CRTVG

Buscar

CRTVG Viva

"Malo será! chega a Verín co mellor humor e con Sergio Pazos como actor convidado

19/07/2018

Tras a exitosa estrea da semana pasada, o novo formato da TVG ofrecerá a función gravada nesta localidade ourensá, en que o intérprete local Aarón Gallego completa o elenco liderado por Lucía Regueiro



"Malo será! chega a Verín co mellor humor e con Sergio Pazos como actor convidado

“MALO SERÁ!” CHEGA A VERÍN CO MELLOR HUMOR
E CON SERGIO PAZOS COMO ACTOR CONVIDADO
---  
Tras a exitosa estrea da semana pasada, o novo formato da TVG
ofrecerá a función gravada nesta localidade ourensá, en que
o intérprete local Aarón Gallego completa o elenco liderado por Lucía Regueiro
---
A caravana de “AQUÍ GALICIA TOUR” chega esta tarde
á localidade coruñesa de Sada, coñecida coma a “Perla das Mariñas”
---
“A REVISTA” estará en directo na rodaxe da nova película de Óliver Laxe e falará dos festivais que triunfan en Galicia nesta fin de semana
---


Santiago, 19.07.2018.-  Tras a exitosa estrea na Televisión de Galicia a semana pasada co programa gravado no teatro Afundación de Vigo, “Malo será!” (22.00 h.) chega este xoves á segunda emisión. En concreto, será o programa gravado no Auditorio Municipal de Verín, ao que os espectadores poderán asistir a través da pequena pantalla. Sergio Pazos exerce nesta función de convidado e o actor local Aarón Gallego completa o elenco liderado por Lucía Regueiro, a presentadora do formato.

“Malo será!” chega á Terra da Chispa. Aquí nas tabernas aínda é posible probar licor café sen etiqueta e bo viño. Ao menos na taberna de César e Manola, que reciben a noticia da chegada dun inspector de sanidade que pode cambiarlles a vida.

Na segunda entrega do programa presentado por Lucía Regueiro haberá sketchs de todo tipo, historias coma a dun camareiro que parece coñecer todos os detalles das relacións amorosas dos seus clientes, unha vidente que –quen sabe a razón- adiviña todo o que se propón, ou unha voda en que a noiva, pero tamén o cura, reciben unha noticia coa que non contaban.

Este novo formato da TVG é toda unha homenaxe ao humor en directo, en que teatro e televisión se funden en hora e media de ocorrencias en que pode pasar absolutamente de todo. Con “Malo será!”, sete actrices e actores da canle autonómica, acompañados de convidados e moitas sorpresas, saen de xira polos teatros de Galicia para facer un espectáculo de sketchs cómicos sobre temas universais

ler máis

O programa "Casamos!" asiste esta noite a unha voda que tardou 50 anos en chegar

18/07/2018

Moisés namorou de Feli nada máis coñecela no colexio, pero tardou medio século en conseguir o primeiro bico

O programa "Casamos!" asiste esta noite a unha voda que tardou 50 anos en chegar

Santiago, 18.07.2018.-  Televisión de Galicia emitirá este mércores unha nova entrega do programa “Casamos!” (22.15 h.), que ofrece un retrato coral sobre o universo das vodas en Galicia e achega as historias de amor máis románticas, divertidas e entrañables, convertendo así as casas dos galegos en auténticos salóns nupciais.

Hai amores que se cociñan a lume lento, coma nas mellores telenovelas, e así é o amor dos protagonistas desta noite. Moisés namorou de Feli nada máis coñecela no colexio, hai case 50 anos, en Vilalba. Con só 5 anos pediulle matrimonio, de rapaz mandáballe cartas de amor, pero tardou 50 anos en conseguir o seu primeiro bico.

A súa será unha voda ben romántica, con moitas emocións e sorpresas para todos os convidados, como verán os espectadores da TVG.

ler máis

"Onde Collen Dous" móvese esta noite entre Armentón e Burela para coñecer a historia de dúas novas familias

18/07/2018

Os Shalabi López e os Méndez Alves son os anfitrións desta edición

"Onde Collen Dous" móvese esta noite entre Armentón e Burela para coñecer a historia de dúas novas familias

Santiago, 18.07.2018.-  “Onde Collen Dous” (23.15 h.), programa que percorre Galicia para compartir o día a día de familias galegas, amosando a súa historia, os seus valores e os seus segredos, comeza o percorrido desta noite en Arteixo, máis concretamente na parroquia de Armentón, onde viven os Shalabi López, unha familia moderna que decidiu que o rural era o mellor lugar para traer ao mundo a Nasser, de 13 anos, a extrovertida Laila, de 6, e o pequeno Xián, de 21 meses. Luis e Halimah son os anfitrións deste fogar que ten a cociña por vocación e que, desde hai uns meses, fai un menú semanal que divide con outra familia para aforrar na compra.

O espazo desprazarase tamén ata Burela para coñecer a curiosa historia dos Méndez Alves, unha familia de caboverdianos moi ligada ao mar. Joao Enmanuel e Yolanda só teñen un fillo, Tihai, pero con el non hai tempo para o aburrimento. O pequeno leva tempo pedindo un peixe para o seu acuario e igual hoxe pode ser o día que o consiga... ou non.

ler máis

Con motivo da XXVI Festa do Percebe de Roncudo, "Larpeiros Festeiros" instala a súa cociña en Corme

17/07/2018

Benigno e Adrián prepararán este prezado marisco con cachelos e á tixola (22.15 h.)

A continuación (23.15 h.), o equipo de “Sopa de Festa” celebrará cos mugardeses a súa tradicional Festa do Polbo

Con motivo da XXVI Festa do Percebe de Roncudo, "Larpeiros Festeiros" instala a súa cociña en Corme

Santiago, 17.07.2018.-  O programa “Larpeiros Festeiros” continúa viaxando a algunhas das festas gastronómicas máis senlleiras de Galicia para cociñar nas rúas e prazas os pratos homenaxeados.

ler máis

"Especial Día do Carme" na TVG para non perder ningunha das celebracións deste día tan remarcado en Galicia

16/07/2018

O programa (22.10 h.) estará en toda a costa galega, que se bota ao mar para homenaxear a súa patroa, desde Foz ata Cabo de Cruz e Aguiño, pasando por Cariño e Camariñas

"Especial Día do Carme" na TVG para non perder ningunha das celebracións deste día tan remarcado en Galicia

Santiago, 16.07.2018.-     Nosa Señora do Monte Carmelo, coñecida popularmente como Virxe do Carme, é unha das santas máis arraigadas e con máis tradición de toda Galicia. Non só é patroa de cidades, vilas, parroquias, aldeas ou lugares. A Virxe do Carme é tamén a patroa do mar e, por ende, a patroa de todos os homes da mar: os mariñeiros que saen faenar na busca do peixe e os mariños que integran a Armada Española.

Esta advocación, en que se festexa tamén o día de todas as Carmes, Carmelas ou Carmelos, celebra a súa onomástica o día 16 de xullo e, con este motivo, toda a Galicia é unha festa. Desde Ribadeo, nos límites co Principado de Asturias, ata A Guarda, lindando xa con Portugal, toda a costa galega se bota ao mar para homenaxear a súa patroa. Por este motivo, a TVG emite hoxe un programa especial en directo, presentado por Lucía Rodríguez, en que se recollerán todas as celebracións acontecidas en Galicia durante este día.

Deste xeito o equipo do “Especial Día do Carme” estará presente en toda a costa galega. Na Mariña, vivirá de preto o fervor que envolve os festexos de Foz. Nas Rías Altas, visitará as localidades de Cariño e Camariñas, con senlleiras procesións marítimo-terrestres, que destacan polas súas danzas gremiais e de arcos. E, xa nas Rías Baixas, participará da festa que caracteriza as vilas de Cabo de Cruz, en Boiro, e de Aguiño, en Ribeira, onde mesturan a parte relixiosa e lúdica de xeito inigualable.

ler máis

Continúan as gargalladas garantidas, esta noite, no “Land Rober Holidays Show"

16/07/2018

Nesta edición (23.00 h.), haberá que pasar polo hospital, caerá a estación espacial chinesa e os “Gorrillas” collerán velocidade con Jorge Lorenzo

Continúan as gargalladas garantidas, esta noite, no “Land Rober Holidays Show"

Santiago, 16.07.2018.-  O “Land Rober” segue sen marchar de vacacións e continúa amenizando as noites dos luns na TVG co mellor humor, os sketchs máis divertidos e as situacións máis hilarantes, a cargo, coma sempre, de Roberto Vilar, Eva Iglesias e Xosé A. Touriñán.

Así, no “Land Rober Holidays Show” desta noite, haberá que pasar polo hospital, caerá a estación espacial chinesa, os espectadores descubrirán os problemas de facer o amor nun coche en Lugo, os “Gorrillas” collerán velocidade con Jorge Lorenzo, os “Xubilados” irán a Turquía a facer un transplante de pelo e o actor Miguel de Lira xogará ao “A quen lle pasou?”

ler máis

"Vaia Troula" participa nas Festas do Carme de Sada, no Festival de Ortigueira, nas Carrilanas de Esteiro e na Rapa das Bestas de Amil

15/07/2018

O programa tamén ten esta noite unha cita na Feira Medieval de Noia, na Festa dos Callos do Carnés, na Batalla de Flores de Marín e na Feira do Viño do Rosal

"Vaia Troula" participa nas Festas do Carme de Sada, no Festival de Ortigueira, nas Carrilanas de Esteiro e na Rapa das Bestas de Amil

Santiago, 15.07.2018.-     Este domingo pola noite “Vaia Troula” (22.05 h.) encherá de ledicia os fogares dos espectadores da Televisión de Galicia. A presentadora Nieves Rodríguez irá ata Sada, onde celebran as Festas do Carme cunha espectacular procesión marítima en que os sentimentos están a flor de pel.

ler máis

A TVG estrea o documental "Santoalla", un retrato do crime que lle custou a vida ao holandés Martin Verfondern

15/07/2018

Recolle gravacións realizadas pola vítima sobre a súa vida cotiá e os problemas xurdidos cos únicos veciños da aldea en que vivía xunto á súa parella

A TVG estrea o documental "Santoalla", un retrato do crime que lle custou a vida ao holandés Martin Verfondern

Santiago, 15.07.2018.-  Televisión de Galicia estrea esta noite “Santoalla” (23.30 h.), un documental que recolle os acontecementos que viviu Martin Verfondern nunha pequena aldea ourensá antes de desaparecer misteriosamente. A parella formada por Martin e a súa muller, Margo Pool, foxe do bulicio de Amsterdam a finais dos 90 e, cativada pola paisaxe e tranquilidade destas terras, instálase na comarca de Valdeorras.

ler máis

Novo maratón na tvG2, coa emisión completa de “O Círculo Bletchley”, unha serie marcada polo misterio

15/07/2018

Ambientada nos anos 50, as protagonistas da proposta desta tarde están inspiradas nun grupo de inglesas que na 2ª Guerra Mundial traballou descifrando códigos secretos alemáns

Novo maratón na tvG2, coa emisión completa de “O Círculo Bletchley”, unha serie marcada polo misterio

Santiago, 15.07.2018.-  Os apaixonados polo suspense e os dramas teñen esta tarde unha proposta única na tvG2 coa emisión dun novo maratón de ficción, sete capítulos que conforman as dúas tempadas completas da serie “O círculo Bletchley” (16.30 h.), orixinal da canle británica ITV. Esta ficción do Reino Unido está protagonizada por catro mulleres cun talento extraordinario para descifrar códigos e unha intelixencia moi aguda para resolver misterios e asasinatos. Ambientada nos anos 50, estas mulleres que traballaron xuntas descifrando códigos alemáns durante a II Guerra Mundial deciden unirse para resolver crimes complexos, dada a incompetencia das autoridades.

As coñecidas como mulleres de Bletchley foron un conxunto de criptonalistas que traballaron durante a guerra descifrando códigos secretos dos alemáns. A ficción inspírase nelas, pero nove anos despois do remate do conflito armado, rendendo así unha homenaxe ás mulleres que no seu tempo foron subestimadas e ignoradas en moitos casos, pero que aínda así conseguiron facerse un pequeno oco na historia.

Conta cun elenco de excepción entre o que destacan os rostros de Rachael Stirling (''A pesca do salmón en Iemen''), Sophie Rundle (''Grandes esperanzas'') e Julie Graham (''Nin na túa casa nin na miña'').

ler máis

O “Vivir Aquí” coñece, de primeira man, os preparativos do día do Carme nas vilas costeiras galegas

14/07/2018

Neste percorrido, o espazo achegarase a Laxe, Burela, Foz, Marín e Baiona

O “Vivir Aquí” coñece, de primeira man, os preparativos do día do Carme nas vilas costeiras galegas

Santiago, 14.07.2018.-  Chega o día grande dos apaixonados polo mar, a celebración dunha das datas máis secundadas na costa galega, a festa do Carme. Unha cita que, ano tras ano, se festexa dunha forma moi especial en cada vila mariñeira, onde os veciños manteñen tradicións que lembran a dureza do traballo no mar.

Para achegarse a esta festa do mar e aos seus preparativos, “Vivir Aquí” (15.30 h.) viaxará desde a Mariña de Lugo ata o sur da provincia de Pontevedra. Os espectadores coñecerán como se celebra en varias vilas unha data que engalana e enche de ledicia e emoción toda a Galicia costeira. Neste percorrido amosarase a celebración do día do Carme nas vilas de Laxe, Burela, Foz, Marín e Baiona.  

ler máis