Competición triangular de fútbol entre Lugo, Celta e Spórting, en directo na tvG2
Santiago, 08.08.2012.- Este serán, a partir das 19.30 h., o fútbol volve ser protagonista na segunda canle da Televisión de Galicia, a tvG2, emitindo en directo desde o estadio lucense Anxo Carro o triangular C.D. Lugo - Celta - Spórting de Xixón. Estes encontros serán para os tres equipos as penúltimas probas de pretemporada antes de que comecen as respectivas competicións.
De xeito individual, a disputa deste triangular será para o equipo lucense a oportunidade que teñan para brindarlle a primeira vitoria ante os seus afeccionados e ante dous equipos despois de perder ante o Deportivo e a Ponferradina. Para o Celta, un novo partido de pretemporada, nove días antes de comezar a Liga de 1ª División, e, para o Spórting, unha oportunidade de medir o seu equipo e comezar a pensar no regreso á máxima división do fútbol español.
Os espectadores que o desexen poderán volver ver este triangular na Televisión de Galicia, a partir das 00.45 horas.
