A Galega estrea “Maniotas”, unha valente proposta para comprobar os valores e beneficios do deporte na vida
Entre as historias que se relatan, o tesón dun deportista en cadeira de rodas e os equipos de fútbol da liga interhospitalaria
Santiago, 11.02.2012.- Achegar os valores e beneficios da práctica deportiva aos espectadores mediante o coñecemento dos seus protagonistas é o obxectivo principal da serie documental “Maniotas”, que a TVG estrea hoxe á sobremesa (15.20h) como un espazo educativo e moi divertido dirixido a toda a familia, para transmitir a importancia do papel do deporte na sociedade e na relación entre as persoas.
A serie documental proporciona unha visión cotiá do mundo que envolve o deporte reflectindo situacións tanto divertidas coma emotivas. Pero, quen son os protagonistas destas historias? Persoas de todas as idades relacionadas dalgún xeito con algunha disciplina deportiva, desde as máis populares e modestas ás máis orixinais; colectivos ou individuos que transmitirán aos
espectadores a oportunidade de coñecer as situacións máis curiosas, emotivas e sorprendentes e, como non, xente amiga de mover as pernas e o corazón.
Manolo Tesouro, un ourensán de mediana idade que, pese de perder unha perna, nunca pensou en deixar o deporte, convértese na primeira historia protagonista de hoxe, un home que grazas ao seu imparable ímpeto deportivo chegou a ser un dos membros máis importantes da selección galega de baloncesto en cadeira de rodas.
Na segunda historia de hoxe verase a Santiago, un celador do Hospital Clínico de Santiago, que xunto con outros membros do hospital integra o equipo de fútbol deste centro, precisamente nun encontro contra o equipo do Chus, da Coruña, un duelo xa clásico dentro da liga interhospitalaria de fútbol.
