CRTVG

Buscar

CRTVG Viva

O actor Antonio Durán 'Morris' e o grupo Boyanka Kostova, protagonistas dun 'Land Rober Tunai Show' dedicado á rapazada

25/02/2021

Da man de dous expertos na materia, Pili Pampín e Octavio Villazala, os espectadores coñecerán os problemas que lle quitan o sono á Xeración Z

O actor Antonio Durán 'Morris' e o grupo Boyanka Kostova, protagonistas dun 'Land Rober Tunai Show' dedicado á rapazada

Santiago, 25.02.2021.-    Este xoves vén un dos grandes pintar a mona no ‘Land Rober Tunai Show’ (21.55 h): o actor Antonio Durán ‘Morris’, nun programa especial para a ‘juventú’. Os espectadores van saber que pasa coa rapazada nestes tempos, e para iso o programa contará con dous expertos na materia: Pili Pampín e Octavio Villazala. Cal dos dous coñecerá mellor os problemas que lle quitan o sono á Xeración Z?

Volve tamén o ‘Pasa pa casa’ especial rapazada. Por se fose pouco, o show presentado por Roberto Vilar pillará a Dosinda na allada, nun encontro cun pretendente no límite do peche perimetral. O garda civil vai ter traballo arreo.

O ramo porao o grupo de trap galego Boyanka Kostova. Quen mellor para marcar o ritmo deste ‘Land Rober’ especial ‘chavalada’?

ler máis

CRTVG.gal ofrece o regreso da Real Filharmonía de Galicia aos escenarios, nun recital con Nuno Coelho á batuta

25/02/2021

Tras a paréntese imposta polas restricións sanitarias, este xoves transmitirase en directo por streaming, ás 20.00 horas, un concerto homenaxe ao compositor Beethoven

CRTVG.gal ofrece o regreso da Real Filharmonía de Galicia aos escenarios, nun recital con Nuno Coelho á batuta

Santiago, 24.02.2021.-  O portal web da CRTVG retoma este xoves a transmisión por streaming dos concertos da presente temporada da Real Filharmonía de Galicia, suspendidos estas últimas semanas por mor das restricións sanitarias. Na sección ‘Fluxos G’, os usuarios de crtvg.gal poderán seguir en directo, a partir das 20.00 horas, o concerto ‘Viva Beethoven’ (http://www.crtvg.es/en-directo/fluxos-g-concerto-da-real-filharmonia-de-galicia), desde o Auditorio de Galicia. O director luso Nuno Coelho debutará coa orquestra galega á batuta, no que será un concerto homenaxe ao compositor Ludwig van Beethoven (1770-1827).

Baixo o título ‘Viva Beethoven’, o concerto comezará coa versión de 1943 de La Noche Transfigurada, de Arnorld Schoenberg (1874-1951), inspirada no poema homónimo de Richard Dehmel. A continuación, os músicos interpretarán a Sinfonía nº 5, unha das composicións máis populares da música clásica.

Nuno Coelho foi o gañador do Concurso Internacional de Dirección da Orquestra de Cadaqués en 2017 e é director convidado da Orquestra Gulbenkian. Nesta temporada, ademais dos concertos en Lisboa, debutará coa Staatsorchester de Hannover, coa Simfónica de Barcelona e Noord Nederlands.

Desde decembro e ata o mes de maio, o portal web da CRTVG está retransmitindo os xoves por streaming os concertos da presente temporada da Real Filharmonía de Galicia, cos que celebra o seu 25 aniversario. Estes recitais só poderán verse en directo, xa que non quedarán posteriormente gravados na web. As retransmisións están dispoñibles na sección ‘FluxosG’ do portal da CRTVG, destacada na súa portada.

ler máis

As radios públicas autonómicas reforzan o seu labor no mundo dixital

24/02/2021

Aumentan as visitas, número de descargas, usuarios únicos e reproducións dos seus programas de radio online e podcasts en 2020
 
A Radio Galega obtivo en 2020 a súa mellor marca histórica. As canles dixitais incrementaron máis dun 10 % o seu impacto global e a súa aposta polos podcast foron claves para acadar grandes datos de audiencia dixital

As radios públicas autonómicas reforzan o seu labor no mundo dixital

Santiago, 24.02.2021.-  As radios son unha parte fundamental dos servizos audiovisuais públicos autonómicos englobados na Federación de Oganismos de Radio e Televisión Autonómicos (FORTA). Nos últimos tempos, este medio tivo que reinventarse e ir adaptándose aos constantes cambios, á nova maneira de consumir e ao crecemento de Internet. Durante o 2020, as radios reforzaron a súa aposta polo mundo dixital, o cal se viu reflectido no éxito e crecemento dos seus contidos online.

2020 foi o ano da información de servizo público. No medio dunha pandemia sen precedentes, os medios públicos galegos responderon dando o máximo servizo público da súa historia, e este traballo viuse recompensado pola sintonía e fidelidade da audiencia. Todas as canles da Corporación melloraron a súa audiencia en 2020. CRTVG pechou o ano cunha cota media anual do 10,6 %, (TVG 9,9 % e a G2 0,7 %, un crecemento dun 6 % respecto de 2019). A Radio Galega obtivo a súa mellor marca histórica, e as canles dixitais incrementaron máis dun 10% o seu impacto global, cun crecemento interanual do portal crtvg.gal do 16 % no número de sesións.

Os cambios na programación de Radio Galega e Radio Galega Música (RGM), e a súa aposta polos destacados e podcast foron claves para lograr uns grandes datos de audiencia dixital en 2020.

En Radio, RGM creceu un 16 % con respecto a 2019 e os podcast de Radio Galega, un 9 %. Os directos disparáronse o catro últimos meses do ano, do mesmo xeito que o seguimento en redes sociais. E RGM iniciou 2021 con cifras altas de consumo, sen deixar de crecer desde abril de 2020 e un pico de consumo en novembro pasado (27.665 usuarios únicos).

Máis visitas, descargas e usuarios nas emisoras de Forta

Pola súa parte, Canal Sur Radio pechou o ano 2020 con 7.039.624 visitas na súa web (un millón de páxinas máis que o ano anterior) e 1,6 millóns de usuarios únicos, o que supoñen 600.000 usuarios máis que en 2019.  

Catalunya Ràdio obtivo 43 millóns de reproducións de audio, a través da súa web, app, podcast e asistentes de voz. Iso representa un incremento do 17 % respecto ao 2019.

Durante este ano, Onda Madrid logrou un crecemento, non só de usuarios, que ascenden a 3.455.141, un 59 % máis que o ano anterior. O número de páxinas vistas da emisora chega ás 7.255.171, o que supón un 41 % de crecemento fronte á tempada anterior.

300.000 persoas conectáronse á radio en directo de À Punt a través da web, as aplicacións móbiles ou dispositivos intelixentes, e consumíronse máis de 120.000 contidos á carta.

As radios do grupo EITB (Euskadi Irratia, Radio Euskadi, Radio Vitoria, Gaztea, Eitb Irratia e Euskal Kantak) continúan crecendo en Internet, con máis de 410.000 usuarios únicos ao mes e cunha audiencia nas súas emisións online de 50.000 usuarios únicos.

Os programas de Radio Castilla-La Mancha obtiveron máis de 350.000 visitas na súa web corporativa en 2020; case 1 millón de reproducións de podcast, como ‘El Dragón invisible’ ou o programa ‘808 Radio’, especializado en música electrónica, que aglutina preto de 300.000 reproducións.

Onda Regional de Murcia está en continua expansión en internet: durante o 2020 a súa web rexistrou unha media de 100.000 usuarios únicos por mes triplicando as cifras do ano anterior, e ao redor de 4,5 millóns de accesos, o que se traduce en máis de 16 millóns de clics entre visitas, descargas e reproducións dos seus contidos, un dato que supón dobrar a cifra de 2019.

Neste sentido, o impacto de Aragón Radio foi sobresaliente durante o último ano, ao superar os 4,5 millóns de audios descargados (o que supón un crecemento do 22 %), un millón máis que o ano anterior.

IB3 Ràdio incrementou a súa presenza online a través de diferentes formatos e canles. Así, a canle balear logrou que os seus usuarios consumisen máis de 234.131 contidos á carta a través das plataformas dixitais. Durante o 2020, un total de 162.697 persoas conectáronse á radio en directo a través da páxina web, a App e a plataforma de podcasting de Ivook e Spotify.

As emisoras en RRSS

Ademais, a presenza das radios públicas en redes sociais é cada vez máis notoria. As emisoras atoparon nas plataformas o aliado perfecto para achegarse ao público máis novo -e máis esixente- captando a atención de novos oíntes.

A Radio Galega obtivo un crecemento do 7 % en Facebook e do 17 % en Twitter, mentres que Aragón Radio conta cunha activa comunidade de seguidores en redes que ascende a máis de 145.000 persoas.

Canal Sur Radio aumentou a presenza das súas emisoras en RRSS: por exemplo, Canal Fiesta Radio ten 388.385 seguidores e é a emisora da casa con maior presenza, converténdose en TT todos os días en Twitter.

Catalunya Ràdio destaca a súa evolución no panorama dixital: entre as súas canles de Youtube, Instagram TV ou Spotify, o número de reproducións ascende a un total de 3 millóns.

As canles de EiTB teñen gran presenza en plataformas como Spotify, Ivoox ou iTunes, así como en Facebook, Twitter e Instagram. Os contidos de Radio Castilla-La Mancha, pola súa banda, superaron as 150.000 reproducións en Youtube durante o 2020. A presenza de ORM en redes sociais tamén creceu de maneira exponencial nos últimos anos, principalmente en Twitter e Facebook, onde a radio autonómica conta con preto de 50.000 seguidores.

As temáticas máis demandadas

Entre as temáticas de máis éxito para os oíntes das radios públicas autonómicas atópanse os programas informativos e os espazos deportivos, mantendo sempre unha presenza relevante os programas de humor e de música.

Entre os andaluces e os valencianos os programas máis destacados son os de humor. Destacan principalmente os programas de actualidade entre os cataláns, vascos e murcianos.

O deporte é outra temática moi demandada, exemplo diso son os programas de Castilla-La Mancha, Canal Sur, Radio Euskadi e Radio Galega. Precisamente, os eventos deportivos do último trimestre incrementaron considerablemente o número de usuarios únicos, tanto nas canles dedicadas ao deporte como na propia emisión de Radio Galega e Televisión de Galicia.

Tamén son os que máis crecen os programas deportivos de Onda Madrid, À Punt Aragón Radio. Ademais, os madrileños apostan por un novo contido que se consome maioritariamente a través da web, relacionado coas ofertas de emprego e que resolve dúbidas laborais por parte do SEPE.

ler máis

A gañadora de 'Come a Comarca. As Batallas' sairá esta noite da gran final entre Terra de Melide e a Terra Chá

24/02/2021

A maior competición gastronómica de Galicia despídese cun programa (23.30 h) cheo de emoción, cun menú propio dunha estrela Michelín e con esixentes retos culinarios

A gañadora de 'Come a Comarca. As Batallas' sairá esta noite da gran final entre Terra de Melide e a Terra Chá

Santiago, 24.02.2021.-     A final do norte entre os coruñeses da Terra de Melide e os lucenses da Terra Chá, pon hoxe o punto e final a ‘Come a Comarca. As Batallas’, a competición gastronómica que mediu 16 equipos comarcais, representados por cinco cociñeiros cada un, na Televisión de Galicia.

No programa desta noite haberá un menú propio dunha estrela Michelin, produtos tradicionais da nosa terra, retos culinarios, etc. Todo nunha proba contra o reloxo en que un xurado decidirá nunha cata a cegas cal é a comarca que mellor cociña nas provincias da Coruña e Lugo.

Pedro Coego, do Recuncho do Convento, á fronte dos melidenses, e José Luis Álvarez ‘Bouso’, de O Castro, na Pastoriza, liderando os chairegos, deixarán os seus restaurantes e porán o brazalete de capitán de equipo para conseguir xunto cos seus compañeiros o premio final. O orgullo comarcal está en xogo, pero tamén 20.000 euros, 15.000 para os gañadores e 5.000 para o equipo finalista.           

ler máis

Este mércores, fútbol por radiogalega.gal

23/02/2021

A primeira cita deportiva que ofrece a emisora pública é o derbi galego entre o Rácing de Ferrol e o Celta B

Este mércores, fútbol por radiogalega.gal

Santiago, 23.02.2021.-  Outro mércores de fútbol o que poderán vivir os oíntes da Radio Galega a través da páxina web radiogalega.gal, aplicacións móbiles e tamén pola conta de Twitter galiciangoles. Desde as cinco menos cinco da tarde, Paco Santos presenta máis de cinco horas de retransmisións.

A primeira cita é na Malata, co derbi Rácing de Ferrol-Celta B da Segunda División B. Raúl Villares e Roberto Carlos Carballo trasladarán a emoción do fútbol nun encontro que afecta tamén aos outros equipos galegos implicados na pelexa por ascender ou permanecer.

Desde as sete e media, o interese pasará pola Terceira División con tres citas: o derbi local Fabril-Silva, o Bergantiños-As Pontes e o Paiosaco-Fisterra. Ademais, o programa estará pendente do balonmán feminino coa disputa do Guardés-Málaga da máxima categoría, no pavillón da Sangriña.

Na FM, os oíntes poderán estar informados do que pasa nesta xornada ás 20.30 horas no espazo de deportes de 'A Crónica' e, a partir das 23.00 horas, 'Ao contraataque' falará cos principais protagonistas.

ler máis

'Casamos!' pon esta noite o ramo a un amor de segundas oportunidades, o de Raquel e David

23/02/2021

A desta noite (22.25 h) será unha voda de familiares e amigos, en que as sorpresas e as bágoas de emoción están garantidas

'Casamos!' pon esta noite o ramo a un amor de segundas oportunidades, o de Raquel e David

Santiago, 23.02.2021.-   ‘Casamos!’, o programa que ofrece un retrato coral sobre o universo das vodas en Galicia, ofrece esta noite unha nova entrega, un romántico enlace, en que os espectadores poderán ver os detalles e particularidades desta parella de noivos, formada por Raquel e David, que son a viva imaxe de que as segundas oportunidades existen. Unha parella de Tomiño que se coñeceu por casualidade nun Entroido.

David namorou ao momento pero a Raquel custoulle un pouco máis, pois deixara recentemente unha relación que non fora doada e tiña unha filla pequena. Con todo, comezaron a saír, pero a cousa non foi ben. A relación rompeu e cada un refixo a súa vida... ata que 14 anos despois o destino os volveu unir.

A vida brindoulles esta segunda oportunidade e agora ningún dos dous quere perder a ocasión de viviren o seu amor ao cento por cento! A voda será unha cerimonia de familiares e amigos en que as sorpresas e as bágoas de emoción están garantidas!

ler máis

A CRTVG colabora co programa educativo '21 días co galego e +' para promover o galego fóra das aulas

22/02/2021

O magazine ‘Galicia por Diante’ da Radio Galega conversará cada día con alumnos e e profesores dun dos dez colexios participantes

O proxecto #DígochoEu visitará virtualmente eses centros de ensino, comezando este xoves co IES Taboada Chivite de Verín

'21 días co galego e +' é un programa de Política Lingüística, que busca favorecer o uso do galego oral entre a xente nova

A CRTVG colabora co programa educativo '21 días co galego e +' para promover o galego fóra das aulas

Santiago, 22.02.2021.- A CRTVG colabora desde hoxe no programa educativo ’21 días co galego e +’, que leva a cabo a Secretaría Xeral de Política Lingüística para promover o uso do galego oral entre a xente nova, dentro e fóra dos centros de ensino. Ata o 14 de marzo, o espazo da Radio Galega ‘Galicia por Diante’ e o proxecto #DígochoEu da CRTVG serán cómplices desta nova edición para favorecer o uso e perfeccionamento da nosa lingua en todos os ámbitos e, mesmo dun xeito divertido, mellorar o coñecemento sobre o galego. Nesta iniciativa, en que participan dez centros das catro provincias galegas da ESO, de bacharelato e de FP, o alumnado comprométese co seu profesorado a falar soamente en galego as 24 horas do día durante os 21 días de duración.

Cada día, o magazine ‘Galicia por Diante’ da RG (tamén nas fins de semana) acollerá unha sección con algún dos dez centros de ensino participantes, en que se tratarán temas relacionados coa lectura, a lingua e os colexios, entre outras cuestións. Desde o martes 23 e a partir das 13.00 horas, durante uns dez minutos, conversarase en directo cunha representación dun colexio, que estará formada por unha alumna, un alumno e unha/un docente. Na fin de semana, esta conversa desenvolverase ás 10.45 horas. A RG presentoulle esta iniciativa aos seus oíntes este luns, cunha entrevista conxunta coa promotora da mesma Pilar Ponte e o secretario xeral de Política Lingüística, Valentín García, e coa participación de Víctor F. Freixanes, presidente da Real Academia Galega.

Charlas virtuais do #DígochoEu nos dez colexios participantes

Pola súa parte, o proxecto #DígochoEu visitará virtualmente o xoves o IES Taboada Chivite de Verín, nunha sesión que atenderán arredor dun cento de estudantes. Os xornalistas Carlos Amado e Esther Estévez retoman, aínda que sexa virtualmente, os encontros cos centros escolares para difundir os obxectivos de #DígochoEu, espallar o uso do galego e promover o seu uso correcto. En total, realizaranse dez charlas ao longo das vindeiras semanas.

#DígochoEu é xa o proxecto sobre lingua máis seguido na historia dos medios públicos galegos. Con marcas de seguimento na web e nas redes sociais, o espazo chegou esta semana a máis de 10 millóns de visualizacións en TikTok, onde a seguen 80.000 persoas. Esta conta foi creada a finais de setembro e os seus vídeos acadaron desde entón 1,1 millóns de likes. Cun formato moi divertido e dinámico, a xornalista Esther Estévez convida a falar mellor en galego nun breve vídeo diario, de tan só 1 minuto. #DígochoEu naceu en xaneiro de 2020 dentro da web dos servizos informativos e hoxe pode verse na web crtvg.gal, en g24.gal, así como nas contas de Instagram (@g24noticias), Twitter (@g24noticias), Facebook (g24noticias), Youtube (youtube.com/tvg) e TikTok (tiktok.com/@digochoeu) e no Telexornal da TVG. Dirixido polo xornalista Carlos F. Amado, #DígochoEu conta coa revisión do servizo de asesoramento lingüístico da CRTVG da man de Rocío Pérez, quen tamén participará nas sesións.

Dez centros de ensino participan en ‘21 días co galego e +’

Este programa ten a súa orixe en ‘21 días co galego’, unha experiencia didáctica que botou a andar no IES da Pobra do Caramiñal no ano 2013, da man da profesora Pilar Ponte. A Secretaría Xeral de Política Lingüística quixo dar un paso máis e exportou a iniciativa a outros centros educativos, no marco do Plan de dinamización da lingua galega na mocidade. Na edición de 2021 son dez os centros de ensino galegos, que desenvolven os contidos do programa: IES Perdouro de Burela, IES As Mariñas de Betanzos, IES de Carral, CPR A Inmaculada de Lugo, IES Lamas de Abade de Santiago, IES Ramón Cabanillas de Cambados, IES Sánchez Cantón de Pontevedra, IES Lauro Olmo do Barco de Valdeorras, IES Santa Irene de Vigo e IES Taboada Chivite de Verín.


ler máis

Os espectadores de 'Cos pés na terra' descubrirán os segredos dunha nova arte: facer esculturas con motoserra

22/02/2021

Ademais, o programa compartirá unha xornada de traballo cunha viticultora e un cabreiro

Os espectadores de 'Cos pés na terra' descubrirán os segredos dunha nova arte: facer esculturas con motoserra

Santiago, 22.02.2021.-   Na nova entrega de ‘Cos pés na terra’ (22.25 h) que a TVG ofrece hoxe van facer esculturas… con motoserra. Os espectadores coñecerán a Marcos, especialista nesta modalidade, que vai amosar ao detalle os segredos da súa arte.

O programa tamén ten esta semana unha cita con Vanesa, viticultora nova e sobradamente preparada, que agarda nun viñedo ao que non lle faltan nin as uvas de albariño nin as vistas impresionantes.

Ademais, o equipo de ‘Cos pés na terra’ compartirá unha xornada con Isaías, cabreiro de profesión e de corazón, a quen que os días no monte lle dan pra moito: para darlle ao WhatsApp, para xantar e mesmo para botarlle unha peza.

ler máis

A situación de Damián á fronte do clan dos Canosa non fai máis que complicarse, esta noite en 'Método Criminal'

21/02/2021

Tuco, un dos seus mellores homes, traizoouno porque non cre que sexa un bo líder para o clan e quere sacalo do medio, pero el fará todo o posible por impedir o fatal desenlace

A situación de Damián á fronte do clan dos Canosa non fai máis que complicarse, esta noite en 'Método Criminal'

Santiago, 21.02.2021.-   Como verán esta noite os seguidores da serie ‘Método Criminal’ (22.30 h), a situación de Damián á fronte do clan dos Canosa non fai máis que complicarse. Tuco, un dos seus mellores homes, traizoouno porque non cre que sexa un bo líder para o clan e quere sacalo do medio. Nun dos seus últimos intentos por acabar co seu xefe, a axuda de Luís Iglesia foi determinante para salvar e Damián e a Cecilia dunha morte segura, pero agora Tuco reaparece de novo disposto a non errar o tiro.

Con todo, Damián fará todo o posible por impedir o fatal desenlace e convencer a Tuco de que ten bo corazón. Pero, se o consegue, terá que facerse valer ante os membros do clan, que clamarán vinganza contra Tuco.

Damián tamén terá que recompoñer a súa relación con Sofía. Ela está desexando ser nai, pero el non está disposto a que o seu fillo medre nun ambiente como o que hai no seu fogar nestes momentos, o que fará agromar unha fisura de dúbidas no seo da parella.

Mentres tanto, Luís, que segue loitando por conseguir o papel de protagonista na serie sobre Roi Xordo, vai ter unha axuda coa que non contaba. Cecilia sente que está en débeda con el despois de salvala dunha morte segura a mans de Tuco e ofrécese a axudalo para o que sexa. El declina a súa oferta, pero Cecilia decide actuar pola súa conta e conseguir que lle dean o papel a Luís.

Ao mesmo tempo, Sara decide facer unha visita á casa de Luís para facelo recapacitar e conseguir a súa colaboración para obter probas e deter a Damián e os membros do seu clan.

ler máis

Noite de música e diversión en 'Bamboleo', coas actuacións de María Villalón e Jorge González

20/02/2021

A orquestra Los Satélites traerá a esencia da verbena galega ao espazo presentado por Xosé Manuel Piñeiro (22.05 h)

Noite de música e diversión en 'Bamboleo', coas actuacións de María Villalón e Jorge González

Santiago, 20.02.2021.-   A noite do sábado é noite de ‘Bamboleo’, de música e de diversión. Xosé Manuel Piñeiro recibirá hoxe a visita de dous convidados: María Villalón e Jorge González, artistas que se deron a coñecer despois de participar en programas de talentos musicais, candidatos a representar a España no festival de Eurovisión e gañadores dun famoso concurso de imitacións.

‘Desde Ayamonte hasta fado’ é unha recompilación de coplas, fados, flamenco e cantes ibéricos cos que María Villalón regresa ás súas orixes e non para de recoller éxitos. Jorge González, pola súa parte, acaba de presentar o seu último tema, titulado ‘Hasta que llueva’, en que transmite unha mensaxe de traballo e sacrificio. Os dous artistas interpretarán os seus éxitos sobre o escenario de ‘Bamboleo’ e participarán dos xogos que cada semana preparan os colaboradores do programa.

A orquestra Los Satélites traerá ao estudio a esencia da verbena galega, mentres que no ‘Dirtidansi’, Kike e Nahir, parella de especialistas en bachata, realizarán dous fantásticos números de baile e contarán as súas experiencias sobre os escenarios.  

Toñi Rivas e David Junco serán os participantes da sección ‘Agora ou Nunca’, en que interpretarán os éxitos ‘Te vas’, de Américo e ‘Dos hombres y un destino’, de David Bustamante.

No karaoke de ‘A Jrileira’ participarán dous representantes de entidades deportivas: Roi, polo Club Ciclista Compostelán Muebles Compostela, e Héctor, pola Agrupación Deportiva Judo Ferrolterra. Roi e Héctor cantarán o tema ‘La flaca’, de Jarabe de Palo, e adiviñarán intérpretes de cancións, axudados por dous compañeiros de club.

Mentres Tamara e Claudio meten os convidados en compromisos cos seus xogos, con Isi chegarán as risas e as vivencias máis divertidas. Cara ao final, na ‘ITV do Amor’ unha parella de namorados e os seus amigos intentarán confundir unha participante que chegará coa ansia de arrebatarlles o premio que hai en xogo.


ler máis