aínda máis preto dos seus oíntes

21/04/2020

Desde que se declarou o estado de alarma, están a desenvolver un papel fundamental, non só como servizo esencial de información ou como medio de entretemento, senón tamén como apoio e compaña para as persoas que o necesitan

Ademais de engadir un cento de cancións para os máis pequenos na oferta de Radio Picariña, a RG está a centrar os seus programas durante o confinamento na cultura e no entretemento

As radios públicas autonómicas, aínda máis preto dos seus oíntes

Santiago, 21.04.2020.-   Desde que en España se declarou o estado de alarma debido á pandemia da COVID-19, as radios públicas autonómicas, entre as que se atopa a Radio Galega, están a desenvolver un papel fundamental na sociedade, non só como servizo esencial para informar rigorosamente ou como medio de entretemento para os cidadáns, senón tamén como apoio e compaña para todas as persoas que o necesitan. Co obxectivo de axudar os seus oíntes a resolveren dúbidas, apoialos e transmitirlles ánimos nesta época de confinamento, as radios pertencentes á Federación de Organismos de Radio e Televisión Autonómicos (Forta) puxeron á súa disposición números de teléfono e de WhatsApp para consultas de calquera índole.

Neste sentido, emisoras como Aragón Radio ou IB3 Ràdio (Illas Baleares) aumentaron o número de liñas dispoñibles para os oíntes e o número de redactores dedicados a atendelas. Pola súa parte, Canarias Radio envía mensaxes de apoio aos seus oíntes baixo o cancelo #quédatenecasa, mentres que Onda Madrid utiliza o contacto telefónico para axudar as persoas maiores a non saíren da casa poñéndoas en contacto con persoas ou asociacións que lles fagan a compra ou lles leven os medicamentos aos seus fogares.

Ademais, varias canles están a ofrecer a posibilidade de entrar nos programas enviando dedicatorias, felicitacións ou mensaxes de ánimo, mentres que outras contan coa colaboración de expertos, como psicólogos, científicos, nutricionistas ou mesmo membros das forzas de seguridade do estado para contestar as preguntas dos oíntes.

Cultura, entretemento e propostas musicais para os máis pequenos na RG

Pola súa parte, a Radio Galega está a centrar os seus programas durante o confinamento na cultura e no entretemento, emitindo contidos culturais de alta calidade directamente desde os seus arquivos, como as actuacións do programa Notas de Jazz ou os concertos de Medio Bolo, e tamén a través do deporte, narrando as competicións online de fútbol desde Galicia en Goles.

As propostas de entretemento da RG tamén lles prestan especial atención aos nenos e nenas, que son quen máis o precisan. Por isto, Radio Picariña, a súa primeira canle dixital de música infantil e xuvenil, ampliou durante esta crise os seus contidos musicais cun cento de novas cancións para os máis pequenos da casa. Os autores dos novos temas que se inclúen son, entre outros, Fofó, Chuches Amil, Mamá Cabra, João Afonso e Alonso Caxade. A piques de facer dous anos e integrada na marca Xabarín Club da CRTVG, Radio Picariña ten dispoñibles xa máis de dun milleiro de cancións en lingua galega.  

Catalunya Ràdio tamén se está a implicar nestes momentos co público infantil a través do programa Popap Escolar, con contidos educativos dirixidos ás diferentes idades escolares, mentres que CMM Radio (Castela A Mancha) incorporou o programa La Hora del Cuento, unha ficción sonora cunha obra de literatura infantil dirixida aos nenos nunha hora importante para o seu descanso.

As accións máis especiais das radios públicas

Entre as medidas máis especiais e emotivas levadas a cabo polas radios públicas autonómicas para alixeirar o confinamento, atópanse dous concertos en directo que ofreceron dous locutores da vasca EITB desde os seus balcóns, picando os temas que pedía a súa audiencia. Outro exemplo musical é o da valenciana À Punt e o seu programa musical Territori Sonor, que ofrece seis horas extra en directo e conta cun espazo para que o público cante desde a súa casa.

Pola súa parte, Onda Madrid está a destacar os movementos solidarios da sociedade civil, mentres que a asturiana RPA puxo en marcha unha iniciativa para poñer en contacto consultores ou axentes inmobiliarios que buscan propietarios dispostos a prestarlles vivendas a sanitarios e corpos e forzas de seguridade. Outra iniciativa destacada neste senso é a de CMM Radio, que emite diariamente unha carta sonora redactada por músicos, escritores xornalistas e persoeiros da sociedade manchega, dirixida aos contaxiados e enfermos nos hospitais.

En definitiva, todas as emisoras de Forta axustaron a súa programación ás novas necesidades dos oíntes. Un exemplo é o programa Madrid Directo, de Onda Madrid, que inclúe unha sección gastronómica para propoñer unha alimentación saudable durante o confinamento e outra con pautas e resolución de dúbidas para a convivencia familiar e en parella. Tamén se puxeron en marcha novos programas, como é o caso de Catalunya Radio e Catalunya Informació, que ofrecen cada día o testemuño dos diferentes sectores afectados, e de À Punt, que estreou Cròniques de l’aïllament, un radio-documental diario que recolle as vivencias dos profesionais que están a traballar en primeira liña.

ler máis