CRTVG

Buscar

CRTVG Viva

O carismático cantante Blas Cantó experimentará esta noite o ritmo frenético do 'Land Rober Tunai Show'

25/04/2019

Para que os espectadores tamén xoguen na casa, volve o reto que enfronta xeracións: Xubilados VS Millennials (22.15 h.)

O carismático cantante Blas Cantó experimentará esta noite o ritmo frenético do 'Land Rober Tunai Show'

Santiago, 25.04.2019.-     ‘Land Rober Tunai Show’ recibe este xoves o carismático Blas Cantó. O cantante vén experimentar o ritmo frenético do show e de que maneira, xa que o programa porao a proba coa súa voz e habilidade para imitar. Ademais, demostrará a súa pericia na ficción, onde vai coñecer a vida real dos repartidores.

E para que os espectadores tamén xoguen na casa, volve o reto que enfronta xeracións: Xubilados VS Millennials. Quen conseguirá o liderado deste show entre novos e non tan novos?

Ao espectáculo únense esta noite David Perdomo e Sabela Arán, que, xunto a Roberto Vilar e compañía, ofrecerán o mellor humor da Televisión de Galicia.

ler máis

Presentación de 'Galicia Bonita', o programa sobre rehabilitación de vivendas que se estreará o luns 29

24/04/2019

A presentación, na Fundación Abanca de Santiago, contou coa presenza do equipo do programa, dalgúns dos seus protagonistas e de rostros coñecidos da canle pública

O novo espazo, que conta con 9 capítulos, visitará cada semana unha vivenda descoidada para axudar na súa reforma

Presentación de 'Galicia Bonita', o programa sobre rehabilitación de vivendas que se estreará o luns 29

Santiago, 24.04.2019.-   A Televisión de Galicia presentou en Santiago o seu novo espazo, 'Galicia Bonita', cunha preestrea na Fundación Abanca. Neste novo docu-reality de reformas, que chegará ás pantallas da TVG os luns desde o vindeiro 29 de abril, unha arquitecta percorrerá a xeografía galega na procura dos feísmos máis comúns, para poñerlles remedio xunto cos veciños e o seu 'equipo de arranxos'. 

ler máis

A CRTVG presentou no Foro do Deporte un sistema dixital que lles permitirá aos clubs gravar de balde os partidos

24/04/2019

Esta nova ferramenta, segundo explicou o director de Innovación da Corporación, posibilitará recoller imaxes e distribuílas a través da canle deporte360.gal da CRTVG
 

A CRTVG presentou no Foro do Deporte un sistema dixital que lles permitirá aos clubs gravar de balde os partidos

Santiago, 24.04.2019.-  No marco do Foro do Deporte Federado, desenvolvido na Escola Galega de Administración Pública, a CRTVG presentou unha nova ferramenta audiovisual, que lles permitirá aos clubs deportivos recoller as imaxes de cada partido e distribuílas a través dunha canle específica da Corporación, denominada deporte360.gal.  

José Pereira Fariña, director de Innovación e Negocio da CRTVG, presentou esta nova plataforma dixital, que permite a gravación, produción, distribución e visualización multicámara de calquera acontecemento deportivo. A nova canle, de momento en fase experimental, ten por obxecto converterse nun lugar de referencia que documente as actividades deportivas dos deportes base, feminino e alternativo que se celebran en Galicia cada temporada.

A CRTVG pon este sistema a disposición de balde de todas as federacións deportivas galegas. Este proxecto formalizouse tras a sinatura dun convenio o mes de maio pasado entre a Corporación e a Secretaría Xeral para o Deporte.

ler máis

A actriz Lucía Regueiro súmase hoxe ao elenco do 'Malo será!' desde a casa da cultura de Vimianzo

24/04/2019

Os espectadores acompañarán unha parella en busca da Santa Compaña e serán testemuñas dun duelo entre presentadoras, entre outras historias cómicas

A actriz Lucía Regueiro súmase hoxe ao elenco do 'Malo será!' desde a casa da cultura de Vimianzo

Santiago, 24.04.2019.-  A actriz e presentadora Lucía Regueiro acompaña como convidada especial o elenco habitual de actores e actrices que interpretan as historias de 'Malo será!' (22.15 h.), que a TVG emite cada mércores. Este programa itinerante, que achega a televisión aos teatros de todo o país, chega esta noite ata a casa da cultura de Vimianzo para ofrecer dúas horas de humor protagonizadas polos mellores cómicos da escena galega.

Os espectadores serán este mércores testemuñas dun auténtico duelo entre presentadoras, asistirán a unha feira de gando e mesmo a un casting con estilos… moi similares. Tamén se poderá acompañar unha parella de turistas en busca da Santa Compaña.

Amais de Lucía Regueiro, intervirá nos distintos sketchs o elenco de actores habitual do programa, formado por Marcos Pereiro, Federico Pérez, Lucía Veiga, Cristina Andrade, Oswaldo Digón, Marita Martínez e Evaristo Calvo.

ler máis

O equipo de 'A tarde' desprázase este xoves a Arbo na véspera do comezo da súa popular Festa da Lamprea

24/04/2019

Neste especial da Radio Galega, que se ofrecerá desde o museo Arabo, falarase da importancia deste peixe e dos viños da zona na economía da localidade

O equipo de 'A tarde' desprázase este xoves a Arbo na véspera do comezo da súa popular Festa da Lamprea

Santiago, 24.04.2019.- O magazine 'A tarde' da Radio Galega achegarase este xoves á localidade pontevedresa de Arbo, onde está todo disposto para celebrar os días grandes da 59 edición da multitudinaria Festa da Lamprea esta fin de semana. O equipo do programa radiofónico, con Antón Rebollido á fronte dos micros, realizará este especial desde o museo Arabo, o Centro de Interpretación do Viño e da Lamprea.

A Festa da Lamprea, considerada de interese turístico nacional, é unha cita moi agardada polos amantes deste peixe, xa que nela pode degustarse das máis variadas maneiras, como é á bordelesa, rechea, á brasa ou mesmo guisada. Para falar de gastronomía e da receita máis demandada, 'A tarde' contará no espazo coa presenza do responsable do restaurante Os Pirús, un dos establecementos de referencia para saboreala. Tamén se coñecerá todo acerca da lamprea grazas ás achegas de José Antonio, un pescador lampreeiro.

Arbo é a capital da lamprea, pero é tamén o corazón dos viños condado e albariño. Por iso, este xoves terán un peso destacado en 'A tarde' os caldos da zona. Así, estarán presentes no programa as adegas Marqués de Vizhoja, As Laxas, Adegas Terrae e Pazo Pondal, e conversarase co presidente do Consello Regulador da Denominación de Orixe Rías Baixas, Juan Gil de Araújo, sobre a situación do sector.

O historiador Manolo Giráldez pasará tamén polos micrófonos do programa para falar sobre a tradición das pesqueiras e a relación que hai entre Arbo e o vertebrado máis antigo do planeta, especie da que se calcula que ten máis de 500 millóns de anos.

O humorista e presentador Roberto Vilar, como pregoeiro da presente edición, será outros dos convidados neste especial, ao igual que o gañador do cartel da Festa da Lamprea, Néstor Domínguez, e o alcalde de Arbo, Horacio Gil.

Os contidos de 'A tarde' completaranse falando con Fátima Gil, presidenta da asociación 3 de julio: todas las personas somos víctimas, constituída en Arbo o mes pasado co obxectivo de promover e realizar actividades encamiñadas a axudar as vítimas de agresións sexuais, violencia sexista ou calquera outra forma de violencia de xénero.

ler máis

O cociñeiro Héctor López visita esta noite 'Larpeiros' para preparar unha costela de tenreira con ñoquis de cabaza

23/04/2019

As reposteiras do programa proporán nesta ocasión un crumble de plátano, mentres que Adrián irá a Sarria para saber como se fai a torta de améndoas e castañas

O cociñeiro Héctor López visita esta noite 'Larpeiros' para preparar unha costela de tenreira con ñoquis de cabaza

Santiago, 23.04.2019.-  O programa ‘Larpeiros’ (22.00 h.) contará hoxe coa presenza dun convidado de luxo, Héctor López, do restaurante España, en Lugo. Despois da conversa, decidirán cociñar un dos produtos estrela desta terra: a carne. A proposta de Héctor é unha costela de tenreira ao forno dun xeito diferente, con calma, sabedoría e unha gornición especial: irá acompañada dunha salsiña de verduras e uns ñoquis de cabaza. Adrián será o encargado de axudalo para crear un prato que de seguro que pasará á historia de ‘Larpeiros’.

Ademais, o ‘larpeiro’ máis viaxeiro irá ata Sarria para preparar e degustar unha súper lambonada: torta de améndoas e castañas, unha receita familiar de Lourdes Pombo, unha grande experta neste asunto.

E, para rematar unha troula inesquecible, as reposteiras do programa, Merchi e Lola, prepararán un crumble de plátano, un pastel de orixe inglesa moi rico e sinxelo de facer.

ler máis

Esta noite, 'Ao contraataque' dende Barcelona, con Borja Iglesias de protagonista

22/04/2019

O dianteiro santiagués será entrevistado polo programa da Radio Galega na semana en que se enfronta ao seu ex-equipo, o Celta

Esta noite, 'Ao contraataque' dende Barcelona, con Borja Iglesias de protagonista

Santiago, 22.04.2019.- Pedro Pablo Alonso traslada hoxe o estudio de 'Ao contraataque' ata o estadio de Cornellá El Prat, estadio do RCD Español. Desde alí, ás 23.00 horas, a Radio Galega ofrece unha edición especial do programa deportivo cun dos dianteiros de moda do fútbol español, o santiagués Borja Iglesias.

A entrevista co exfutbolista do Celta chega na semana en que se vai medir co seu ex-equipo, vestindo a camisola do RCD Español de Barcelona. O cadro catalán xa ten practicamente atada a permanencia na primeira división tras un empate a dous no estadio Ciutat de Valencia ante o Levante, sendo o primeiro gol do encontro do propio Borja Iglesias. Con este tanto xa suma trece na súa primeira temporada na primeira división.

Español e Celta enfróntanse este mércores ás 20.30 horas en Cornellá. Na clasificación están separados por sete puntos. O equipo que prepara Rubí vai afrontar as últimas cinco xornadas co obxectivo de escalar postos na táboa, competindo na chamada zona de ningures, sen aspiracións europeas pero tamén sen perigo de descenso. No caso do Celta, Fran Escribá quere garantir canto antes a permanencia e nas dúas saídas consecutivas ante o Español e o Leganés tratará de sumar puntos antes de recibir ao FC Barcelona en Balaídos.

Xunto a Pedro Pablo Alonso intervirán na entrevista a Borja Iglesias os xornalistas Toni López García e Víctor López. A emisión de 'Ao contraataque' poden seguila os oíntes a través da FM, TDT, radiogalega.gal e aplicación para o móbil. Outro xeito de seguir o programa é en diferido, a través do podcast que poden baixar da páxima web da emisora autonómica e mesmo a través de Ivoox.

ler máis

'A noite de Víctor Fábregas' lembrará os mellores momentos deste actor e humorista na Televisión de Galicia

22/04/2019

Moitos deles virán a través do seu personaxe máis coñecido, Tucho, o dos Tonechos, do que contará divertidísimas anécdotas, e amosará tamén a súa faceta máis sorprendente, a de cantante

'A noite de Víctor Fábregas' lembrará os mellores momentos deste actor e humorista na Televisión de Galicia

Santiago, 22.04.2019.-  No programa 'A noite de Victor Fábregas' (22.10 h.), que a TVG emite este luns á noite, os espectadores descubrirán os mellores momentos deste actor e humorista na canle autonómica, incluídos algúns que nin el mesmo lembraba. Moitos deles virán a través do seu personaxe máis coñecido, Tucho, o dos Tonechos, do que contará divertidísimas anécdotas.

O equipo do programa falará con el na súa terra, Esteiro, no concello de Muros, onde se achegará tamén á súa faceta menos coñecida, a de cantante. Amosarase desde o seu sorprendente debut na TVG ata algunhas das actuacións máis destacadas, coas que a audiencia descubrirá as súas dotes para o baile e a canción. Será, en definitiva, unha oportunidade única para achegarse a un dos personaxes máis queridos da Televisión de Galicia.

ler máis

O 'Bos días' da TVG comeza a emisión de entrevistas electorais, mentres que a RG ofrece o luns os debates provinciais

21/04/2019

Televisión de Galicia abre a quenda de entrevistas mañá, ás 10.00 horas, con Néstor Rego, candidato número 1 do BNG pola Coruña

Os debates a candidatos de cada provincia emitiranse na Radio Galega en desconexión, ás 13.10 horas

 

 

 

O 'Bos días' da TVG comeza a emisión de entrevistas electorais, mentres que a RG ofrece o luns os debates provinciais

Santiago, 21.04.2019-  Televisión de Galicia ofrece entrevistas, en directo, a un dos candidatos ao Congreso ou ao Senado do PP, PSdeG-PSOE, En Común-Unidas Podemos, En Marea e BNG, por calquera das catro circunscricións electorais que compoñen o ámbito de cobertura do medio. Realizadas polo xornalista Marcos Sueiro, emitiranse en días sucesivos, de luns a venres, dentro do espazo 'Bos días', a partir das 10.00 horas. A TVG abrirá a quenda de entrevistas mañá con Néstor Rego, candidato número 1 do BNG pola Coruña.

As entrevistas, cunha orde de intervención de menor a maior representación, terán unha duración proporcionalmente ponderada, conforme aos resultados obtidos nas anteriores eleccións. A entrevista á formación política máis votada terá unha duración de quince minutos, mentres que as correspondentes aos grupos políticos significativos terán unha duración de cinco minutos.

Debates en desconexión, na Radio Galega

Pola súa parte, a Radio Galega emitirá hoxe debates a candidatos de cada provincia, en desconexión. As distintas forzas políticas confrontarán as súas posicións nos debates provinciais, organizados pola emisora pública en cada unha das súas delegacións territoriais.

A orde de intervención de apertura e peche nos debates será en atención ao número de votos. Para abrir o debate será primeiro o partido máis votado e no último lugar o grupo significativo co menor número de votos. Para pechalo a orde será á inversa, comeza o grupo político significativo co menor número de votos e remata o máis votado. Unha vez iniciado o debate, ás 13.10 horas, os tempos non se marcan, son libres, e será o moderador a persoa que vele polo equilibrio das intervencións.

ler máis

Mentres o cuartel de 'Serramoura' investiga o asasinato de Eduardo, a noticia de que Moncho ten moza cae como unha bomba na casa dos Neira

21/04/2019

O serradoiro da vila comeza unha nova etapa con Evaristo, cuxa primeira medida é devolver a Raquel á fronte da xestión da empresa

Mentres o cuartel de 'Serramoura' investiga o asasinato de Eduardo, a noticia de que Moncho ten moza cae como unha bomba na casa dos Neira

Santiago, 21.04.2019.-  O cuartel de ‘Serramoura’ (22.00 h.) segue este domingo inmerso na investigación do asasinato de Eduardo. Despois de identificar a Máximo como suposto responsable, o sarxento Quiroga ten como obxectivo realizarlle un interrogatorio.

A noticia de que Moncho ten moza non gustou por igual ás súas fillas. Raquel está encantada co ligue do seu pai, pero Marga é moito máis reticente, o que ocasiona moitos problemas no seo da familia.

Mentres tanto, o serradoiro da vila comeza unha nova etapa con Evaristo á fronte. Unha das primeiras medidas como novo propietario é devolver a Raquel á fronte da xestión da empresa, aínda que terá que ensinar a Román en todo o que poida.

Despois de descubrir os verdadeiros os plans de Máximo, Pancho intenta explicarlle a Santos a verdade sobre os negocios que queren poñer en marcha en Serramoura e que suporían a destrución da vila tal e como a coñecen. Conseguirá que Santos sexa o seu aliado?

ler máis