Comeza a edición diaria de “Vaia troula express”, coas festas e celebracións máis senlleiras de Galicia
No mes de apoxeo das celebracións galegas o programa espalla, de luns a venres, os seus reporteiros polos mellores festexos
Santiago, 07.08.2012.- O mes de agosto en Galicia é a época do ano, por excelencia, con maior oferta de festas e celebracións de todo tipo. Por este motivo, e co fin de dar cobertura a todas estas festas espalladas por todos os recunchos, vilas e cidades, a Televisión de Galicia, da man do programa “Vaia troula de verán”, comeza a partir de hoxe a edición diaria de “Vaia troula express”.
De luns a venres, ás 19.30 horas, os reporteiros de “Vaia troula express” percorrerán Galicia para estar presentes en moitos dos festexos que se desenvolverán ao longo destes mes de agosto.
Continuando coa esencia da edición dominical de “Vaia troula de verán”, nesta nova aposta diaria a troula, coa que viven milleiros de galegos e visitantes as celebracións en Galicia, seguirá sendo a gran protagonista do guión do programa. A música, as tradicións, as romarías populares, relixiosas e gastronómicas continúan tendo cabida en “Vaia troula express”.
Na primeira edición de hoxe de "Vaia troula express" os espectadores da Televisión de Galicia poderán ver todo canto aconteceu no Play Back do Porriño, un evento que se enmarca dentro das festas da Virxe das Flores e no que os veciños participan de xeito activo; a Festa da empanada da parroquia viguesa de Matamá; o desfile de carrozas e a coroación das raíñas da flor en Ribeira; a III festa gastronómica da navalla de Aguiño; o desembarco viquingo de Catoira, declarado de Interese Turístico Nacional, e a Festa hortera de Porto do Son.
