Santiago, 05.06.2014.-   A Televisión de Galicia vén de dar un paso máis na adaptación da súa infraestrutura tecnolóxica ao competitivo escenario actual coa conclusión do proceso de dixitalización das delegacións, que a canle autonómica ten nas cidades da Coruña, Vigo, Lugo, Ourense e Madrid. Este proceso terá continuidade e finalizará coa total modernización da redacción situada na sede do ente público galego.

A dixitalización das delegacións da Galega supuxo un gran reto para o medio público galego, xa que requiriu realizar profundos cambios na infraestrutura dos centros, que non interferiran na actividade diaria dos mesmos; novos estudios de gravación audiovisuais, con cámaras robotizadas HD programables que melloraran a calidade técnica dos contidos e optimizaran os recursos; unha implementación na edición e posprodución dixital, e unha renovación dos controis de realización, mellorando o equipamento e os programas. 

Outro dos avances acadados é que as delegacións dispoñen agora de arquivos audiovisuais propios con fondos en calidade HD, xestionados desde San Marcos polo Servizo de Documentación da CRTVG a través de aplicacións web.